ކެޓަލޯނިއާގެ މިނިވަންކަން: ކެޓަލޯނިއާގެ މިނިވަންކަމާ ދެކޮޅަށް ބާސެލޯނާގައި ބޮޑު އެއްވުމެއް

ކެޓަލޯނިއާ ސްޕެއިންއިން ވަކިވެ މިނިވަން ދައުލަތެއް ގާއިމް ކުރުމާ ދެކޮޅަށް ކެޓަލޯނިއާގެ ވެރިރަށް ބާސެލޯނާގައި މަދުވެގެން 350،000 މީހުން އެއްވެ ހިނގާލުމެއް ބާއްވަފައިއެވެ.

ސްޕެއިން އަދި ކެޓަލޯނިއާގެ ދިދަ ވިހުރުވާފައިވާއިރު އެމީހުންވަނީ "ޓުގެދަރ ވީ އާ ސްޓްރޯންގަރ" އަދި "ކެޓަލޯނިއާ އަކީ ސްޕެއިން"ކަމަށް ޖަހާފައިވާ ބެނާތައް ބޭނުންކޮށްފައެވެ.

މިއީ އޮކްޓޯބަރު މަހުގެ އެއްވަނަ ދުވަހު ބޭއްވުނު ޚިޔާލު ތަފާތުވެފައިވާ, ފެންނަ ނުފެންނަ ވޯޓަށްފަހު ކެޓަލޯނިއާގައި ބޭއްވި މިފަދަ އެންމެ ބޮޑު އެއްވުމެވެ.

ސްޕެއިންގެ ބޮޑުވަޒީރު މަރިއާނޯ ރަހޮއި ވަނީ ކެޓަލޯނިއާ ވަކިވުމަށް ކުރަންޖެހޭ އެއްވެސް ކަމެއް ތަންފީޒު ނުކުރައްވާނެ ކަމަށް ވިދާޅުވެފައެވެ.

މިބާވަތުގެ އެތައް ރެލީތަކެއް ހޮނިހިރު ދުވަހުވަ ސްޕެއިންގެ އެކިކަންކޮޅުތަކުގައިވަނީ ބާއްވާފައެވެ.

އިރުއުތުރުގެ މުއްސަނދި ސަރަހައްދެއްކަމަށްވާ ކެޓަލޯނިއާގައި ނެގުނު ފެންނަ ނުފެންނަ ވޯޓްގެ ރަސްމީ ނަތީޖާ ބުނާގޮތުން 2.3 މިލިއަން މީހުންގެ 90 އިންސައްތަ މީހުންވަނީ މިނިވަން ވަކި ދައުލަތެއް އުފެއްދުމަށް އާނބަސް ބުނެފައެވެ. ވޯޓްލުމަށް ނުކުމެފައިވަނީ 43 އިންސައްތަ މީހުންނެވެ.

ވޯޓްގައި ފުށުއެރުންތައް ހުރިކަމަށްބުނެ އެތައް މައްސަލަތެއް ވަނީ ފެންމަތިވެފައެވެ. އަދި ވޯޓް ލީ ދުވަހު ފުލުހުންވަނީ އެތައް ވޯޓްފޮށިތަކެއް އަތުލައިގެން ގެންގޮސްފައެވެ.

ވޯޓަކީ ޣައިރު ގާނޫނީ ވޯޓެއް ކަމަށް ސްޕެއިންގެ ދުސްތޫރީ ކޯޓުން ކަނޑައެޅުމުން ވޯޓް ނެގިޔަ ނުދިނުމަށް ފުލުހުން ކުރި މަސައްކަތުގައި 900 އެއްހާ މީހުންވަނީ ޒަޚަމްވެފައެވެ.

ފުލުހުންގެ 33 މީހަކުވެސް ވަނީ ޒަޚަމްވެފައެވެ.

އާދީއްތަ ދުވަހު ބާސެލޯނާގައި ބޭއްވި އެއްވުމުގައި 350،000 އެއްހާ މީހުން ބައިވެރިވެފައިވާކަމަށް ފުލުހުން ބުނާއިރު އެއްވުން އިންތިޒާމް ކުރި ފަރާތުން ބުނަނީ އެއްވުމުގައި 950،000 މީހުން ބައިވެރިވެފައިވާކަމަށެވެ.