ކެޓަލޯނިއާ އިން މިނިވަންކަން އިއުލާންކޮށްފިނަމަ އެކަން ގަބޫލު ނުކުރާނެ ކަމަށް ފްރާންސް ސަރުކާރުން ބުނެފިއެވެ.
ކެޓަލޯނިއާ ސްޕެއިން އިން ވަކިވެ މިނިވަންކަން އިއުލާން ކުރުމަށް މަސައްކަތް ކުރަމުން އަންނައިރު، ފްރާންސް އިން ކެޓަލޯނިއާގެ މިނިވަންކަން ގަބޫލު ނުކުރާނެ ކަމަށް ބުނެފައިވާއިރު މިއީ ކެޓަލޯނިއާ ޔޫރަޕިއަން ޔޫނިއަން (އީޔޫ) އިން ވަކިވާނެ ކަމެކެވެ.
ކެޓަލޯނިއާގެ މައްްސަލައާއި ގުޅޭ ގޮތުުން ޔޫރަޕިއަން އެފެއާޒް މިނިސްޓަރު ނަތަލި ލުއިޒިއައު ވިދާޅުވެފައި ވަނީ މައްސަލަ ހައްލު ކުރުމަށްޓަކައި ސްޕެއިންގެ މައި ސަރުކާރާ ކެޓަލޯނިއާ އިން މަޝްވަރާ ކުރަން ޖެހޭ ކަމަށެވެ.
ކެޓަލޯނިއާގެ ރައީސް ކާލެސް ޕުއިޖްޑެމޮންޓް، އާންގާރަ ދުވަހު ރީޖަނަލް ޕާލަމަންޓުގައި ކެޓަލޯނިއާގެ މިނިވަންކަން އިއުލާން ކުރައްވަން ވަނީ ހަމަޖެހިފައެވެ. ކެޓަލޯނިއާގެ ހައި ކޯޓުން ސްޕެއިންގެ ފުލުހުންނަށް އަންގާފައި ވަނީ ކެޓަލޯނިއާގެ ގާނޫނު ހަދާ މަޖިލީހުން ކެޓަލޯނިއާގެ މިިނިވަންކަން އިއުލާން ކުރާއިރު ހައި ކޯޓުގެ އިމާރާތުގެ ސަލާމަތި ކަންކަން އިތުރަށް ވަރުގަދަ ކޮށްދިނުމަށެވެ. މިހާރު ހައި ކޯޓުގެ ސަލާމަތީ ކަންކަން ބަލަހައްޓަމުން ގެންދަނީ ލޯކަލް ޕޮލިސް އިންނެވެ.
ކެޓަލޯނިއާގެ މިނިވަންކަން އިއުލާން ކުރަން ފެނޭތޯ ބެލުމަށް ދާދިފަހުން ނެގި ވޯޓުގައި 90 ޕަސެންޓް މީހުން ސްޕެއިން އިން މިިނިވަން ވާން ފެންނަ ކަމަށް އާނ ބަސް ބުނެފައިވެއެވެ. ކެޓަލޯނިއާގައި ނެގި ވޯޓާ ގުޅިގެން ސްްޕެއިންގެ މައި ސަރުކާރުން ބުނެފައި އެ ވޯޓަކީ ގާނޫނު އަސާސީއާ ޚިލާފު ބާތިލް އެއްޗެއް ކަމަށެވެ. ވޯޓް ނިމުނުތާ ކުޑަވަގުތުކޮޅެއްގެ ތެރޭގައި ސްޕެއިންގެ ބޮޑުވަޒީރު މާރިއާނޯ ރަޚޮއި ވިދާޅުވީ ޣައިރު ގާނޫނީ ވޯޓެއްގައި ބައިވެރިކޮށް ކެޓަލޯނިއާގެ ރައްޔިތުން މޮޔަ ހައްދާފައިވާ ކަމަށެވެ. ބޮޑުވަޒީރު ވަނީ އެ ވޯޓަކީ ޑިމްކޮރަސީއަށް ކުރި ފުރައްސާރައެއް ކަމަށް ވިދާޅުވެފައެވެ.
ކެޓަލޯނިއާ، ސްޕެއިން އިން މިނިވަންވުމަށް ފެނޭތޯ ނެގި ވޯޓާއި ގުޅިގެން އެކަމާ ދެކޮޅަށް ސްޕެއިންގެ އެކި ސިޓީތަކަށް އެތައްހާސް ބަޔަކު ނިކުމެ ދަނީ އެއްވުންތައްވެސް ބާއްވަމުންނެވެ.
ސްޕެއިންގެ ކެޓަލޯނިއާ ސަރަހައްދަކީ 7.5 މިލިއަން މީހުންގެ އާބާދީގެ މައްޗަށް އެކުލެވޭ، ސްޕެއިން އަށް މުހިންމު ސަރަހައްދެކެވެ.
