ލޯނު ދޫކުރާ އެންމެ މަތީ އުމުރު 75 އަހަރަށް ނުވަތަ އެއަށް ވުރެ މަތީ އުމުރަކަށް ބަދަލުކުރުމަށް ބޭންކާއި ފިނޭންސް މިނިސްޓްރީގައި ބުނިން: ރައީސް
22 ނޮވެމްބަރު 2026 | އާދީއްތަ 07:26ބޭންކުތަކުން ލޯނު ދޫކުރާ އެންމެ މަތީ އުމުރު 60 އަހަރުން 75 އަހަރަށް ބަދަލުކުރުމަށް ބީއެމްއެލް އާއި ފިނޭންސް މިނިސްޓްރީގައި ދަންނަވާފައިވާނެ ކަމަށް ރައީސް މުއިއްޒު ވިދާޅުވެއްޖެ. ރާއްޖޭގެ އެވްރެޖް އުމުރު މަތިވެފައިވާތީ، އުމުރުން ދުވަސްވީ މީހުންނަށް ލޯނު ލިބުމުގައި ހުރި ދަތިތައް ހައްލުކުރުމަކީ މުހިންމު ކަމެއް ކަމަށް އެމަނިކުފާނު ފާހަގަކުރެއްވި

ރައީސް ޑރ. މުހައްމަދު މުއިއްޒު | ރައީސް އޮފީސް
ލޯނު ދޫކުރާ އެންމެ މަތީ އުމުރު 75 އަހަރަށް ނުވަތަ އެއަށް ވުރެ މަތީ އުމުރަކަށް ބަދަލުކުރުމަށް ބޭންކް އޮފް މޯލްޑިވްސް (ބީއެމްއެލް) އާއި ފިނޭންސް މިނިސްޓްރީގައި މިހާރު ދަންނަވާފައިވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
ރައީސް އެހެން ވިދާޅުވީ ރައީސް އޮފީހުން ކުރިއަށް ގެންދާ "ރައްޔިތުންގެ އަޑު" ޕޮޑްކާސްޓްގައި އުމުރުން ދުވަސްވީ މީހަކު ފާޅުކުރި ކަންބޮޑުވުމަކަށް ޖަވާބު ދެއްވަމުންނެވެ.
މި ޕޮޑްކާސްޓްގައި އުމުރުން ދުވަސްވީ މީހަކު ވަނީ، އުމުރުން ދުވަސްވީ މީހުންނަށް ބޭންކުތަކުން ލޯނު ލިބުމުގައި ހުރި ދަތިތަކާއި، މުސްކުޅިންނަށް ލޯނު ނުލިބޭތީ އެކަމުގެ ކަންބޮޑުވުން ރައީސްއާ ހިއްސާކޮށްފަ އެވެ.
އެކަމާ ގުޅިގެން ރައީސް ވިދާޅުވީ، ބޭންކް އޮފް މޯލްޑިވްސް އިން ލޯނު ދޫކުރާ އެންމެ މަތީ އުމުރުގެ ގޮތުގައި މިހާރު ކަނޑައަޅާފައި އޮންނަނީ 60 އަހަރު ކަމަށާއި، ނަމަވެސް އެއީ މިހާރުގެ ހާލަތަށް ބަލާއިރު ދަށް އުމުރެއް ކަމަށް ގަބޫލުފުޅު ކުރައްވާ ކަމަށެވެ.
ރައީސް ވިދާޅުވީ ކުރިއާ އަޅާބަލާއިރު ރާއްޖޭގެ އެވްރެޖް އުމުރު ނުވަތަ މީހުން ދިރިތިބޭނެ ކަމަށް ލަފާކުރާ އުމުރު މިހާރު މަތިވެފައިވާ ކަމަށެވެ.
އެހެންކަމުން، 60 އަހަރުވުމުން ލޯނު ނުލިބޭ ގޮތަށް އޮތް އޮތުން ބަދަލުކޮށް، އެ އުމުރު 75 އަހަރަށް ނުވަތަ އެއަށް ވުރެ ވެސް މަތިކުރުމަކީ މުހިންމު ކަމެއް ކަމަށް ރައީސް ފާހަގަކުރެއްވި އެވެ.
މީގެ އިތުރުން ރައީސް ވިދާޅުވީ، މި ބަދަލު ގެނައުމަށް ބޭންކުތަކުގައި ދަންނަވާފައިވާތީ، ބައެއް ބޭންކުތަކުން މިހާރު އެ ބަދަލުތައް ގެނެސްފައިވާ ކަމަށް ގަބޫލުފުޅު ކުރައްވާ ކަމަށެވެ.
"ރައްޔިތުންގެ އަޑު" ޕޮޑްކާސްޓަކީ ރައްޔިތުންގެ ހުރި ކަންބޮޑުވުންތަކާއި ސުވާލުތަކަށް ސީދާ ރައީސުލްޖުމްހޫރިއްޔާ ޖަވާބު ދެއްވުމަށް ކުރިއަށް ގެންދާ ސިލްސިލާ ޕްރޮގްރާމެކެވެ.











