ރޮނާލްޑޯ އާއި ބެންޒެމާ ވެސް ސްޕޯޓިން މެޗަށް ދަތުރުނުކުރާނެ
14 އެޕްރީލު 2017 | ހުކުރު 23:38ރެއާލް އޮތީ ތިން ޕޮއިންޓްގެ ލީޑަކާ އެކު ޕޮއިންޓް ތާވަލުގެ އެއްވަނައިގައި
ރެއާލްގެ ކުރިޔަށް ކުޅޭ ރޮނާލްޑޯ (ކ) އާއި ބެންޒެމާ (ވ)
ރެއާލް މެޑްރިޑްގެ ކުރިއަށް ކުޅޭ ކްރިސްޓިއާނޯ ރޮނާލްޑޯ އާއި ކަރިމް ބެންޒެމާވެސް ސްޕެނިޝް ލީގުގައި އެޓީމު ސްޕޯޓިންއާ ދެކޮޅަށް ނިކުންނަ މެޗަށް ދަތުރުނުކުރާނެކަން ކަށަވަރުވެއްޖެއެވެ.
ޔުއެފާ ޗެމްޕިއަންސް ލީގުގައި އަންނަ އަންގާރަ ދުވަހު ބަޔާން މިއުނިކްއާ ދެކޮޅަށް ކުޅޭ މެޗަށް އަމާޒުކޮށް ރޮނާލްޑޯ އަދި ބެންޒެމާއަށް ރެސްޓް ދީފައިވާއިރު، އެއް ނަމްބަރު ކީޕަރު ކޭލޯ ނަވާސް އަށްވެސް ވަނީ ރެސްޓު ދީފައެވެ. މީގެއިތުރުންވެސް ގިނަ ކުޅުންތެރިންނަށް ތަފާތު ސަބަބުތަކާއެކު އެ މެޗުގައި ނުކުޅެވޭނެއެވެ.
އެގޮތުން ބަޔާންއާ ދެކޮޅަށް ފުރަތަމަ ލެގުގައި މިދިޔަ ބުދަ ދުވަހު ކުޅުނު މެޗުގައި އަނިޔާވި ގެރެތް ބޭލް އާއި ސަސްޕެންޝަންގައި ހުރި ޑެނިއަލް ކަވަހާލް އަށް މެޗުގައި ނުކުޅެވޭނެއެވެ. އަދި މިވަގުތު އަނިޔާގައި ތިބި ޕެޕޭ އަދި ރަފައެލް ވަރާންވެސް މެޗުން ނުފެންނާނެއެވެ.
ސްޕެނިޝް ލީގުގައި ރެއާލް ތިން ޕޮއިންޓްގެ ލީޑަކާއެކު ޕޮއިންޓް ތާވަލުގެ އެއްވަނައިގައި އޮތް އިރު، ސްޕޯޓިން މެޗަކީ ލީގުގައި ކުރިޔަށްދިޔުމަށް އެޓީމަށް ތިން ޕޮއިންޓް ހޯދުން މުހިންމު މެޗެކެވެ. ރެއާލްގެ ފަހަތުން ތާވަލުގެ ދެވަނައިގައި އޮތް ބާސާ ނިކުންނާނީ އަމިއްލަ ދަނޑުގައި ރެއާލް ސޮސައިޑާޑްއާ ދެކޮޅަށެވެ.
ސްޕޯޓިންއާ ދެކޮޅަށް ކުޅުމަށް ހަމަޖެހިފައިވާ 18 ރެއާލްގެ ސްކޮޑުގައި ހިމެނެނީ ކަސިލާ، ޔެނޭޒް، ރާމޮސް، ނެކޯ، މާސެލޯ، ކޮންޓްރާއޯ، ޑެނީލޯ، ޓެހީރޯ، ކްރޫޒް، ހަމޭސް، ކަސްމީރޯ، ކޮވަސިޗް، މޮޑްރިޗް، އެސެންސިއޯ، އިސްކޯ، ވަޒްކޭޒް، މަރީނޯ އަދި މޮރާޓާ އެވެ.
