ރޮނާލްޑޯ އަދީ ބޭލް ނެތި ރެއާލް އަށް ފަސޭހަ މޮޅެށް

މުހިންމު ގިނަ ކުޅުންތެރިންތަކެށް ނުހިމަނައި ކުޅުނު މެޗުން ރެއާލް މެޑްރިޑުން ލެގަނޭސްގެ މައްޗަށް ކުރިހޯދައި ތާވަލުގެ އެއްވަނަ މަގާމު ދަމަހައްޓައިފި.

އަމިއްލަ ދަނޑުގައި ކުޅެމުންދިޔަ ލެގަނޭސްގެ މައްޗަށް ރެއާލުން ކުރިހޯދީ 4-2 ގެ ނަތީޖާއަކުންނެވެ. ރެއާލުން މެޗަށް ނިކުމެފައިވަނީ އެޓީމުގެ މުހިންމު ގިނަ ކުޅުންތެރިންތަކެއް ޓީމުގައި ނުހިމަނަ އެވެ. އެގޮތުން ރޮނާލްޑޯ އަދި ބޭލްގެ އިތުރުން ޓޯނީ ކްރޫސް އަދި ވެރާނޭއަށްވެސް ރޭގެ މެޗުން ފުރުސަތު ދީފައެށް ނުވެ އެވެ. މެޗުގެ ކުރިން ވާހަކަ ދައްކަމުން ރެއާލްގެ ކޯޗް ޒިދާން ބުނެފައިވަނީ އެ ކުޅުންތެރިންނަށް ސްކޮޑުން ޖާގަ ނުދިނީ ކުރިއަށް ހުރި މެޗުތަކަށް ތައްޔާރުވުމައްޓަކާ އަރާމުކުރުމަށް ވަގުތު ދިނުމުގެ ގޮތުން ކަމަށެވެ. ސްކޮޑުން ޖާގަ ނުލިބުނު ވެރާނޭ މިވަގުތު ހުރީ އަނިޔާގެ ސަބަބުން ކުޅުމާއި ދުރުގަ އެވެ.

މެޗުގެ ވަރަށް ކުރީކޮޅުގައި ރެއާލުން ވަނީ ލެގަނޭސްގެ މައްޗަށް ލީޑު ނަގާފަ އެވެ. މެޗުގެ 14 ވަނަ މިނެޓުގައި މި ލަނޑު އެޓީމަށް ކާމިޔާބުކޮއްދިނީ ޖޭމްސް ރޮޑްރިގޭސް އެވެ. ލެގަނޭސްގެ ހާފުގެ މެދެއްހާ ހިސާބުން އަސެންސިއޯ 3 ކުޅުންތެރިން ކައިރިން ނައްޓާލުމައްފަހު އޭރިއާގެ ތެރެއިން ހުރަސްކޮއްލި ބޯޅަ ޖޭމްސް ގޯލުގެ ތެރެއަށް ފޮނުވާލީ ކީޕަރުގެ އަތް ކައިރިންނެވެ.

އޭގެ ތިން މިނެޓު ފަހުން ރެއާލުން ވަނީ އަނެއްކާވެސް ލަނޑެށް ކާމިޔާބުކޮށް ލީޑު ފުޅާކޮއްފަ އެވެ. މިލަނޑު އެޓީމަށް ކާމިޔާބުކޮއްދިނީ މެޗުގައި މޮޅު ކުޅުމެށް ދެއްކި އަލްވާރޯ މޮރާޓާ އެވެ. މޮރާޓާ މި ލަނޑު ކާމިޔާބުކޮއްފައިވަނީ ލިބުނު ކޯނަރެށް ބޮލުން ގޯލުގެ ތެރެއަށް ފޮނުވާލައިގެންނެވެ.

މެޗުގެ 23 ވަނަ މިނެޓުގައި މޮރާޓާ ވަނީ އަނެއްކާވެސް ލަނޑެށް ކާމިޔާބުކޮށް ރެއާލްގެ ލީޑު އިތުރަށް ފުޅާ ކޮއްދީފަ އެވެ. ޑިފެންސް ލައިން ފޫއަޅުވާލުމައްފަހު މޮރާޓާ ފޮނުވާލި ބޯޅަ އަމާޒުވީ ސީދާ ގޯލުގެ މަތީ ކަނަށެވެ. ލެގަނޭސްއިން ވަނީ ފުރަތަމަ ހާފު ނިމުމުގެ ކުރިން ފުލުފުލުގައި ދެލަނޑު ކާމިޔާބުކޮށް ރެއާލްގެ ލީޑު ކޮޑަކޮއްފައެވެ. ފުރަތަމަ ލަނޑު 31 ވަނަ މިނެޓުގައި ރެއާލްގެ ޑިފެންސް ލައިނުން ހެދުނު ގޯހެއްގެ ބޭނުންހިފައި މި ލަނޑު އެޓީމަށް ކާމިޔާބުކޮއްދިނީ ގަބްރިއެލް ޕިރޭސް އެވެ. އޭގެ ދެމިނެޓު ފަހުން އެޓީމުގެ ދެވަނަ ލަނޑު ކާމިޔާބުކޮއްދިނީ ލިބުނު ކޯނަރަކުން ލުކިއާނޯ ނަވާސް އެވެ.

ރެއާލުން ދެވަނަ ހާފު ފެށީ ކުޅުން އިތުރަށް ވަރުގަދަ ކޮއްދެންނެވެ. ދެވަނަ ހާފު ފެށިތާ ކުޑަ އިރުކޮޅެށް ނުވަނީސް މޮރާޓާ ވަނީ ރެއާލްއަށް 4 ވަނަ ލަނޑު ކާމިޔާބުކޮއްދީ ހެޓްރިކު ހަދާފަ އެވެ. ރެއާލަށް ލިބުނު ހިލޭޖެހުމެށް ޖޭމްސް ރޮޑްރިގޭސް އޭރިއާގެ ތެރެއަށް ހުރަސް ކޮއްލުމުން މޮރާޓާ ވަނީ ބޮލުން އެ ބޯޅަ ގޯލުގެ ތެރެއަށް ފޮނުވާލާފަ އެވެ.

މެޗުން ލިބުނު 3 ޕޮއިންޓާއެކު ރެއާލުން ވަނީ ލީގު ތާވަލުގެ އެއްވަނަ ދަމަހައްޓައިފަ އެވެ. ރެއާލުން އެއްވަނާގައި އޮތީ ކުޅުނު 29 މެޗުން 71 ޕޮއިންޓް ހޯދައިގެންނެވެ. ދެވަނާގައި ބާސެލޯނާ އޮތީ ރެއާލައްވުރެ 1 މެޗު އިތުރަށް ކުޅެ 69 ޕޮއިންޓް ހޯދައިގެންނެވެ. ތިންވަނާގައި އެތްލެޓިކޯ މެޑްރިޑު އޮތީ ކުޅުނު 30 މެޗުން 61 ޕޮއިންޓް ހޯދައިގެންނެވެ.