ރާއްޖެއަށް ދުންފިނީގެ އަސަރު ބޮޑުވެ، ސިއްހީ ރައްކާތެރިކަމުގެ ފިޔަވަޅުތައް އެޅުމަށް އެޗްޕީއޭއިން އިލްތިމާސްކޮށްފި
22 ނޮވެމްބަރު 2026 | އާދީއްތަ 07:30ވައި ނުސާފުވުމުގެ ސަބަބުން ސިއްހީ މައްސަލަތައް ކުރިމަތިވެދާނެތީ، ބޭރުގައި ކަސްރަތުކުރުން ފަދަ ކަންކަން މަޑުޖައްސާލައި ރައްކާތެރިކަމުގެ ފިޔަވަޅު އެޅުމަށް އެޗްޕީއޭއިން ވަނީ އިލްތިމާސްކޮށްފައި. އެގޮތުން ބޭރަށް ނުކުންނައިރު މާސްކު އެޅުމަށާއި، ވައިގެ ސާފު މިންވަރު ބެލުމަށް ކަނޑައަޅާފައިވާ އެޕްލިކޭޝަންތައް ބޭނުންކުރުމަށް އެ އިދާރާއިން އިރުޝާދު ދޭ. އާންމު ސިއްހަތަށް އޮތް ނުރައްކަލަށް ބަލައި މާލެ ހިމެނޭހެން ބައެއް ސަރަހައްދުތަކަށް މިހާރު ވަނީ ރަތް ސަމާލު ނެރެފައި


މާލޭގެ ބޮޑު ބޮޑުތަކުރުފާނު މަގު، މިދުވަސްވަރު މަގު މައްޗަށް ނުކުމެ އުޅޭއިރު ސަމާލުވުމަށް އިލްތިމާސްކޮށްފައިވޭ | ދައުރު
ރާއްޖޭގެ އެކި އަތޮޅުތަކަށް، ޚާއްސަކޮށް އުތުރާއި މެދުރާއްޖޭގެ ސަރަހައްދުތަކަށް ދުންފިނީގެ އަސަރު ކުރިއަށް އޮތް 3 ދުވަހު ބޮޑުވާނެ ކަމަށް މޫސުމާ ބެހޭ ގައުމީ އިދާރާއިން ލަފާކުރުމާ ގުޅިގެން، ސިއްހީ ގޮތުން ރައްކާތެރިކަމުގެ ފިޔަވަޅުތައް އެޅުމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އިލްތިމާސްކޮށްފި އެވެ.
މި ދުވަސްވަރު ވައި ނުސާފުވުމުގެ ސަބަބުން ސިއްހީ ގޮތުން ނޭދެވޭ އަސަރުތައް ކުރުމާއި، ފުއްޕާމެއާއި ހިތުގެ ބަލިތައް ހުންނަ މީހުންނަށް އޭގެ ނުރައްކާ ބޮޑުވުމުގެ ފުރުސަތު އޮތުމާއެކު، ބޭރުގައި ކުޅިވަރު ކުޅުމާއި ކަސްރަތު ކުރުން ފަދަ ހަރަކާތްތައް މަޑުޖައްސާލުމަށް އެޗްޕީއޭއިން ވަނީ އެދިފަ އެވެ. އަދި ބޭރަށް ނުކުންނަން ޖެހޭ ހާލަތްތަކުގައި N95 ނުވަތަ އެފަދަ ފެންވަރު ރަނގަޅު މާސްކު އެޅުމަށާއި، ބޭރުގެ ނުސާފު ވައި ގޭތެރެއަށް ނުވަންނާނެހެން ދޮރުތައް ލައްޕާފައި ބެހެއްޓުމުގެ އިތުރުން ގޭތެރޭގައި އެއާ ޕިއުރިފައިއާ ބޭނުންކުރުމަށްވެސް އިރުޝާދު ދީފައިވެ އެވެ.
ވައި ނުސާފުވުމުގެ ސަބަބުން އާންމު ސިއްހަތަށް ނުރައްކާ އޮތް މިންވަރު ބަޔާންކޮށް ނެރުނު އެލާޓްތަކުގެ ތެރެއިން، މުޅި އާބާދީއަށް އޭގެ ނޭދެވޭ އަސަރު ފޯރާނެ ކަމަށް ލަފާކުރެވޭ ރަތް ސަމާލު، މާލެސިޓީ އާއި ކ. ވިލިނގިލީގެ އިތުރުން ށ. ފުނަދޫ އަދި ކުޅުދުއްފުށި ސިޓީ އަށް ނެރިފައިވާއިރު، އެޗްޕީއޭއިން ބުނީ، މި ދަރަޖައިގެ އެލާޓެއް ނެރެނީ ފުއްޕާމެ އާއި ހިތުގެ ބަލިތައް ފަދަ ސީރިއަސް މައްސަލަތައް ހުރިހާ ފަރާތްތަކަށް ވެސް ކުރިމަތިވުމުގެ ފުރުސަތު ބޮޑުވުމުން ކަމަށެވެ.
މީގެއިތުރުން ނާޒުކު ހާލަތްތަކުގައިވާ މީހުންނާއި އާންމު އެހެން ފަރާތްތަކަށް ވެސް ނޭވާލާ ނިޒާމުގެ މައްސަލަތައް ކުރިމަތިވުމުގެ ފުރުސަތު އޮތުމުން އޮރެންޖް ސަމާލު އަދި ނޭވާލާ ނިޒާމުގެ މައްސަލަތައް ހުންނަ ފަރާތްތަކުން ބޭރުގައި އުޅުމުން ދުރުހެލިވުމަށް އަންގާ ރީދޫ ސަމާލު ވަނީ ދ. ކުޑަހުވަދޫ، ލ. ގަން، ފުވައްމުލައް ސިޓީ އަދި އައްޑޫ ސިޓީއަށް ނެރެފަ އެވެ.
ރާއްޖޭގެ ވައިގެ ސާފުމިންވަރުގެ އަދާހަމަ މައުލޫމާތު ބެލުމަށްޓަކައި، މިނިސްޓްރީ އޮފް ޓޫރިޒަމް އެންޑް އެންވަޔަރަމެންޓުން ކަނޑައަޅާފައިވާ މޯލްޑިވްސް އެއަރ ކޮލިޓީ އިންޑެކްސް ލިންކު ނުވަތަ އައިކިޔުއެއަރ ވިޝުއަލް އެޕްލިކޭޝަން ބޭނުންކުރުމަށް ވެސް ކަމާބެހޭ އިދާރާތަކުން ވަނީ އިލްތިމާސްކޮށްފަ އެވެ.








