ޕީއެންސީގެ މެންބަރުންގެ އަދަދު 1 ލައްކައަށް އަރުވަން ސަރުކާރު ޑެސްޕަރޭޓް ލެވެލްއަކަށް؟
20 ނޮވެމްބަރު 2026 | ހުކުރު 10:08ޕީއެންސީގެ ދަފްތަރުގައި އެއްލައްކަ މެންބަރުން ހަމަވިކަން އިއުލާނުކުރިތާ 24 ގަޑިއިރު ނުވަނީސް، އެ އަދަދު އަނެއްކާވެސް އެއްލައްކައިން ތިރިއަށް ވަނީ ވެއްޓިފައި. ވަޒީފާގެ ބިރުދެއްކުމާއި ރިޝްވަތު ދީގެން މެންބަރުން އިތުރުކުރާކަމުގެ ތުހުމަތުތައް ފެންމަތިވެފައިވާއިރު، މިއީ ސިޔާސީ ބޭނުމަކަށްޓަކައި ސަރުކާރުން ހިންގާ ހީލަތްތެރި ރޭވުމެއްކަމަށް ބުނެ ގިނަ ބަޔަކު ދަނީ ފާޑުކިޔަމުން


ޕީއެންސީގެ ކޮންގްރެސްގައި ރައީސް ޑރ. މުހައްމަދު މުއިއްޒު ބައިވެރިވެ ވަޑައިގަންނަވަނީ | ޕީއެންސީ
މުޅި ސޯޝަލް މީޑިއާއާއި ސަރުކާރުގެ އިސް ސަފުން އެއްއަޑަކުން ބުރާސްފަތި ދުވަހުގެ ރޭ ގުގުމާލީ ޕާޓީއަށް އެއްލައްކަ މެންބަރުން ހަމަވި ކަމުގެ އުފާވެރި "ސެލެބްރޭޝަން" އިންނެވެ. ނަމަވެސް، އެ އުފާވެރިކަމަށް 24 ގަޑިއިރު ހަމަނުވެ، ހުކުރު ދުވަހުގެ މެންދުރުފަސް ވީއިރު ޕީއެންސީގެ ދަފްތަރު އަނެއްކާ ވެސް އެއްލައްކައިން ތިރިއަށް ވެއްޓި، ހަގީގަތް މިވަނީ ބޭޒާރުވެފަ އެވެ. މި ހަގީގަތުންނާއި މިހާރު ފެންމަތިވަމުންދާ ކަންކަމުން ސާބިތުވަނީ އެންމެ ކަމެއް ނޫންތޯ އެވެ. އެއީ ސިޔާސީ ގޮތުން ދައްކަން ބޭނުންވި "އެއްލައްކަ" ހަމަކުރުމަށްޓަކައި ސަރުކާރު ޑެސްޕަރޭޓް ވެފައިވާ މަންޒަރު ކަމާމެދު ޝައްކަތް ނެތެވެ.
އިސްލެކްޝަން ކޮމިޝަން (އީސީ)ގެ ތަފާސްހިސާބުތައް ދައްކާ ގޮތުން ބުރާސްފަތި ދުވަހުގެ ރޭ 10:37 ގެ ނިޔަލަށް ޕީއެންސީގައި 100،083 މެންބަރުން ތިއްބެވެ. މިއީ މިދިޔަ އަހަރު ނިމުނުއިރު އެ ޕާޓީގައި ތިބި 74،048 މެންބަރުންނާ އަޅާބަލާއިރު 26،035 މެންބަރުންގެ ބޮޑު އިތުރުވުމެކެވެ. ނަމަވެސް، ހުކުރު ދުވަހުގެ މެންދުރުފަހު އީސީގެ ދަފްތަރު އަޕްޑޭޓްވިއިރު އެ އަދަދު ވަނީ 99،930 އަށް ވެއްޓިފަ އެވެ. އެއީ އެންމެ 24 ގަޑިއިރު ތެރޭގައި 153 މެންބަރުން މަދުވުމެކެވެ.
މީގެ އިތުރުން ރައީސް ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގެންނެވި އިރު އެންމެ 3،000 އެއްހާ މެންބަރުން ތިބި ޕާޓީއެއް، ސަރުކާރަށް އަހަރު ފުރުމާ ދިމާކޮށް 1 ލައްކަ ހަމަކުރަން ކުރި މަސައްކަތް ނާކާމިޔާބުވުމަށްފަހު، މިފަހަރު ވެސް އެ އަދަދު ދެމެހެއްޓުނީ އެންމެ ދުވަހަކު އެވެ.
