މި އަހަރުގެ ބެލޮންޑޯ އެވޯޑުގެ ފޭވަރިޓަކީ ރެއާލް މެޑްރިޑުގެ ޕޯޗުގަލް ތަރި ކްރިސްޓިއާނޯ ރޮނާލްޑޯ ކަމަށް  ބްރެޒިލް އާއި ޕީއެސްޖީގެ ތަރި ނޭމާ ބުނެފި އެވެ.

ރޮނާލްޑޯ ވަނީ މިދިޔަ އަހަރުގެ ސްޕެނިޝް ލީގާއި ޔޫއެފާ ޗެމްޕިއަންސް ލީގު ރެއާލް މެޑްރިޑަށް ހޯދައިދިނުމުގައި މުހިންމު ދައުރެއް އަދާކޮށްފައެވެ. އެހެން ކަމުން ނޭމާ ބުނީ ބެލޮންޑޯ އެވޯޑް ދިނުމުގައި ބަލާ ހުރިހާ ޝަރުތެއްވެސް ރޮނާލްޑޯގެ ކިބައިގައި ފުރިހަމައަށް އެބަހުރިކަމަށެވެ.

"ބެލޮންޑޯ އެވޯޑު ދިނުމުގައި މުބާރާތްތަކުން ހޯދާ ކާމިޔާބަކީ ބޮޑު ބައެއް އަދާކުރާ އެއްޗެއް. ރޮނާލްޑޯ ވަނީ ޗެމްޕިއަންސް ލީގާއި ސްޕެނިޝް ލީގުވެސް ކާމިޔާބުކޮށްފައި. އެހެންވީމަ އޭނާ އެ ހުރީ ރަނގަޅު ހިސާބެއްގައި. އެއްވެސް ޝައްކެއްނެތް ގޮތުގައި ރޮނާލްޑޯ އަކީ މޮޅު ކުޅުންތެރިއެއް،" ބްރެޒިލްގެ ނޫހެއް ކަމަށްވާ ލޭންސް އަށް ދިން އިންޓަވިއުއެއްގައި ނޭމާ ބުންޏެވެ.

މިދިޔަ އަހަރުގެ ބެލޮންޑޯ އެވޯޑުވެސް ރޮނާލްޑޯ އަށް ލިބުނު އިރު، ނޭމާ އަށް ތިންވަނާގައިވެސް ހިމެނިފައެއް ނުވެއެވެ. އެހެން ނަމަވެސް ދެވަނަ ލިބިފައިވަނީ ބާސާގެ އާޖެންޓީނާ ތަރި ލިއޮނެލް މެސީ އެވެ.

ނިމިގެންދިޔަ އަހަރު މެސީ އާއި ނޭމާ އަށް ލިބުނު އެންމެ ބޮޑު ކާމިޔާބަކީ ބާސާއާ އެކު ހޯދި ސްޕެނިޝް ކަޕެވެ. އިތުރު އެއްވެސް ކާމިޔާބީއެއް ހޯދިފައެއް ނުވެއެވެ.

ދެހާސް އަށްވަނަ އަހަރުން ފެށިގެން ބެލޮންޑޯ އެވޯޑު ހޯދަމުންދިޔައީ މެސީ ނުވަތަ ރޮނާލްޑޯ އެވެ. ރޮނާލްޑޯ 2008، 2013 އަދި 2014 އަދި 2016ގެ ބެލޮންޑޯ އެވޯޑު ގެންދިޔަ އިރު، މެސީ އެ އެވޯޑު ގެންގޮސްފައި ވަނީ 2009، 2010، 2011، 2012 އަދި 2015 ވަނަ އަހަރު އެވެ.

ދުނިޔޭގެ ގިނަބަޔަކު ޔަގީން ކުރާގޮތުން މިފަހަރުގެ ބެލޮންޑޯ އެވޯޑް ލިބުން އެނެމް ހައްޤު ކުޅުންތެރިއަކީ ކްރިސްޓިއާނޯ ރޮނާލްޑޯއެވެ.