ރައްޔިތުންނަށް އިހުމާލުވެފައިވާކަމަށް ބުނެ ކެޓަލޯނިއާގެ ލީޑަރު ރަސްގެފާނަށް ފާޑުވިދާޅުވެއްޖެ
ފެންނަ ނުފެންނަ ވޯޓްގައި 90 ޕަސެންޓް މީހުން މިނިވަން ވަކި ދައުލަތެއް ގާއިމް ކުރުމަށް ތާއީދުކުރި
ރަސްގެފާނު ފެލިއްޕޭ ހަވަނަ(ކ) އަދި ކެޓަލޯނިއާގެ ލީޑަރު ކާލްސް ޕުޖްޑިމޮންޓް
އެތައް މިލިއަން މީހުންނާމެދު ގަސްތުގައި އިހުމާލުވި ކަމަށް" ވިދާޅުވެ ސްޕެއިންގެ ރަސްގެފާނު ފެލިޕޭ ހަވަނަ އަށް ކެޓަލޯނިއާގެ ލީޑަރު ކާލްސް ޕުޖްޑިމޮންޓް ފާޑު ވިދާޅުވެއްޖެއެވެ.
ޓީވީ މެދުވެރިކޮށް ދެއްވި ތަގުރީރެއްގައި ޕުޖްޑިމޮންޓް ވަނީ ސްޕެއިން ސަރުކާރުގެ ނިންމުން ރަސްގެފާނު ބަލައިގެންފައިވާ ކަމަށް ތުހުމަތު ކުރައްވާފައެވެ.
" މި ދަނޑިވަޅު ގޮވަނީ މެދުވެރިއަކަށް" އޭނާ ވިދާޅުވިއެވެ. އޭނާ ވަނީ ކެޓަލޯނިއާއަށް އަންނަ ހަފްތާގައި މިނިވަންކަން އިއުލާނު ކުރެވޭނެކަމުގެ އިޝާރާތެއް ދެއްވާފައެވެ.
އަންގާރަ ދުވަހު ޓީވީ މެދުވެރިކޮށް ގައުމާ މުޚާތަބް ކުރައްވާ ރަސްގެފާނު ފެލިޕޭ ވަނީ އާދީއްތަ ދުވަހު ކެޓަލޯނިއާގައި ނެގި ފެންނަ ނުފެންނަ ވޯޓަކީ ޣައިރު ގާނޫނީ އަދި ޑިމޮކްރެސީއާ ބީރަށްޓެހި ވޯޓެއްކަމަށް ވިދާޅުވެފައެވެ.
އޭގެ ސައުވީސް ގަޑިއިރު ފަހުން ޕުޖްޑިމޮންޓް ވަނީ ގާނޫނު އަސާސީން ރަސްގެފާނާ މަތިކޮށްފައިވާ ގޮތުގެ މަތިން މެދުވެރިއެއްގެ ދައުރު އަދާކުރެއްވުމަށް އެ މަނިކުފާނު ދެކޮޅު ހައްދަވާފައިވާ ކަމަށް ތުހުމަތު ކުރައްވާފައެވެ.
ކެޓަލޯނިއާގެ ލީޑަރަށް ރައްދު ދެއްވަމުން މެޑްރިޑްގެ ސަރުކާރުން ބުނެފައިވަނީ "ބްލެކް މެއިލް"ކުރުން ބަލައި ނުގަނެވޭނެ ކަމަށެވެ.
އެއްވެސް މަޝްވަރާއެއް ކުރުމުގެ ކުރިން ގާނޫނުގެ މަގަށް ޕުޖްޑިމޮންޓް ރުޖޫއަ ވެ ވަޑައިގަންނަވަން ޖެހިވަޑައިގަންނަވާނެ ކަމަށް ސްޕެއިން ސަރުކާރުން ނެރުނު ބަޔާނުގައިވެއެވެ.
ރަސްގެފާނަށް އޭނާ ފާޑުކިއުމުން ދައްކުވައި ދެނީ"ހަގީގަތާ ދުރުގައި އޭނާ ހުންނެވި ވަރު"ކަމަށް ބަޔާނުގައި ބުނެފައިވެއެވެ.
އަންގާރަ ދުވަހު ބީބީސިއަށް ދެއްވި އިންޓަވިއުއެއްގައި ޕުޖްޑިމޮންޓް ވަނީ "މި ހަފްތާ ނިމޭއިރު ނޫނީ އަންނަ ހަފާތާގެ ކުރީކޮޅު"މިނިވަންކަން އިއުލާނު ކުރެވޭނެ ކަމަށް ވިދާޅުވެފައެވެ.
ކެޓަލޯނިއާގެ ސަރުކާރުންވަނީ ފެންނަ ނުފެންނަ ވޯޓުން ނުކުތް ނަތީޖާއާމެދު މަޝްވަރާކުރުމަށް ގާނޫނުހަދާ މަޖިލީހުގެ ޚާއްސަ ބައްދަލުވުމެއް އޮންނާނެ ކަމަށް ބުނެފައެވެ.
ކެޓަލަންގެ އޮފިޝަލުން ވިދާޅުވީ އާދީއްތަ ދުވަހު ނެގި ފެންނަ ނުފެންނަ ވޯޓްގައި 90 ޕަސެންޓް މީހުން މިނިވަން ވަކި ދައުލަތެއް ގާއިމް ކުރުމަށް ތާއީދުކޮށް ވޯޓް ދީފައިވާ ކަމަށެވެ.
ވޯޓް ލުމަށް ނުކުމެފައި ވަނީ 42.3 ޕަސެންޓް މީހުންެނެވެ.
ސްޕެއިންގެ ދުސްތޫރީ ކޯޓުން މި ވޯޓަކީ ޣައިރުގާނޫނީ ވޯޓެއް ކަމަށް ކަނޑައަޅާފައިވާއިރު ވޯޓް ހުއްޓުވަން ފުލުހުން ބާރުގެ ބޭނުން ކުރުުމުން އެތައް ސަތޭކަ މީހުން ވަނީ ޒަޚަމްވެފައެވެ.
ފުލުހުންވަނީ ވޯޓް ކަރުދާހާ ވޯޓްލާ މަރުކަޒުތަކުގައި ހުރި ވޯޓް ފޮށިތައް ވެސް ދަމައިގެންފައެވެ.
