ކެޓަލޯނިއާގެ ވޯޓް: ވަކި ދައުލަތެއް އުފައްދަން އަޣުލަބިއްޔަތު ތާއީދު
90 އިންސައްތަ މީހުން ވޯޓްލާފައިވަނީ މިނިވަންވުމަށް
90 އިންސައްތަ މީހުން ވޯޓްލާފައި ވަނީ މިނިވަންވުމަށް
ސްޕެއިންއިން ކެޓަލޯނިއާ ވަކިވެ ވަކި ދައުލަތެއް ގާއިމް ކުރުމަށް ފެނޭތޯ ބެލުމަށް ނެގި ވޯޓް ކާމިޔާބުވެއްޖެ ކަމަށް ކެޓަލޯނިއާގެ ލީޑަރު ކާލްސް ޕުޖްޑިމޮންޓް ވިދާޅުވެއްޖެއެވެ.
އޭނާ ވިދާޅުވީ މިނިވަން ވަކި ދައުލަތެއް އިއުލާނު ކުރުމުގެ ދޮރު ހުޅުވިއްޖެ ކަމަށެވެ.
ކެޓަލަންގެ އޮފިޝަލުން ވިދާޅުވީ އާދީއްތަ ދުވަހު ނެގި ފެންނަ ނުފެންނަ ވޯޓްގައި 90 ޕަސެންޓް މީހުން މިނިވަން ވަކި ދައުލަތެއް ގާއިމް ކުރުމަށް ތާއީދުކޮށް ވޯޓް ދީފައިވާ ކަމަށެވެ.
ވޯޓް ލުމަށް ނުކުމެފައި ވަނީ 42.3 ޕަސެންޓް މީހުންެނެވެ.
ސްޕެއިންގެ ދުސްތޫރީ ކޯޓުން މި ވޯޓަކީ ޣައިރުގާނޫނީ ވޯޓެއް ކަމަށް ކަނޑައަޅާފައިވާއިރު ވޯޓް ހުއްޓުވަން ފުލުހުން ބާރުގެ ބޭނުން ކުރުުމުން އެތައް ސަތޭކަ މީހުން ވަނީ ޒަޚަމްވެފައެވެ.
ފުލުހުންވަނީ ވޯޓް ކަރުދާހާ ވޯޓްލާ މަރުކަޒުތަކުގައި ހުރި ވޯޓް ފޮށިތައް ވެސް ދަމައިގެންފައެވެ.
"ދަތިކަން ތަހައްމަލް ކުރަންޖެހުނު އަދި އުއްމީދުގެ މި ދުވަހު ކެޓަލޯނިއާގެ ރައްޔިތުން ވަނީ ޖުމްހޫރީ ދައުލަތެއްގެ ގޮތުގައި މިނިވަން ދައުލަތެއް ގާއިމް ކުރުމުގެ ހައްގު ލިބިގެންފަ" ކެޓަލޯނިއާގެ އިތުރު ލީޑަރުންނާ ވެސް އެކުގައި ހުންނަވައި ޓީވީ މެެދެވެރިކޮށް ދެއްވި ތަގުރީރެއްގައި ޕުޖްމޮންޓް ވިދާޅުވިއެވެ.
އޭނާ ވިދާޅުވީ ކުރިޔަށް އޮތް ކުޑަ ދުވަސްކޮޅެއްގެ ތެރޭގައި މި ވޯޓްގެ ނަތީޖާ ކެޓަލޯނިއާގެ ޤާނޫނުހަދާ މަޖިލީހަށް ފޮނުވާނެ ކަމަށާއި އޭރުން ފެންނަ ނުފެންނަ ވޯޓުން ކަނޑައެޅި ނަތީޖާއާ އެއްގަޮތަށް ގާނޫނީ ގޮތުން މަސައްކަތްކުރެވޭނެ ކަމަށެވެ.
ވޯޓް ނިމުނުތާ ކުޑަވަގުތުކޮޅެއްގެ ތެރޭގައި ސްޕެއިންގެ ބޮޑުވަޒީރު މާރިއާނޯ ރަޚޮއި ވިދާޅުވީ ޣައިރު ގާނޫނީ ވޯޓެއްގައި ބައިވެރިކޮށް ކެޓަލޯނިއާގެ ރައްޔިތުން މޮޔަ ހައްދާފައިވާ ކަމަށެވެ.
ބޮޑުވަޒީރު ވަނީ އެ ވޯޓަކީ ޑިމްކޮރަސީއަށް ކުރި ފުރައްސާރައެއް ކަމަށް ވިދާޅުވެފައެވެ.
މިނިވަންކަމަށް ތާއީދުކުރި ފަރާތްތަކުން ވަނީ ކެޓަލޯނިއާގެ ވެރިރަށް ބާސެލޯނާގެ މެދުތެރެއަށް އާދީއްތަ ދުވަހު ހަވީރު އެއްވެ ދިދަ ވިހުރުވައި ކެޓަލޯނިއާގެ ގައުމީ ސަލާން ކިޔާފައެވެ.
މިނިވަންކަމާ ދެކޮޅު ފަރާތްތަކުން ވެސް ވަނީ ބާސެލޯނާއާ ސްޕެއިިންގެ އެހެން ސިޓީތަކުގައި ވެސް އެއްވުއްތައް ބާއްވާފައެވެ.
