ފައިސަލް ޕްރައިމަރީއަށް ނުކުންނެވީ މަޝްވަރާކޮށް އަޅުގަނޑުގެ ތާއީދާއެކު: ރައީސް ސޯލިޙް
22 ނޮވެމްބަރު 2026 | އާދީއްތަ 20:12އެމްޑީޕީގެ ރިޔާސީ ޕްރައިމަރީގައި ވާދަކުރައްވާނެކަން ކުރީގެ ނައިބު ރައީސް ފައިސަލް ނަސީމް އިއުލާން ކުރެއްވީ އެމަނިކުފާނާ މަޝްވަރާކުރެއްވުމަށްފަހު، އެމަނިކުފާނުގެ ތާއީދާއެކު ކަމަށް ކުރީގެ ރައީސް އިބްރާހީމް މުޙައްމަދު ސޯލިޙް ވިދާޅުވެއްޖެ. ރިޔާސީ ޕްރައިމަރީގައި ވާދަކުރައްވާނެކަން މިހާތަނަށް އިއުލާން ކުރައްވާފައިވަނީ އެމްޑީޕީގެ ކުރީގެ ރައީސް އަބްދުالله ޝާހިދުގެ އިތުރުން އެ ޕާޓީގެ ކުރީގެ ޗެއަރޕާސަން ފައްޔާޒް އިސްމާއިލް


އެމްޑީޕީގެ ޤައުމީ މަޖިލީހުގެ އިންތިޚާބުގައި "ޓީމު އެމްޑީޕީ" ގެ ނަމުގައި ވާދަކުރައްވާ ކެންޑިޑޭޓުންނާއެކު އާދިއްތަ ދުވަހުގެރޭ ހުޅުމާލޭގައި ބޭއްވި ބައްދަލުވުމުގައި ރައީސް ސޯލިޙް، ފައިސަލް ނަސީމު އަދި އާދަމް އާޒިމް | ފައިސަލް - އާޒިމް ކެމްޕެއިން ޓީމް
ކުރިއަށް އޮތް ރިޔާސީ ޕްރައިމަރީއަށް ވާދަކުރެއްވުމަށް ފައިސަލް ނަސީމް ނިންމަވާފައިވަނީ މަޝްވަރާކުރެއްވުމަށްފަހު، އެމަނިކުފާނުގެ ތާއީދާއެކު ކަމަށް ކުރީގެ ރައީސް އިބްރާހީމް މުޙައްމަދު ސޯލިޙް ވިދާޅުވެއްޖެ އެވެ.
ރައީސް ސޯލިޙް މިހެން ވިދާޅުވީ، އެމްޑީޕީގެ ޤައުމީ މަޖިލީހުގެ އިންތިޚާބުގައި "ޓީމު އެމްޑީޕީ" ގެ ނަމުގައި ވާދަކުރައްވާ ކެންޑިޑޭޓުންނާއެކު އާދިއްތަ ދުވަހުގެރޭ ހުޅުމާލޭގައި ބޭއްވި ބައްދަލުވުމެއްގައި ބައިވެރިވެވަޑައިގަތުމަށްފަހު، ނޫސްވެރިއަކު ކުރި ސުވާލަކަށް ޖަވާބު ދެއްވަމުންނެވެ.
ރައީސް ސޯލިޙް ވިދާޅުވީ، މިވަގުތު ކުރިއަށްދަނީ އެމްޑީޕީގެ ޤައުމީ މަޖިލީހުގެ އިންތިޚާބުގެ ކެމްޕެއިން ކަމަށާއި، އޭގެ ފަހުން ދެން އޮންނާނީ ރިޔާސީ ޕްރައިމަރީ ކަމަށެވެ. އަދި ރިޔާސީ ޕްރައިމަރީގައި ވާދަކުރައްވާނެކަން ފައިސަލް މިހާރު އިއުލާނު ކުރައްވާފައިވާ ކަމަށް އެމަނިކުފާނު ފާހަގަކުރެއްވި އެވެ.
ރިޔާސީ ޕްރައިމަރީއާ ގުޅޭގޮތުން އަމިއްލަފުޅު ވިސްނުންފުޅު ހާމަކުރައްވަމުން ރައީސް ސޯލިހް ވިދާޅުވީ، އެމަނިކުފާނު ޕްރައިމަރީގައި ވާދަކުރައްވާނެކަން އިއުލަނު ނުކުރައްވާ ކަމަށެވެ.
ފައިސަލް ކުރިމަތިލައްވަން އެ އޮތީ ނިންމަވާފަ. އަޅުގަނޑު ކުރިމަތިލާކަށް އިއުލާނެއް ނުކުރަން. އަޅުގަނޑު ތާއީދު ކުރާ ކެންޑިޑޭޓުން މިތާ މިތިބީ. ވަކިން ވެސް އެބައުޅޭ އަޅުގަނޑު ތާއީދުކުރާ ކެންޑިޑޭޓުން. އަޅުގަނޑާ މަޝްވަރާކޮށްފަ ކުރިމަތިލާފަ އެތިބީ. އަޅުގަނޑު ތާއީދުކޮށްގެން ކުރިމަތިލީރައީސް ސޯލިޙް
ރިޔާސީ ޕްރައިމަރީގައި ވާދަކުރައްވާނެކަން މިހާތަނަށް އިއުލާން ކުރައްވާފައިވަނީ އެމްޑީޕީގެ ކުރީގެ ރައީސް އަބްދުالله ޝާހިދުގެ އިތުރުން އެ ޕާޓީގެ ކުރީގެ ޗެއަރޕާސަން ފައްޔާޒް އިސްމާއިލް އެވެ.
މި ބައްދަލުވުމުގައި ޕާޓީގެ ގިނަ އަދަދެއްގެ މެންބަރުންނާއި، ޤައުމީ މަޖިލީހަށް ވާދަކުރައްވާ ކެންޑިޑޭޓުން ބައިވެރިވެވަޑައިގެންނެވި އެވެ. ކުރިއަށް އޮތް ޕާޓީގެ އެތެރޭގެ އިންތިޚާބުތަކަށް އެމްޑީޕީގެ ތެރޭގައި ފޯރިއާއެކު ކެމްޕެއިން ހަރަކާތްތައް މިހާރު ދަނީ ހިންގަމުންނެވެ.











