މި ދިރާސީ އަހަރު ނާލާފުށީ ސްކޫލުގައި ކިޔަވައިދޭނެ ކަމަށް ރައީސް ވައުދުވެވަޑައިގެންނެވި ނަމަވެސް، އަހަރު ނިމެންދާއިރު ވެސް މަސައްކަތް އޮތީ ހުއްޓިފައި!
20 ނޮވެމްބަރު 2026 | ހުކުރު 08:04މ. ނާލާފުށީގައި އަލަށް އިމާރާތްކުރާ ސްކޫލުގެ 95 އިންސައްތަ މަސައްކަތް ނިމިފައިވީ ނަމަވެސް، ފިނިޝިންގ މަސައްކަތްތައް ހުއްޓިފައި އޮތުމުން ދަރިވަރުންނާއި ބެލެނިވެރިންގެ ކަންބޮޑުވުން ވަނީ އިތުރުވެފައި. މި ހިނގާ ދިރާސީ އަހަރު ކިޔަވައިދޭން ފަށާނެ ކަމަށް ސަރުކާރުން ވައުދުވެފައިވީ ނަމަވެސް، މަސައްކަތް ކުރިއަށް ނުދާތީ މަތީ ގްރޭޑްތަކުގެ ދަރިވަރުން ކިޔެވުމަށް ކޮންމެ ދުވަހަކު ކަނޑުދަތުރުކޮށްފައި މުއްޔަށް ދާންޖެހޭ މައްސަލައަށް ހައްލެއް ނުލިބޭ. މީގެ އިތުރުން އެ ރަށުގެ ސިއްހީ މަރުކަޒާއި ކައުންސިލް އިދާރާ ފަދަ ތަރައްގީގެ އެހެން މަޝްރޫއުތައް ވެސް ކުރިއަށްދާ ސްޕީޑް ލަސްކަން ކައުންސިލްގެ ނައިބު ރައީސް ފާހަގަކުރެއްވި


ހުކުރު ދުވަހުގެ ފަށާއިރު ޕްރޮގްރާމްގައި މ. ނާލާފުށީގެ ކައުންސިލުގެ ނައިބު ރައީސް އިބްރާހީމް ޒުހެއިދު ވާހަކަ ދައްކަވަނީ | ރާއްޖެއެމްވީ
މ. ނާލާފުށީގައި އަލަށް އިމާރާތްކުރަމުންދާ ސްކޫލުގެ 95 އިންސައްތަ މަސައްކަތް ނިމިފައިވީ ނަމަވެސް، މަސައްކަތް ކުރިއަށްނުގޮސް އެއްކޮށް ހުއްޓިފައިވާ ކަމަށް އެ ރަށު ކައުންސިލުގެ ނައިބު ރައީސް އިބްރާހީމް ޒުހެއިދު ވިދާޅުވެއްޖެ އެވެ.
ހުކުރު ދުވަހުގެ 'ފަށާއިރު' ޕްރޮގްރާމުގައި ވާހަކަދައްކަވަމުން ޒުހެއިދު ވިދާޅުވީ، އެ ސްކޫލަކީ ކުރީ ސަރުކާރުން ފަށައިގެން ގާތްގަނޑަކަށް 95 އިންސައްތަ މަސައްކަތް ނިންމާފައިވާ ތަނެއް ކަމަށެވެ. އަދި މިހާރު އިމާރާތުގެ ބޮޑުބައި ނިމި، ގިނަ ތަންތަނުގައި ޓައިލްސް ވެސް ޖަހާފައި ހުރި ނަމަވެސް ފިނިޝިންގ އެއްވެސް މަސައްކަތެއް ކުރިއަށްނުދާ ކަމަށެވެ.
2025 ވަނަ އަހަރުގެ ސެޕްޓެމްބަރު 22 ގައި ރައީސް ޑރ. މުހައްމަދު މުއިއްޒު ނާލާފުށްޓަށް ވަޑައިގެން، މި ހިނގާ ދިރާސީ އަހަރު އެ ސްކޫލުގައި ކިޔަވައިދޭން ފައްޓަވާނެ ކަމަށް ވައުދުވެވަޑައިގެންނެވިކަން ފާހަގަކުރައްވައި ޒުހެއިދު ވިދާޅުވީ މިހާރު ދިރާސީ އަހަރު ނިމެން ގާތްވެފައިވާއިރު ވެސް އެ މަސައްކަތް އޮތީ ކުރިން ވެސް އޮތް ގޮތަށް ކަމަށާއި، އެއްވެސް މަސައްކަތެއް ކުރިއަށް ނުދާ ކަމަށެވެ.
ދެން ހަމަ ގިނަ ތާނގައި ޓައިލްސް ވެސް މިހިރީ ޖަހާފައި. އެކަމަކު އަދިވެސް ހަމަ ފިނިޝިންގެ މަސައްކަތް ހަމަ އޭރުގައި ހުއްޓިފައި ހުރި ގޮތަށް ހަމަ އެއްވެސް މަސައްކަތެއް އެތާނގައި ކުރިއަކަށް ނުދޭއިބްރާހީމް ޒުހެއިދު
ޒުހެއިދު ވިދާޅުވީ، ރަށުގައި މަތީ ގްރޭޑްތަކަށް ކިޔަވައިދެވެން ނެތުމުގެ ސަބަބުން، ގްރޭޑް 9 އިން ފެށިގެން 12 އާ ހަމައަށް ތައުލީމު ހާސިލުކުރާ ދަރިވަރުން ކޮންމެ ދުވަހަކު ކަނޑުދަތުރުކޮށްފައި ދާންޖެހެނީ އެ އަތޮޅު މުއްޔަށް ކަމަށްވާތީ، ސްކޫލުގެ މަސައްކަތް ހުއްޓިފައި އޮތުމަކީ އެރަށު ރައްޔިތުންގެ ވަރަށް ބޮޑު ކަންބޮޑުވުމެއް ކަމަށެވެ. އަދި މި ސްކޫލުގެ މަސައްކަތް އަވަހަށް ނިމުމަކީ ދަރިވަރުންނާއި ބެލެނިވެރިންގެ ދަތިތަކަށް އޮތް ހަމައެކަނި ހައްލު ކަމަށް އޭނާ ވިދާޅުވި އެވެ.
މީގެ އިތުރުން ޒުހެއިދު ވިދާޅުވީ ތަރައްގީގެ ސްކޫލުގެ އިތުރުން އެހެން މަޝްރޫއުތައް ވެސް ކުރިއަށްދާ ސްޕީޑް ވަރަށް ލަސް ކަމަށެވެ.
އެގޮތުން ސިއްހީ މަރުކަޒުގެ މަސައްކަތް ވެސް ކޮންޓްރެކްޓަރަށް ޕޭމަންޓް ނުލިބިގެން ހުއްޓިފައިވާ ކަމަށާއި، ނޮވެމްބަރުގެ ނިޔަލަށް ނިންމަން އޮތް އެ މަޝްރޫއުގެ މުއްދަތު މިހާރު އިތުރުކޮށްދީފައިވާ ކަމަށް އޭނާ ވިދާޅުވި އެވެ. އަދި ވިދާޅުވީ، ޕޮލިސް ސްޓޭޝަންގެ މަސައްކަތް ވެސް އޮތީ ހިޔާކުރުމުގެ މަރުހަލާގައި އޮތްއިރު، ކައުންސިލް އިދާރާގެ މަސައްކަތް ވަރަށް ލަސް ސްޕީޑެއްގައި ކުރިއަށްދާ ކަމަށެވެ.











