ރާއްޖޭގެ ބޮޑު ބަޔަކަށް ނުރައްކާތެރި މިންވަރަކަށް ވައި ނުސާފު، ސަމާލުވޭ!
27 އޮކްޓޯބަރު 2026 | އަންގާރަ 14:55ރާއްޖޭގެ އުތުރާއި މެދުރާއްޖެތެރޭގެ ވައި ނުރައްކާތެރި މިންވަރަކަށް ނުސާފުވެފައިވާތީ، ކުރިއަށް އޮތް ފަސް ދުވަހު ވެސް ސަމާލުވުމަށް މޫސުމާބެހޭ ގައުމީ އިދާރާއިން އިލްތިމާސްކޮށްފައިވޭ. އުތުރުގެ އަތޮޅުތަކުގެ ވައިގެ ކޮލިޓީ "ރެޑް އެލާޓް" މިންގަނޑަށް ދަށްވެފައިވާއިރު، މީގެ ސަބަބުން ނޭވާލާ ނިޒާމުގެ މައްސަލަތައް ހުންނަ މީހުންނާއި އާންމު ސިއްހަތަށް ނޭދެވޭ އަސަރުތަކެއް ކުރުމުގެ ފުރުސަތު ބޮޑު. އެހެންކަމުން، ބޭރަށް ނުކުމެ އުޅުމުގައި ރައްކާތެރިކަމުގެ ފިޔަވަޅު އެޅުމަށް ކަމާބެހޭ އިދާރާތަކުން އިރުޝާދު ދީފައިވޭ
މާލޭގެ އިމާރާތެއްގެ މަތިން ނަގާފައިވާ ފޮޓޯއެއް، ވައި ނުސާފުވުމުގެ ސަބަބުން ހުޅުމާލެ ސާފުކޮށް ނުފެނޭ | ރާއްޖެއެމްވީ
ރާއްޖޭގެ ބޮޑު ބަޔަކަށް ނުރައްކާތެރި މިންވަރަކަށް ވައި ނުސާފުވެއްޖެ އެވެ.
އަންގާރަ ދުވަހު މޫސުމާބެހޭ ގައުމީ އިދާރާއިން ބުނީ، ދުންފުހުގެ ސަބަބުން މެދުރާއްޖެތެރެއާއި އުތުރުގެ އަތޮޅުތަކަށް ވައި ނުސާފުވެ ހަމަލޮލަށް ސާފުކޮށް ފެންނަ ދުރުމިން އުތުރުގެ އަތޮޅުތަކަށް ގާތްގަނޑަކަށް 2 ކިލޯމީޓަރަށް ދަށްވެފައިވާ ކަމަށެވެ. މި މިހާލަތު މެދުރާއްޖެތެރޭގެ އަތޮޅުތަކަށާއި، ޚާއްސަކޮށް އުތުރުގެ އަތޮޅުތަކަށް ކުރިއަށް އޮތް 5 ދުވަހަށް ވެސް ކުރާނެ ކަމަށް ލަފާކުރެވޭ ކަމަށް އެ އިދާރާއިން ބުނެ އެވެ.
ރާއްޖޭގެ ބޮޑު ބައެއް ވައި ނުސާފުވެފައިވާއިރު، މާލެސިޓީގެ ވެސް ވައި ވަނީ ވަރަށް ބޮޑަށް ނުސާފުވެފަ އެވެ.
ވައިގެ ކޮލެޓީ ދައްކުވައިދޭ އައިކިއުއެއާގެ ތަފާސްހިސާބުން ދައްކާ ގޮތުގައި، ރާއްޖޭގެ އުތުރަށް ވައި ނުސާފު މިންވަރު ގިންތިކޮށްފައިވަނީ އެއާ ކޮލިޓީ އިންޑެކްސް (އޭކިއުއައި) 158 އާއި 165އާ ދޭތެރޭ، ރެޑް އެލާޓެއްގެ ގޮތުގަ އެވެ. އެއީ އާންމުކޮށް އެންމެންގެ ހިތަށާއި ފުއްޕާމެއަށް ނޭދެވޭ އަސަރުކުރުމާއި ބަލި ޖެހިފައިވާ މީހުންގެ ހާލަތު ގޯސްވުމުގެ ފުރުސަތު ބޮޑުވާ ހާލަތެކެވެ.
އޭގެ އިތުރުން މެދުރާއްޖެ ތެރޭގެ ސަރަހައްދުގައި ވެސް ވައި ނުސާފު ކަމަށް އައިކިއުއެއާގެ ތަފާސްހިސާބުން ދައްކާއިރު، އެއީ އޭކިއުއައި 126 ނުވަތަ ނާޒުކު ފަރާތްތަކުގެ ސިއްހަތަށް ނުރަނގަޅު މިންވަރެކެވެ. އެއީ ވެސް، އާންމުކޮށް އެންމެންނަށް، ޚާއްސަކޮށް ނާޒުކު ހާލަތުގައިވާ މީހުންނަށް އުނދަގޫތަކާ ކުރިމަތިވުމާއި ނެވޭލާ ނިޒާމުގެ މައްސަލަތައް ދިމާވުމުގެ ނުރައްކާ އޮންނަ ހާލަތެކެވެ.
މީގެ އިތުރުން ދ. އަތޮޅުގައި ވެސް ވައި ނުސާފުވެފައިވާ ކަމަށް ދައްކާއިރު، އެ ސަރަހައްދުގައި އޭކިއުއައި ހުރީ 60 ގަ އެވެ.
އެހެންކަމުން މިދުވަސްވަރު ސަމާލުވުމަށް މޫސުމާބެހޭ ގައުމީ އިދާރާއިން ވަނީ އިލްތިމާސްކޮށްފަ އެވެ.