ރާއްޖޭގެ މީހުން ދިރިއުޅޭ ހުރިހާ ރަށަކާއި، ސަރުކާރުގެ ކުންފުނިތަކާއި މުއައްސަސާތައް ފުރޮޅާލައިގެން މެންބަރުން ވެއްދުމުގެ ބޮޑު ކެމްޕޭނެއް ސަރުކާރުން ހިންގީ ކަނޑައެޅިގެން ރައްޔިތުންނަށް ނުފޫޒު ފޯރުވައިގެން ކަމުގެ ތުހުމަތު ވަނީ ބޮޑުވެފަ އެވެ. ސަރުކާރު ހިއްސާވާ ކުންފުނިތަކުގެ ވަޒީފާތަކުގައި ތިބި އާދައިގެ މުވައްޒަފުން ފެށިގެން އެކި ފަންތީގެ މީހުންނަށް ވަޒީފާގެ ބިރުދައްކައި، މަޖުބޫރުން ފޯމު ފުރުވުމުގެ އަމަލުތައް ހުރިހާ ދިމާއަކުން ފެނިގެންދިޔަ އެވެ. އަދި އަންނަ އަހަރުގެ ޖެނުއަރީ މަހާ ހަމައަށް ކޮންމެހެން ވެސް ޕާޓީގެ ރަޖިސްޓްރީގައި މަޑުކޮށްދިނުމަށް އެދި ސަރުކާރުގެ އިސްވެރިން މުއައްސަސާތަކުގެ މުވައްޒަފުންގެ ކިބައިން އާދޭސްކުރަމުންދާ ކަމަށް އެ ތަންތަނުގެ މުވައްޒަފުން ދަނީ ބުނަމުންނެވެ.
މީގެ އިތުރުން މިއީ ކުރިއަށް އޮތް ރިޔާސީ އިންތިޚާބަށް ވޯޓު ހޯދުމަށްޓަކައި ހިންގާ ބޮޑު ހީލަތްތެރި ރޭވުމެއްގެ ތެރެއިން ކުރާ ކަމެއް ކަމަށް ގިނަ ބަޔަކު ދެކޭއިރު، ޕާޓީއަށް މީހުން ވެއްދުމަށް ސަރުކާރުން ވަނީ ބޮޑެތި ޚަރަދުތަކެއް ވެސް ކޮށްފަ އެވެ.
އެގޮތުން ޕީއެންސީއަށް ރަޖިސްޓްރީވާނަމަ، 500 ރުފިޔާގެ އިތުރުން، 1000، 2000 އަދި 3000 ރުފިޔާ ދީގެން ރިޝްވަތުގެ ގޮތުގައި ފައިސާ ބަހައިގެން މީހުން ވައްދާފައިވާ ކަމުގެ އަޑުތައް ވެސް ވަނީ ގަދަވެފަ އެވެ. ނަމަވެސް ފައިސާއަށް އެދި ޕާޓީއަށް ވަން ބައެއް މީހުންނަށް އަދިވެސް ފައިސާ ޖަމާކޮށްދީފައި ނުވާތީ އެފަދަ ފަރާތްތަކުގެ ޝަކުވާތައް ވެސް ދަނީ ފެންމަތިވަމުންނެވެ.
އެއްލައްކަ ހަމަކުރުމުގެ ނަމުގައި މިފަދަ ދަށު ދަރަޖައިގެ އަމަލުތައް ހިންގަމުންދާތީ އާންމުން ދަނީ މިއީ ސަރުކާރު އިންތިހާއަށް 'ޑެސްޕަރޭޓް' ވެފައިވާ މިންވަރު ދައްކުވައިދޭ ކަމެއް ކަމަށް ބުނެ ސޯޝަލް މީޑިއާގައި ވަރަށް ބޮޑަށް ޖޯކު ޖަހަމުންނެވެ. ދައުލަތުގެ ބާރާއި ވަސީލަތްތައް ބޭނުންކޮށް، ވަޒީފާގެ ބިރުދައްކައި، އަދި ރައްޔިތުންނަށް ބޮޑެތި އަދަދުތަކުން ފައިސާ ބަހައިގެން ވެސް ހަމަވި 1 ލައްކަ މެންބަރުންގެ އަދަދު 24 ގަޑިއިރު ނުވަނީސް ވެއްޓިގެން ދިޔުމަކީ ސަރުކާރުގެ މި ޑެސްޕަރޭޝަން ފަލީހަތްވި ކަމެއް ނޫންތޯ އެވެ. ރައްޔިތުންގެ ތާއީދު ފައިސާއަށް ނުގަނެވޭނެކަން މި ތަފާސްހިސާބުތަކުން މިއަދު މިވަނީ ސާފުކޮށްދީފައެއް ނޫންތޯ އެވެ.









