ރޮނާލްޑޯ އަދި ބޭލް، ލެގަނޭސް އާ ދެކޮޅަށް ކުޅޭ މެޗްގައި ނުކުޅޭނެ:ޒިދާން

ސްޕެނިޝް ލީގުގައި ބުރާސްފަތި ދުވަހު ރެއާލް މެޑްރިޑް ލެގްނޭސް އާއި ދެކޮޅަށް ކުޅޭ މެޗުގައި އެ ޓީމުގެ މުހިންމު ދެ ކުޅުންތެރިން ކަމަށްވާ ގެރެތް ބޭލް އާއި ކްރިސްޓިއާނޯ ރޮނާލްޑޯ ނުކުޅޭނެ ކަމަށް އެ ކްލަބުން ބުނެފިއެވެ.

ބުރާސްފަތި ދުވަހުގެ މެޗަށް ރެއާލް މެޑްރިޑުން ނެރުނު ސްކޮޑުގައި ބޭލް އާއި ރޮނަލްޑޯގެ އިތުރުން އެޓީމުގެ މުހިންމު ކުޅުންތެރިއެއް ކަމަށްވާ ޓޯނީ ކްރޫސް އަށް ވެސް ފުރުސަތު ދީފައެއް ނުވެ އެވެ. މިކަމާ ގުޅިގެން ރެއާލް މެޑްރިޑްގެ ކޯޗް ޒިނެދިން ޒިދާން ބުނެފައިވަނީ ބޭލް އާއި ރޮނާލްޑޯއަށް ފުރުސަތު ނުދިނީ އެ ދެކުޅުންތެރިންނަށް އަރާމުކުރުމަށް ވަގުތު ދިނުމުގެ ގޮތުން ކަމަށެވެ. ބެލެވޭ ގޮތުގައި ދެ ކުޅުންތެރިންނަށް އަރާމުކުރުމަށް ވަގުތު ދީފައި މިވަނީ ހަފްތާ ބަންދުގައި އެތްލެޓިކޯ މެޑްރިޑާ ދެކޮޅަށް ކުޅޭ މެޗާ، ޗެމްޕިއަންސް ލީގުގައި ބަޔާން މިއުނިކާ ދެކޮޅަށް ކުޅޭ މެޗަށް ތައްޔާރު ވުމުގެ ގޮތުންނެވެ.

ލެގަނޭސް އާއި ދެކޮޅަށް ކުޅޭ މެޗުން ރެއާލްއަށް ތިން ޕޮއިންޓު ހޯދުން މުހިންމު ވާއިރު، އެ ޓީމުގެ މުހިންމު ކުޅުންތެރިއެއް ކަމަށްވާ ވެރާނޭ އަށްވެސް އެ މެޗު ނުކުޅެވޭނެ އެވެ. އަނިޔާގެ ސަބަބުން ވެރާނޭ މި ވަގުތު ހުރީ ކުޅުމާއި ދުރުގަ އެވެ.

މުހިންމު ކުޅުންތެރިންތަކެއް ނުހިމަނާ ބުރާސްފަތި ދުވަހުގެ މެޗަށް ރެއާލުން ނިކުންނަ އިރު ލީގު ތާވަލުގެ އެއްވަނާގައި މިވަގުތު ރެއާލް އޮތީ ކުޅުނު 28 މެޗުން 68 ޕޮއިންޓް ހޯދައިގެންނެވެ. ރެއާލްއަށް ވުރެ 2 ޕޮއިންޓު މަދުން ހޯދައިގެން ދެވަނައިގައި އޮތީ ބާސެލޯނާ އެވެ. ބާސާއަށް ކުޅުނު 27 މެޗުން ލިބިފައިވަނީ 66 ޕޮއިންޓެވެ. ތިންވަނައިގައި އޮތީ ހަފްތާ ބަނދުގައި ރެއާލްއާ ދެކޮޅަށް ނިކުންނަ އެތްލެޓިކޯ މެޑްރިޑެވެ. އެޓީމަށް ކުޅުނު 30 މެޗުން ލިބިފައިވަނީ 61 ޕޮއިންޓެވެ.