ކެޓަލޯނިއާގެ މިނިވަން ދަޢުލަތެއް އުފެއްދުމަށް ނެގި ފެންނަ ނުފެންނަ ވޯޓުގެ ނަތީޖާ އަށްފަހު، ކެޓަލޯނިއާގެ ސަރަޙައްދީ ޕާލިމަންޓްގައި އެކަމާއިމެދު ގޮތެއް ނިންމުން ފަސްކޮށްފި އެވެ.

އެމައްސަލާގައި އަންގާރަ ދުވަހުގެރޭ ބޭއްވި ޖަލްސާގައި ވާހަކަ ދައްކަވަމުން ކެޓަލޯނިއާގެ ސަރަހައްދީ ސަރުކާރުގެ ރައީސް ކާލްސް ޕުއިޖްޑެމޮން ވިދާޅުވީ، ކެޓަލޯނިއާގެ ރައްޔިތުން ނިންމީ ސްޕެއިންގެ މައި ސަރުކާރުގެ ކިބައިން މިނިވަންވާން ކަމަށާއި، އެހެންނަމަވެސް އޭނާ ބޭނުންވަނީ ސްޕެއިންގެ މައި ސަރުކާރާއެކު މަޝްވަރާކޮށް، އެމައްސަލައަށް ސުލްހަވެރި ހައްލެއް ގެނައުމަށް ކަމަށެވެ.

އަދި މަޝްވަރާތަކަށް ވަގުތު ދިނުމުގެ ގޮތުން، އެކަމާއި މެދު ގޮތެއް ނިންމުން ފަސްކޮށްދިނުމަށް ކެޓަލޯނިއާގެ ސަރަޙައްދީ ޤާނޫނު ހަދާ މަޖިލީހުގެ މެމްބަރުންގެ ކިބައިން އޭނާ އެދިވަޑައިގެންނެވި އެވެ.

ކެޓަލޯނިއާގެ މިނިވަންކަމާއިމެދު އޮކްޓޯބަރު މަހުގެ އެއްވަނަ ދުވަހު ނެގި ފެންނަ ނުފެންނަ ވޯޓުގައި ބައިވެރިވި މީހުންގެ 90 އިންސައްތަ މިނިވަންކަމަށް ތާއީދުކޮށްފައިވާ ކަމަށް ކެޓަލޯނިއާގެ ސަރަހައްދީ ސަރުކާރުން ބުނެ އެވެ.

އެހެންނަމަވެސް ސްޕެއިންގެ މައި ސަރުކާރުން އެވޯޓަކީ ސައްހަ ވޯޓެއް ކަމަށް ގަބޫލެއް ނުކުރެއެވެ. މީގެ އިތުރުން ސްޕެއިންގެ ދުސްތޫރީ ކޯޓުން ވަނީ އެވޯޓު ސަސްޕެންޑް ކުރުމަށް އަމުރުކޮށްފަ އެވެ.

ސްޕެއިންގެ މައި ސަރުކާރުން ކެޓަލޯނިއާ ވަކިވުމަށް ތާއީދު ނުކުރާ ކެޓަލޯނިއާގެ ރައްޔިތުން ބޯއިކޮޓް ކުރި މި ވޯޓުގައި ބައިވެރިވެފައިވަނީ ވޯޓު ލުމުގެ ހައްގު ލިބިފައިވާ މީހުންގެ 43 ސައްތަ އެވެ. އަދި ވޯޓުގައި ހަމަނުޖެހޭ ކަންކަން ހުރި ކަމަށް ބައެއް ފަރާތްތަކުން ރިޕޯޓް ކުރެއެވެ.

މިވޯޓާއި ގުޅިގެން ގިނަ ބަޔަކު ކެޓަލޯނިއާގެ ވެރިރަށް ބާސެލޯނާގެ މަގުތަކަށް ނިކުމެ އިހްތިޖާޖް ކުރިއިރު، ވޯޓު ލީ ދުވަހު ސްޕެއިންގެ ފުލުހުން ނިކުމެ ވޯޓަށް ހުރަސް އެޅުމަށް ވޯޓުލާ ބައެއް މަރުކަޒުތައް ބަންދުކޮށްފައިވެއެވެ. މީގެ އިތުރުން އިހްތިޖާޖަށް ނިކުތް އާއްމުންނާއި ފުލުހުން ކުރިމަތިލައި، ބައެއް މީހުން ހައްޔަރުކޮށް، ބައެއް ފަރާތްތަކަށް އެކި ވަރުގެ އަނިޔާ ލިބިފައިވެއެވެ.

އަންގާރަ ދުވަހުގެރޭ ބޭއްވި ކެޓަލަން ޕާލިމަންޓްގެ ބައްދަލުވުމުގައި ޕުއިޖްޑެމޮން ވިދާޅުވީ، ކެޓަލޯނިއާގެ ރައްޔިތުންގެ ނިންމުމަކީ މެޑްރިޑްގެ ސަރުކާރުގެ ކިބައިން މިނިވަންވުން ކަމަށާއި، އެހެންނަމަވެސް މިމައްސަލާގެ ސަބަބުން ހޫނުވެފައިވާ މަޝްރަޚް ފިނިކުރުމަށް ބޭނުންވާ ކަމަށެވެ.

މީގެ އިތުރުން އޭނާ ވަނީ ކެޓަލޯނިއާގެ މިނިވަން ކަމަށް ކުރާ މަސައްކަތަށް ތާއީދުކޮށް، އެކަމާއި ދެކޮޅަށް ސްޕެއިންގެ މައި ސަރުކާރުގެ އަމަލުތައް ބެހެއްޓި ގޮތް ކުށްވެރި ކުރައްވާފައެވެ، އަދި މިމައްސަލާގައި ދެން ވާނެ ގޮތަކާއި މެދު ކެޓަލޯނިއާގެ ރައްޔިތުންނާއި ސްޕެއިންގެ ރައްޔިތުންގެ ކަންބޮޑުވުންތަކެއް ހުރިކަމަށް ގަބޫލް ކުރައްވާ ކަމަށް އޭނާ ވިދާޅުވި އެވެ.

އޭނާ ވިދާޅުވީ ކެޓަލޯނިއާ އަކީވެސް މުޖުތަމައުގެ އެއް ބައެއް ކަމަށާއި، އެންމެން އެކުގައި ކުރިއަށް ދާން ޖެހޭ ކަމަށެވެ. އަދި ކުރިއަށް ދެވޭނެ ހަމައެކަނި މަގަކީ ޑިމޮކްރެސީ އަދި ސުލްހައިގެ މަގު ކަމަށް އޭނާ ވިދާޅުވި އެވެ.

ކެޓަލޯނިއާގެ ޕާލިމަންޓްގެ ބައްދަލުވުން ކުރިއަށް ދިޔައިރު، ސްޕެއިންގެ ފުލުހުން ވަނީ އެސަރަހައްދު އާއްމުންނަށް ނުވަދެވޭ ގޮތަށް ބަންދުކޮށްފައެވެ. ޕާލިމަންޓްގެ ބައްދަލުވުން ކުރިއަށް ދިޔައިރު، މިނިވަން ކަމަށް ތާޢީދު ކުރާ އެތައް ބަޔަކު ވަނީ ބާސެލޯނާގައި މުޒާހަރާކޮށްފައެވެ.