ނުރައްކާތެރި މިންވަރަކަށް ދުމުގެ އަސަރު ހުރުމުން ޖޮހޯގެ މަދަރުސާތައް އިތުރު ފަސް ދުވަހަށް ބަންދުކޮށްފި
18 އޮކްޓޯބަރު 2026 | އާދީއްތަ 06:54މެލޭޝިޔާގެ ޖޮހޯ ބަރޫގައި ވައި ނުސާފުވުމުގެ ސަބަބުން ނޭވާލާ ނިޒާމުގެ ބަލިތައް %20.7 އިތުރުވެފައިވާތީ، އާންމު ސިއްހަތު ރައްކާތެރިކުރުމަށް ޓަކައި މާސްކު އެޅުމަށާއި ސިއްހީ އިރުޝާދުތަކަށް ބޯލެނބުމަށް ކަމާބެހޭ އިދާރާތަކުން ވަނީ އިލްތިމާސްކޮށްފައި. ވައިގެ ފެންވަރު ބަލާ އިންޑެކްސްއިން އެ ސަރަހައްދުގެ ރީޑިންގ ހުރީ ސިއްހަތަށް ނުރައްކާވާ މިންވަރަށް ކަމަށްވާ 101 އާއި 200 އާ ދެމެދުގައި
މެލޭޝިޔާގެ ޖޮހޯގައި ހުންނަ މަދަރުސާއެއްގެ ގޭޓު ކައިރީގައި ބެލެނިވެރިއަކާއި ދަރިވަރެއް، އެ ތަނުގެ ގާޑާ ވާހަކަދައްކަނީ | ސީއެންއޭ
މެލޭޝިޔާގެ ޖޮހޯ ބާރޫގައި ދުމުގެ ހާލަތު ނުރައްކާތެރި މިންވަރަކަށް ގޯސްވުމާ ގުޅިގެން، އޮކްޓޫބަރު 19 ވާ ހޯމަ ދުވަހުން ފެށިގެން އެ ސްޓޭޓުގެ ސްކޫލުތައް އިތުރު ފަސް ދުވަހުގެ މުއްދަތަށް ބަންދުކޮށްފައި ބަހައްޓަން ނިންމައިފި އެވެ. މި ނިންމުން ނިންމާފައި ވަނީ ހޮނިހިރު ދުވަހުގެ މެންދުރު ބޭއްވި ޖޮހޯ ހޭޒް މެނޭޖްމަންޓް ކޯޑިނޭޝަން ކޮމިޓީގެ ބައްދަލުވުމަކަށް ފަހު ކަމަށް، އެ ސްޓޭޓުގެ އެޑިއުކޭޝަން އެންޑް އިންފޮމޭޝަން ކޮމިޓީގެ ޗެއާމަން މުޙައްމަދު ނަޤީބު އެމްޑީ ޣަޒާލީ ވިދާޅުވި އެވެ.
"މޮނިޓަރިން ރިޕޯޓުތަކުން ދައްކާ ގޮތުގައި އެއާ ޕޮލިއުޓަންޓް އިންޑެކްސްގެ (އޭޕީއައި) ރީޑިންތައް ހުރީ ކަންބޮޑުވާންޖެހޭ ފެންވަރެއްގައި. އަދި، ފާހަގަކޮށްލެވޭ ފަދަ އެއްވެސް ކުރިއެރުމެއް ނާދޭ،" ނަޤީބު ވިދާޅުވި އެވެ.
މަދަރުސާތައް ބަންދުކުރި މުއްދަތު އިތުރުކުރުމުގެ ނިންމުމަށް ބަދަލު އައުން ބިނާވެގެންވަނީ ވައިގެ ފެންވަރަށް އަންނަ ބަދަލުތަކާއި، މޫސުމީ ލަފާކުރުންތަކާއި، އަދި ކުރިއަށްދާ ސިއްހީ ވަޒަންކުރުންތަކުގެ މައްޗަށް ކަމަށް އޭނާ ވިދާޅުވި އެވެ. މިއީ ޖޮހޯގެ ރީޖަންޓް ތުންކޫ މަހްކޮތާ އިސްމާޢީލްގެ އިރުޝާދާ އެއްގޮތަށް އަޅާފައިވާ ފިޔަވަޅެއް ކަމަށާއި، މި ނިންމުމުން ދައްކުވައި ދެނީ އާންމު ސިއްހަތާއި ރައްކާތެރިކަމަށް އިސްކަންދިނުމަށް ސްޓޭޓް ސަރުކާރުން ދޭ އަހައްމިއްޔަތުކަން ކަމަށް ނަޤީބު ވިދާޅުވި އެވެ.
