އެސްއީޒެޑްގެ ދަށުން ހިންގާ މަޝްރޫއުތަކަކީ ރާއްޖެއަށް ޑޮލަރު ވަނުމުގެ ބަދަލުގައި، ޑޮލަރު ބޭރުކުރުމަށް މަގުފަހިވާ ގޮތަށް ރާވާފައިވާ ކަމެއް: މާޒް ސަލީމް
15 ނޮވެމްބަރު 2026 | އާދީއްތަ 11:50ރަސްމާލޭގެ ބޮޑު ބައެއް އީގަލް ހިލްސްއަށް ދިނުމަކީ ކޮރަޕްޝަނަށް މަގުފަހިވާ ގޮތަށް، ރާއްޖެއިން ޑޮލަރު ބޭރުކުރުމަށް ރާވާފައިވާ ހީލަތްތެރި ރޭވުމެއް ކަމަށް މާޒް ސަލީމް ވިދާޅުވި. މި މަޝްރޫއުގެ ސަބަބުން ބޭންކިންގ ނިޒާމަށް ފައިދާއެއް ނުވާނެ ކަމަށާއި، ބިލިއަން ޑޮލަރުގެ އަގުބޮޑު ބިންތައް 99 އަހަރަށް ބޭރު ބަޔަކަށް ދޫކޮށްލުމަކީ ގައުމަށް ލިބޭނެ ބޮޑު ގެއްލުމެއްކަން އޭނާ ވިދާޅުވި
އާދިއްތަ ދުވަހު ގައުމީ ހަރަކާތުން ބޭއްވި ނޫސްވެރިންގެ ބައްދަލުވުމެއްގައި އެމްޑީޕީގެ ގައުމީ މަޖިލީހުގެ މެންބަރު އަހުމަދު ސަލީމް (މާޒް ސަލީމް) ވާހަކަ ދައްކަވަނީ | ރާއްޖެއެމްވީ
އެސްއީޒެޑްގެ ދަށުން ހިންގާ މަޝްރޫއުތަކަކީ ރާއްޖެއަށް ޑޮލަރު ވަނުމުގެ ބަދަލުގައި، ޑޮލަރު ބޭރުކުރުމަށް މަގުފަހިވާ ގޮތަށް ރާވާފައިވާ ކަމެއް ކަމަށް އެމްޑީޕީގެ ގައުމީ މަޖިލީހުގެ މެންބަރު އަހުމަދު ސަލީމް (މާޒް ސަލީމް) ވިދާޅުވެއްޖެ އެވެ.
އާދިއްތަ ދުވަހު ގައުމީ ހަރަކާތުން ބޭއްވި ނޫސްވެރިންގެ ބައްދަލުވުމެއްގައި މާޒް ސަލީމް ވަނީ ރަސްމާލޭގެ ބޮޑު ސަރަހައްދެއް އީގަލް ހިލްސްއަށް ދާއިމީކޮށް ދޭ މައްސަލައާ ގުޅިގެން ސަރުކާރަށް ވަރަށް ބޮޑަށް ފާޑު ވިދާޅުވެފަ އެވެ.
މިމަޝްރޫއާ ގުޅޭގޮތުން މާޒް ސަލީމް ވިދާޅުވީ، ސަރުކާރުން އެއްވެސް އަގެއް ނުނަގާ ބިން ދޫކޮށްފައިވާ ކަމަށާއި، މި އިންވެސްޓްމަންޓުން ލިބޭ ފައިސާ ބޭންކިންގ ނިޒާމުގެ ތެރޭގައި ދައުރުވާން ފެށުމުން ޑޮލަރު ވާރޭ ވެހޭނެ ކަމަށް ބުނެ ސަރުކާރުން ރައްޔިތުންނަށް އޮޅުވާލަމުންދާ ކަމަށެވެ. އަދި އެސްއީޒެޑްގެ ގާނޫނުގައި އެ ފައިސާ ޖަމާކުރަންޖެހޭ ތަނެއް ސާފުކޮށް ބަޔާންކޮށްފައި ނެތުމުން، އެކަން ހިނގަނީ އޮފްޝޯ ބޭންކިންގ އަދި ކްރިޕްޓޯ ކަރަންސީ މެދުވެރިކޮށް ކަމަށް ބެލެވޭ ކަމަށްވެސް އޭނާ ވިދާޅުވި އެވެ.
ރޭވިފައި މި އޮތީ ޑޮލަރު އެތެރެކުރުމަށްވުރެ ޑޮލަރު ބޭރުކުރުމަށް މަގުފަހިވާ ގޮތަށް ރާވާފައި އޮތް ހީލަތްތެރި މަކަރުވެރި ރޭވުމެއްމާޒް ސަލީމް
މީގެއިތުރުން މާޒް ސަލީމް ވިދާޅުވީ، މިއީ މޯލްޑިވްސް މަނިޓަރީ އޮތޯރިޓީ (އެމްއެމްއޭ) އަށް ފައިސާ ނުވަންނަ ގޮތަށް ކޮރަޕްޝަނަށް މަގުފަހިވާ ގޮތަށް ކޮށްފައިވާ ކަމެއް ކަމަށެވެ. އިގްތިސާދަށް ވަންނަ ޑޮލަރު ހިފެހެއްޓުމުގެ ހަރުދަނާ ގާނޫނީ ނިޒާމެއް މިހާތަނަށް ސަރުކާރުން ގާއިމުކޮށްފައި ނުވާއިރު، މިފަދަ މަޝްރޫއުތަކުން ލިބޭ ފައިދާ ބޭރު ގައުމުތަކަށް ގެންދެވޭ ގޮތަށް ގާނޫނު ބަދަލުކޮށްފައިވާ ކަމަށްވެސް އޭނާ ވިދާޅުވި އެވެ.
ދައުލަތަށް މިފަދަ މަޝްރޫއުތަކުން ލިބެނީ ރެވެނިއުގެ އެންމެ 10 ޕަސެންޓްކަން ފާހަގަކުރައްވައި މާޒް ސަލީމް ވިދާޅުވީ، މުޅި ގައުމު ދަރަނިވެރިވެގެން ހިއްކި ބިމުގެ އަގުވެސް ނުހިމަނައި، ބިލިއަން ޑޮލަރުގެ އަގުބޮޑު ބިން 99 އަހަރަށް ބޭރު ބަޔަކަށް ދިނުމަށްފަހު އެއީ ބޮޑު ފައިދާއެއް ލިބޭ އިންވެސްޓްމަންޓެއް ކަމަށް ބުނުމަކީ ބުއްދި ގަބޫލުކުރާ ކަމެއް ނޫން ކަމަށެވެ.
