މިނިވަންކަން އިއުލާނުކުރުމަށް ފެންނަ ކަމަށް ކެޓަލޯނިއާގެ ގާނޫނު ހަދާ މަޖިލީހުން ފާސް ކުރުމާއެކު އެ މަޖިލީސް އުވާލައްވައި އަވަސް އިންތިޚާބެއް ބޭއްވުމަށް ސްޕެއިންގެ ބޮޑުވަޒީރު މަރިއާނޯ ރަޚޮއި ނިންމަވައިފިއެވެ.
ރަޚޮއި ވިދާޅުވީ އާއްމު ހާލަތަށް ރުޖޫއަވުމަށްޓަކައި މައި ސަރުކާރުން ކެޓަލޯނިއާގެ ކަންކަން ހިންގަން ފަށަން މަޖުބޫރުވެފައިވާކަމަށެވެ.
މީގެ އިތުރުން ކެޓަލޯނިއާގެ ލީޑަރު ކާލްސް ޕުޖްޑިމޮންޓް ވަކިކޮށް އޭނާގެ ކަބިނެޓް އުވާލުމަށްވެސް ރަޚޮއި ވަނީ ނިންމަވާފައެވެ.
މި މައްސަލަ ފެންމަތިވެފައިވަނީ ސްޕެއިންގެ ދުސްތޫރީ ކޯޓުން ޣައިރު ގާނޫނީ ކަމެއް ކަމަށް ކަނޑައަޅާފައިވަނިކޮށް ކެޓަލޯނިއާގެ ލީޑަރުން ކެޓަލޯނިއާގެ މިނިވަންކަމަށް ނެގި ފެންނަ ނުފެންނަ ވޯޓާ ގުޅިގެންނެވެ.
ކެޓަލޯނިއާގެ މިނިވަންކަމާމެދު އޮކްޓޯބަރު މަހުގެ އެއްވަނަ ދުވަހު ނެގި ފެންނަ ނުފެންނަ ވޯޓުގައި ބައިވެރިވި މީހުންގެ 90 އިންސައްތަ މިނިވަންކަމަށް ތާއީދުކޮށްފައިވާ ކަމަށް ކެޓަލޯނިއާގެ ސަރަހައްދީ ސަރުކާރުން ބުނެ އެވެ.
ސްޕެއިންގެ މައި ސަރުކާރުން ކެޓަލޯނިއާ ވަކިވުމަށް ތާއީދު ނުކުރާ ކެޓަލޯނިއާގެ ރައްޔިތުން ބޯއިކޮޓް ކުރި މި ވޯޓުގައި ބައިވެރިވެފައިވަނީ ވޯޓު ލުމުގެ ހައްގު ލިބިފައިވާ މީހުންގެ 43 ސައްތަ އެވެ. ޣައިރު ގާނޫނީ ވޯޓެއް ކަމަށް ކޯޓުން ކަނޑައެޅުމުން އެއްބަޔަކުވަނީ ވޯޓް ބޮއިކޮޓް ކޮށްފައެވެ.
ސްޕެއިން ގެ ގާނޫނުހަދާ މަޖިލީހުން ހުކުރު ދުވަހުވަނީ ބޮޑުވަޒީރު ރަޚޮއިއަށް ކެޓަލޯނިއާގެ މައްޗަށް މައިސަރުކާރުން ބާރުހިންގުމުގެ ހުއްދަ ދީފައެވެ. އޭގެ ފަހުން ކެބިނެޓްގެ ކުއްލި ބައްދަލުވުމަކަށްފަހު ރަޚޮއިވަނީ ކެޓަލޯނިއާއަށް ލިބިގެންވާ ބާރުތަކަކީ ކޮބައިކަން ކަނޑައަޅާފައެވެ.
"ރައީސް "ކާލްސް ޕުޖްޑިމޮންޓް" އަށް އެބަ އޮތް ފުރުސަތު ގާނޫނުގެ މަގަށް ރުޖޫއަވެ އަދި އިންތިޚާބަކަށް ގޮވާލުމުގެ" އޭނަ ވިދާޅުވިއެވެ.
ސަރަހައްދީ އިންތިޚާބު ތާވަލު ކުރެވިފައިވަނީ ޑިސެމްބަރު މަހުގެ 21 ވަނަ ދުވަހަށެވެ.
މީގެ އިތުރުން ބޮޑުވަޒީރު ރަޚޮއިވަނީ ކެޓަލޯނިއާގެ ފުލުހުންގެ ވެރިޔާ ވަކިކުރެއްވިކަންވެސް އިއުލާނު ކުރައްވާފައެވެ.
135 މެމްބަރުންގެ މައްޗަށް އެކުލެވޭ ކެޓަލޯނިއާގެ ގާނޫނު ހަދާ މަޖިލީހުގައި ހުކުރު ދުވަހު ނެގި ވޯޓުގައި، 70 މެމްބަރަކު ވަނީ ކެޓަލޯނިއާ އިން މިނިވަންކަން އިއުލާން ކުރަން ފެންނަ ކަމަށް ވޯޓު ދެއްވާފައެވެ. އަދި ގާނޫނު ހަދާ މަޖިލީހުގެ 10 މެމްބަރަކު ވަނީ މިކަމާ ދެކޮޅަށް ވޯޓު ދެއްވާފައެވެ. އަދި ދެ މެމްބަރަކު ވޯޓަށް ހާޒިރުވެވަޑައިނުގަންނަވައެވެ. މީގެއިތުރުން އިދިކޮޅު މެމްބަރުންވަނީ ވޯޓް ބޮއިކޮޓް ކުރައްވާފައެވެ.