މަދަރުސާތައް ބަންދުކޮށްފައިވާ މުއްދަތުގައި، ތައުލީމާ ބެހޭ ވުޒާރާގެ ގޭގައި ތިބެގެން ކިޔަވައިދިނުމާއި އުނގެނުނުގެ ގަވާއިދުގެ 2.0 ވަނަ ސިޔާސަތާ އެއްގޮތްވާ ގޮތުގެ މަތިން ގޭގައި ދަރިވަރުން ބައިތިއްބައިގެން ކިޔަވައިދިނުމުގެ ކަންކަން ކުރިއަށްދާނެ ކަމަށް އޭނާ ބަޔާންކުރެއްވި އެވެ. ނަމަވެސް، އިމްތިހާނުތަކާއި އެސެސްމަންޓްތައް ހަދާ ދަރިވަރުންނަށް ވަކި ހައްދުތަކެއްގެ ތެރޭގައި އިސްތިސްނާތަކެއް ދެވިދާނެ ކަން އޭނާ ފާހަގަކުރެއްވި އެވެ.
"މި އިސްތިސްނާތައް ދެވޭނީ ޖޮހޯ އެޑިއުކޭޝަން ޑިޕާޓްމަންޓްގެ (ޖޭޕީއެންޖޭ) ވިލަރެސްކުރުމާ އެކު، އަދި ސިއްހީ މިންގަނޑުތަކަށް (އެސްއޯޕީތަކަށް) ފުރިހަމައަށް އަމަލުކުރުމުގެ ޝަރުތާ އެކު. އަދި، އެއްވެސް އިތުރު ހަރަކާތެއް ހިންގުމުގެ ހުއްދައެއް ނޯންނާނެ،" އޭނާ ވިދާޅުވި އެވެ.
އުސޫލުތައް މުރާޖާކުރުމާއި ސިއްހީ ރައްކާތެރިކަން
މެލޭޝިޔާގެ ތައުލީމާ ބެހޭ ވުޒާރާގެ އުސޫލުތަކާ އެއްގޮތްވާ ގޮތުގެ މަތިން، ޖޮހޯގެ އެޑިއުކޭޝަން ޑިޕާޓްމަންޓުން ކޮންމެ ދުވަހަކު ވެސް އުސޫލުތައް މުރާޖާ ކުރަމުން ގެންދާނެ ކަމަށް ނަޤީބު ވިދާޅުވި އެވެ. އަދި، ޖޮހޯގެ ސަރުކާރު މަދަރުސާތަކާއި ދީނީ މަދަރުސާތަކުގެ އިމްތިހާނުތަކާއި އެސެސްމަންޓްތަކުގެ ތާވަލުތައް ވިލަރެސްކުރުމަށް ޓަކައި، ވުޒާރާގެ އެގްޒެމިނޭޝަން ބޯޑުން އެންމެ ފަހުގެ މައުލޫމާތުތައް އެ ޑިޕާޓްމަންޓުން ހޯދަމުންދާނެ އެވެ.
ހަމަމިއާއެކު، ވައި ތަޣައްޔަރުވުމުގެ ސަބަބުން އާންމު ސިއްހަތަށް ކުރިމަތިވެދާނެ ނުރައްކާތަކާ މެދު ސިއްހީ އިދާރާތަކުން ކަންބޮޑުވުން ފާޅުކޮށްފައިވާކަން ފާހަގަކުރައްވައި، މާސްކު އެޅުމަށާއި ސިއްހީ އިރުޝާދުތަކަށް ފުރިހަމައަށް ތަބާވުމުގެ މުހިންމުކަމުގެ މައްޗަށް ނަޤީބު ބާރުއެޅުއްވި އެވެ. މި ގޮތުން، ޚާއްސަކޮށް ކުޑަކުދިންނާއި ނާޒުކު ހާލަތްތަކުގައިވާ މީހުންނަށް ރައްކާތެރިކަން ހޯދުމަށް ޓަކައި ފުޅާ ދާއިރާއެއްގައި ދުރާލައި ފިޔަވަޅުތައް އެޅުމަށް އޭނާ އިލްތިމާސްކުރެއްވި އެވެ.
"އޮކްޓޫބަރު މަހުގެ ތެރޭގައި އެ ސްޓޭޓުން ނޭވާހިއްލުމާއި ނޭވާލާ ނިޒާމުގެ މަތީބައިގެ އިންފެކްޝަންތަކުގެ 30،648 ކޭސް ރެކޯޑުކުރެވިފައިވާއިރު، މިއީ ހަފުތާއަކަށް ބަލާއިރު %20.7 ގެ އިތުރުވުމެއް،" އެ ސަރަހައްދުގެ މީޑިއާތަކާ ހަވާލާދީ އޭނާ ވިދާޅުވި އެވެ.
