މިއަދު ދިމާވެފައިވަނީ ދިވެހިރާއްޖެ ދެމި އޮތުމާއި ނެތުމުގެ މައްސަލައެއް: އަލީ ހުސެއިން
14 ނޮވެމްބަރު 2026 | ހޮނިހިރު 03:48ޒަޔަނިސްޓުން ރާއްޖޭގައި ވަޒަންވެރިވުމަކީ ގައުމުގެ ސަލާމަތާއި އިސްލާމީ އައިޑެންޓިޓީއަށް އޮތް ނުރައްކަލެއް ކަމަށް ވިދާޅުވެ، ކުރީގެ މެންބަރު އަލީ ހުސެއިން ކަންބޮޑުވުން ފާޅުކުރައްވައިފި. އެމީހުންގެ ނުފޫޒު ރާއްޖެއަށް ފޯރައިފިނަމަ ގާނޫނުއަސާސީގެ ސިޔާދަތު ގެއްލިދާނެތީ، މިކަމާ މެދު ސަލާމަތީ ބާރުތަކުން ސުވާލު އުފައްދަން ޖެހޭ ކަމަށް އޭނާ ވިދާޅުވި
ގާނޫނީ ވަކީލު އަދި ރައްޔިތުންގެ މަޖިލީހުގެ ކެންދޫ ދާއިރާގެ ކުރީގެ މެންބަރު އަލީ ހުސެއިން | ރާއްޖެއެމްވީ
މި ގައުމަށް މިއަދު ދިމާވެފައިވާ އެންމެ ބޮޑު މައްސަލައީ މި ދިވެހިރާއްޖެ ދެމި އޮތުމާއި ނެތުމުގެ މައްސަލައެއް ކަމަށާއި، މިއީ ނުރައްކާތެރި ކަމެއް ކަމަށް ގާނޫނީ ވަކީލު އަދި ރައްޔިތުންގެ މަޖިލީހުގެ ކެންދޫ ދާއިރާގެ ކުރީގެ މެންބަރު އަލީ ހުސެއިން ވިދާޅުވެއްޖެ އެވެ.
"ދިވެހީންގެ ބިން ދިވެހީންނަށް" ނަމުގައި ހުކުރު ދުވަހުގެރޭ އާޓިފިޝަލް ބީޗުގައި ބޭއްވި ޚާއްސަ އެއްވުމުގައި ވާހަކަދައްކަވަމުން އަލީ ހުސެއިން ވިދާޅުވީ މިއަދު މި ގައުމުގެ ހުރިހާ ކަމެއްހެން އެތަނެއްގެ މައްޗަށް ބިނާވެފައިވާ އެއް ތަނަކީ ވެރިކަން ކުރާ ރަށް މާލެ ސިޓީ ކަމަށެވެ.
ގައުމުގެ ސަލާމަތާއި ގުޅިފައިވާ ކަންކަމުގެ އިތުރުން އެންމެ ގިނަ ދިވެހީން އުޅޭ ސަރަހައްދަކީ ވެސް މިއީ ކަން ފާހަގަކުރައްވާ އަލީ ހުސެއިން ވިދާޅުވީ ޒަޔަނިސްޓުން އައިސް މި ސަރަހައްދުގައި ދިރިއުޅެން ފަށައިފި ނަމަ އެކަމާ ދެކޮޅަށް ކުރެވޭނެ އެއްވެސް ކަމެއް ނޯންނާނެ ކަމަށެވެ.
ދިވެހިރާއްޖެ ދެމި އޮތުމާ ނެތުމުގެ އިޝޫއެއް މިއީ. ދިވެހިރާއްޖެ، އޭގެ ގޮތުގައި ދެމި އޮތުމާ ނެތުމުގެ އިޝޫއެއް މިއީ. ޒަޔަނިސްޓުން މިތަނުގައި އާބާދު ކުރީމާ އަޅުގަނޑުމެން އެމީހުންނަށް ޗުއްޕެކޭ ބުންޏަސް، ދެން ވާނެ ގޮތަކީ އަޅުގަނޑުމެންގެ ސިފައިންނާއި އެމީހުންނާ ކޮންފްރަންޓޭޝަންއަކަށް ދާން ޖެހޭ ހާލަތު އަތުވެދާނެ. އަޅުގަނޑުމެން ވިސްނަން ޖެހޭ އަޅުގަނޑުމެންގެ ކޮމިއުނިކޭޝަން ނެޓްވަރކްތައް، ލައިންތައް މިތާ ކައިރީގައި މިހުރީ. ގިނަ ދިވެހީން މިއުޅެނީ މިތާ. އެހެން ވީމަ އެމީހުން މިތަނަށް އައިސް ފައި ހިއްޕާލީމައި، ފައި ހަރުކޮށްލީމައި އެއީ އަޅުގަނޑުމެން ދިވެހިރާއްޖެ، ދިވެހިރާއްޖެ ގޮތުގައި އޮތުމާއި ނެތުމާ ދެމެދަށް އެޅޭ ވަރަށް ބޮޑު ހުރަހެއް. އަޅުގަނޑުމެން ދިވެހީންގެ ދިވެހިރާއްޖެ ގޮތުގައި ދެން ނުތިބޭނެއަލީ ހުސެއިން
އަލީ ހުސެއިން ވިދާޅުވީ ގާނޫނު އަސާސީގެ 10 ވަނަ މާއްދާގައި ބުނަނީ ދިވެހިރާއްޖޭގެ ދީނަކީ، ދިވެހި ދައުލަތުގެ ދީނަކީ އިސްލާމް ދީން ކަމަށެވެ. އެހެން ނަމަވެސް ޣައިރު ދީންތަކުގެ މީހުން މިތަނުގައި ވަޒަންވެރިވުމުން ދެން ހަދާނީ ކިހިނެއްތޯ ވެސް އޭނާ ސުވާލު އުފެއްދެވި އެވެ.
އެހެންކަމުން ގާނޫނު އަސާސީގެ 10 ވަނަ މާއްދާއަށް ވަނީ ކިހިނެއްތޯ ފުލުހުން މިއަދު ވެރިން ގާތު އަހަން ޖެހޭ ކަމަށާއި ހަމަ އެ ސުވާލު އެމްއެންޑީއެފްގެ އޮފިސަރުން ވެސް ވެރިންނާ ކުރަން ޖެހޭ ކަމަށް އަލީ ހުސެއިން ވިދާޅުވި އެވެ.
މިއަދުގެ ހަގީގަތަކީ ޒަޔަނިސްޓުންނަކީ މުޅި ދުނިޔޭގެ ހުރިހާ ހިސާބުތަކަށް ނުފޫޒު ފޯރުވަމުންދާ ބައެއްކަން ކަމަށާއި ދުނިޔޭގެ އެންމެ ބާރުގަދަ ގައުމު، އެމެރިކާ ވެސް އޮތީ ޒަޔަނިސްޓުންގެ ނުފޫޒުގެ ދަށުގައި ކަމަށް އަލީ ހުސެއިން ވިދާޅުވި އެވެ. އެހެންކަމުން ޒަޔަނިސްޓުން މިގައުމަށް އައިސް ވަޒަންވެރިވެ، އެމީހުންގެ ދީން ފަތުރަން އުޅުމުން ކުރެވޭނެ ކަމެއް ނޯންނާނެ ކަމަށް އޭނާ ވިދާޅުވި އެވެ.
