ބޭރުގެ ފަރާތްތަކަށް ރާއްޖެއިން ބިން ދޫކުރަނީ ދިވެހި ރައްޔިތުންނަށް ނުދެވޭ ވަރުގެ ބޮޑު އެއްޗެއް ރައީސް މުއިއްޒަށް އެ ބޭރު މީހުންގެ ކިބައިން ލިބޭތީ: އަލީ ހުސެއިން
22 ނޮވެމްބަރު 2026 | އާދީއްތަ 06:35ދިވެހި ރައްޔިތުން ބޯހިޔާވަހިކަމަށް އިންތިޒާރު ކުރަމުންދަނިކޮށް ބޭރުގެ ފަރާތްތަކަށް ބިން ދޫކުރުމަކީ ބަލައިގަނެވޭނެ ކަމެއް ނޫން ކަމަށް އަލީ ހުސެއިން ވިދާޅުވި. މިފަދަ ބޮޑެތި ނިންމުންތައް ނިންމަންވާނީ ރައްޔިތުންގެ ފެންނަ ނުފެންނަ ވޯޓަކުން ކަމަށާއި، ގައުމުގެ އިސްލާމީ ޝަޚްސިއްޔަތަށް ގެއްލުންވާ ފަދަ އެއްވެސް ކަމަކަށް ފުރުސަތު ދީގެން ނުވާނެ ކަމަށް އޭނާ ވިދާޅުވި


ސަރުކާރާ ދެކޮޅަށް ބޭއްވި އެއްވުމެއްގައި ގައުމީ ހަރަކާތުގެ ތަރުޖަމާނު އަދި ގާނޫނީ ވަކީލު އަލީ ހުސެއިން ވާހަކަ ދައްކަވަނީ. ފައިލް ފޮޓޯ | ރާއްޖެއެމްވީ
ބޭރުގެ ފަރާތްތަކަށް ރާއްޖެއިން ބިން ދޫކުރަނީ ދިވެހި ރައްޔިތުންނަށް ނުދެވޭ ވަރުގެ ބޮޑު އެއްޗެއް ރައީސް ޑރ. މުހައްމަދު މުއިއްޒަށް އެ ބޭރު މީހުންގެ ކިބައިން ލިބޭތީ ކަމަށް، ގައުމީ ހަރަކާތުގެ ތަރުޖަމާނު އަދި ގާނޫނީ ވަކީލު އަލީ ހުސެއިން ވިދާޅުވެއްޖެ އެވެ.
އަލީ ހުސެއިން މިހެން ވިދާޅުވީ "ދިވެހީންގެ ބިން ދިވެހީންނަށް" މި ނަމުގައި ހޮނިހިރު ދުވަހުގެރޭ ބޭއްވި ކުއްލި ހަރަކާތުގައި ވާހަކަދައްކަވަމުންނެވެ.
އަލީ ހުސެއިން ވިދާޅުވީ ވެރިކަމަށް ވޯޓުދޭން، ތާއީދުކުރަން އަދި އިހުތިރާމުކުރަން ވެސް ތިބީ ދިވެހި ރައްޔިތުން ކަމަށާއި، ރަސްމާލެއިން ބިން ހޯދުމަށް ފުލެޓާއި ގޯއްޗަށް އެދި 58،000 އެއްހާ ރައްޔިތުން އިންތިޒާރުގައި އެބަތިބި ކަމަށެވެ. އެހެންކަމުން ދިވެހިންނަށް ބިން ނުދީ ބޭރުގެ ފަރާތްތަކަށް ބިން ދޫކުރަނީ ބުއްދީގެ ހަމައިން ބަލާއިރު ވެސް ދިވެހިންގެ އަތުން ނުލިބޭނެ އެއްޗެއް ލިބޭތީ ކަމަށް އޭނާ ތުހުމަތުކުރެއްވި އެވެ.
ތާރީޚީ މިސާލެއް ދައްކަވަމުން އަލީ ހުސެއިން ވިދާޅުވީ، އޮޓޯމަން އެމްޕެރާ ސުލްތާން އަބްދުލްހަމީދުގެ އަރިހަށް ޔަހޫދީން ގޮސް ފަލަސްތީނުން ބިންކޮޅެއް ވިއްކުމަށް އެދުނު ކަމަށެވެ.
އެހެންނަމަވެސް އަބްދުލްހަމީދު ވިދާޅުވީ ކީކޭތޯ؟ ތިމަންނަގެ މިލްކެއް ނޫނޭ ފަލަސްތީނުގެ ބިމަކީ، އެއީ ތިމަންނަގެ މިލްކެއް ނޫނޭ. އެއީ އިސްލާމީ އުންމަތުގެ މިލްކެކޭ. ތިމަންނައަކަށް ވިއްކައެއް ނުލެވޭނެ. މިއީ ގައުމު ދެކެ ލޯބިވާ މީހުން. މިއީ އިސްލާމީ އުންމަތް ދެކެ ލޯބިވާ މީހުންއަލީ ހުސެއިން
އަލީ ހުސެއިން ވިދާޅުވީ، ރާއްޖޭގައި އޮތް ސައްތައިން ސައްތަ އިސްލާމީ ޝަޚްސިއްޔަތަށް ގެއްލުންވާ އެއްވެސް އިގްތިސާދީ މަޝްރޫއެއް ހިންގައިގެން ނުވާނެ ކަމަށެވެ. އަދި ރައްޔިތުންގެ ސުލްހަމަސަލަސްކަމާ ގުޅޭ މިފަދަ ބޮޑެތި ކަންކަމުގައި ރައްޔިތުންގެ ފެންނަ ނުފެންނަ ވޯޓަކަށް ދާންޖެހޭނެ ކަމަށް ވެސް އޭނާ ވިދާޅުވި އެވެ.
މީގެ އިތުރުން އަލީ ހުސެއިން ވިދާޅުވީ، ރާއްޖެ ވިއްކާލާ އަދި ޣައިރު ދީންތަކުގެ މީހުން ރާއްޖޭގައި އާބާދުކުރުވާ ޖީލަކަށް މި ޖީލު ވެގެން ނުވާނެ ކަމަށެވެ. އަދި މިއަދުގެ ޖީލަށް މި ގައުމު ލިބުނު ފަދައިން ނުވަތަ އެއަށްވުރެ ވެސް ރަނގަޅު ހާލަތެއްގައި އަންނަން އޮތް ޖީލުތަކަށް މި ގައުމު ފޯރުކޮށްދިނުމަކީ ކޮންމެހެން ކުރަންޖެހޭ ކަމެއް ކަމަށް އަލީ ހުސެއިން ވިދާޅުވި އެވެ.