މީގެ ކުރިން ވެސް ޖޮހޯ ސަރުކާރުން ވަނީ އޮކްޓޫބަރު 8 އިން ފެށިގެން ދެ ދުވަހުގެ މުއްދަތަށް ހުރިހާ މަދަރުސާތަކެއް ބަންދުކުރުމަށް އަމުރުކޮށްފަ އެވެ. އަދި، އޭގެ ފަހުން އޮކްޓޫބަރު 12 އިން ފެށިގެން ތައުލީމީ މުއައްސަސާތައް އިތުރު ފަސް ދުވަހަށް ބަންދުކުރަން ނިންމި އެވެ. ކިލާސްރޫމްތަކަށް ދަރިވަރުން އެނބުރި ދިއުން ރައްކާތެރިވާނެ ވަގުތެއް ކަނޑައެޅުމަށް ޓަކައި ކަމާބެހޭ އިދާރާތަކުން ވައިގެ ފެންވަރު މޮނިޓަރުކޮށް ވަޒަންކުރަމުންދާއިރު، އެންމެ ފަހުން މުއްދަތު އިތުރުކުރަން މި ނިންމީ ކުރިން ނިންމި މި ނިންމުންތަކާ ގުޅިގެންނެވެ.
ވައިގެ ފެންވަރު ދަށްވުމާއި ޤައުމީ ތަފާސްހިސާބުތައް
އާދީއްތަ ދުވަހުގެ ހެނދުނު މެލޭޝިޔާ ގަޑިން 8:00 އާ ހަމައަށް ޖޮހޯގެ ޕާސީރު ގޫޑާންގުން ރެކޯޑުކުރެވުނު އޭޕީއައި ރީޑިންގ 190 އަށް އަރައި މުޅި ޤައުމުގައި ވެސް އެންމެ މަތީ އަދަދު ރެކޯޑުކުރެވިފައިވާއިރު، އެ ސަރަހައްދު ހިމެނިފައިވަނީ "ވަރަށް ނުރައްކާތެރި" ދަރަޖައިގައި ކަމަށް މެލޭޝިޔާގެ ޑިޕާޓްމަންޓް އޮފް އެންވަޔަރަންމަންޓުން ބުންޏެވެ. މި ގޮތުން، މޮނިޓަރިން ސްޓޭޝަންތަކުގެ ތެރެއިން އަށް ސްޓޭޝަނަކުން ވައިގެ ފެންވަރު ސިއްހަތަށް ނުރައްކާވާ މިންވަރުގައި ހުރި ކަމަށް ދައްކާފައިވާއިރު، މި ކަމުގެ އަސަރު އެންމެ ބޮޑަށް ކޮށްފައިވާ ސްޓޭޓަކީ ޖޮހޯ އެވެ.
ޖޮހޯގެ އެހެން ސަރަހައްދުތަކުގެ ތެރެއިން ލާރްކިންއިން 181، ކޮޓަ ތިންގީއިން 181، ޕަންގްރާންގއިން 178، ބަތޫ ޕަހާތުން 169، ކްލޫއަންގުން 163، ތަންގކާއިން 160، އަދި ސެގާމަތުން 157 ގެ ރީޑިންއެއް ރެކޯޑުކުރެވިފައިވާ ކަމަށް ޑިޕާޓްމަންޓް އޮފް އެންވަޔަރަންމަންޓްގެ އެއާ ޕޮލިއުޓަންޓް އިންޑެކްސް މެނޭޖްމަންޓް ސިސްޓަމް ޕޯޓަލްގެ ހިސާބުތަކުން ދައްކަ އެވެ.
ކްލާންގ ވެލީގެ ސަރަހައްދަށް ފަހުގެ ތާރީޚެއްގައި ބޯކޮށް ވާރޭވެހުނު ނަމަވެސް، ޖޯހަން ސެތިޔާއިން ރީޑިން ހުރީ 163 ގަ އެވެ. އަދި، ޝާހް އަލަމްއިން 161، ކްލާންގުން 159، ޕެޓަލިންގ ޖާޔާއިން 157، އަދި ބަންޓިންގުން 156 ރެކޯޑުކުރެވިފައިވެ އެވެ. މީގެ އިތުރުން، ކުއަލަ ލުމްޕޫރުގެ އޯރާސްއިން 156 އަދި ބަޓޫ މުދާއިން 155 ރެކޯޑުކުރެވުނުއިރު، ޕުތުރަޖާޔާއިން ރެކޯޑުކުރެވިފައި ވަނީ 159 އެވެ.
އޭޕީއައި މިންގަނޑުގައި ބަޔާންކޮށްފައިވާ ގޮތުގައި، 101 އާއި 200 އާ ދެމެދުގެ ރީޑިންގތައް ބެލެވެނީ ސިއްހަތަށް ނުރައްކާތެރި މިންވަރެއްގެ ގޮތުގަ އެވެ. އަދި، 200 އަށްވުރެ މަތީގެ ރީޑިންގތައް ބަލަނީ ސިއްހަތަށް ވަރަށް ބޮޑަށް ނުރައްކާތެރި މިންވަރެއްގެ ގޮތުގަ އެވެ.
މަސްދަރު: ސީއެންއޭ
