ސިޔާސީ ޖަލްސާތަކަށް ސިފައިންނާއި ފުލުހުން ޔުނީފޯމުގައި މަޖުބޫރުން ގެންދިއުމަކީ މީގެ ކުރިން ފެނިފައިނުވާ ވަރަށް ނުރައްކާތެރި ކަމެއް: އަލީ ހުސެއިން
15 ނޮވެމްބަރު 2026 | އާދީއްތަ 10:20ރަސްމާލެ މަޝްރޫއުގެ ދަށުން ބޭރުގެ ފަރާތްތަކަށް ބިން ދިނުމާ ދެކޮޅަށް ގައުމީ ހަރަކާތުން ބޭއްވި އެއްވުމާ ގުޅިގެން، ސަރުކާރުން ސިފައިންނާއި ފުލުހުން ސިޔާސީ ޖަލްސާތަކަށް ނެރެނީ ރައްޔިތުންނަށް ބިރުދެއްކުމަށް ކަމަށް އަލީ ހުސެއިން ވިދާޅުވި. އަދި ގާނޫނީ އުސޫލުތަކާ ހިލާފަށް ބިން ވިއްކުމަށް ކުރާ މަސައްކަތް ހުއްޓުވުމަށް ރައްޔިތުން ނުކުމެ ސަރުކާރު ޖަވާބުދާރީ ކުރުވަން ޖެހޭ ކަމަށް އޭނާ ވިދާޅުވި
އާދިއްތަ ދުވަހު ގައުމީ ހަކަރާތުން ބޭއްވި ނޫސްވެރިންގެ ބައްދަލުވުމުގައި ގައުމީ ހަރަކާތުގެ ތަރުޖަމާނު އަދި ގާނޫނީ ވަކީލު އަލީ ހުސެއިން ވާހަކަ ދައްކަވަނީ | ރާއްޖެއެމްވީ
ސިޔާސީ ޖަލްސާތަކަށް ސިފައިންނާއި ފުލުހުން ޔުނީފޯމުގައި މަޖުބޫރުން ގެންދިއުމަކީ ރާއްޖެއިން މީގެ ކުރިން ފެނިފައިނުވާ ވަރަށް ނުރައްކާތެރި ކަމެއް ކަމަށް ގައުމީ ހަރަކާތުގެ ތަރުޖަމާނު އަދި ގާނޫނީ ވަކީލު އަލީ ހުސެއިން ވިދާޅުވެއްޖެ އެވެ.
އާދިއްތަ ދުވަހު ގައުމީ ހަރަކާތުން ބޭއްވި ނޫސްވެރިންގެ ބައްދަލުވުމެއްގައި އަލީ ހުސެއިން ވިދާޅުވީ، އެ ހަރަކާތުން ރަސްމާލެ ބޭރުގެ ބަޔަކަށް ދިނުމާއި ދެކޮޅަށް އެއްވުމެއް ބޭއްވުމުން ވެސް މި ކަމާ ދޭތެރޭ ސަރުކާރުން ފިޔަވަޅު އަޅައި އެހެން ދިމާއަކަށް މިކަން އަނބުރާލަން އުޅޭ މަންޒަރު ފެނިފައިނުވާ ކަމަށެވެ. އަދި އޭގެ ބަދަލުގައި ފެނިގެންދިޔައީ ސިފައިންނާއި ފުލުހުންނަށް މަޖުބޫރުކޮށްގެން ސިޔާސީ ޖަލްސާއަކަށް ގެންދިޔަ މަންޒަރު ކަމަށް އޭނާ ވިދާޅުވި އެވެ.
ސިޔާސީ ޖަލްސާއަކަށް، ސިޔާސީ އެއްވުމަކަށް ސިފައިންނާއި ފުލުހުން ޔުނީފޯމު އަޅުވައިގެން މަޖުބޫރުން ކަހަލަ ގޮތަކަށް އެތާ ގެންދިއުން މިއީ އާދައިގެ ކަމެއް ނޫން. މިއީ ވަރަށް ނުރައްކާތެރި، މިހާ ހިސާބަށް މިހާތަނަށް އަޅުގަނޑުމެންގެ ރާއްޖޭގައި ފެނިފައިވާ މަންޒަރެއް ނޫންއަލީ ހުސެއިން
ކުރިއަށް އޮތް ތަނުގައި މިފަދަ މަޖުބޫރުކުރުންތައް އިތުރުވެގެންދާނެކަން ފާހަގަކުރައްވައި އަލީ ހުސެއިން ވިދާޅުވީ، ޒަޔަނިސްޓުންނާއި އެ މީހުންނަށް ވާގިވެރިވާ ފަރާތްތައް ރަސްމާލޭގައި ވަޒަންވެރިވުމުން، ދިވެހި ސިފައިންނާއި ފުލުހުން ޖެހޭނީ އެ މީހުންނާ ދެކޮޅަށް ނުކުންނަ ރައްޔިތުންނާ ކުރިމަތިލާން ކަމަށެވެ. އަދި ރައީސް ޑރ. މުހައްމަދު މުއިއްޒު އެ ދެއްވީ އެ މެސެޖު ކަމަށް އޭނާ ވިދާޅުވި އެވެ.
މީގެ އިތުރުން އަލީ ހުސެއިން ވިދާޅުވީ، ގާނޫނު އަސާސީގައިވާ ގޮތުން ބޭރުގެ އެއްވެސް ބަޔަކަށް ރާއްޖޭގެ ބިމެއް ދެވޭނީ ގާނޫނުގައި ބަޔާންކޮށްފައިވާ އުސޫލުތަކުގެ މަތިން ކަމަށެވެ. ނަމަވެސް މިހާރު ފެންނަނީ އެއްވެސް ގާނޫނެއް ނެތި ވިޔަފާރި އުސޫލުން އެއްބަސްވުމުގައި ސޮއިކުރުމަށްފަހު، އެ އެއްބަސްވުން ތަންފީޒުކުރުމަށްޓަކައި ރަސްމާލެ ނުވަތަ ރިއަލް އެސްޓޭޓާ ބެހޭ ގާނޫނެއް ފާސްކުރަން މަސައްކަތްކުރާ މަންޒަރު ކަމަށް ވިދާޅުވި އެވެ.
އަލީ ހުސެއިން ވިދާޅުވީ، ރަސްމާލެ ވިއްކުމާ ގުޅޭ ބިލު ހުއްޓުވަން ރައްޔިތުން ނުކުންނަން ޖެހޭ ކަމަށާއި، އެ ބިލު ހުއްޓުވޭނީ ރައްޔިތުން ނުކުމެގެން ކަމަށެވެ. އަދި ގާނޫނު އަސާސީގައި ބަޔާންކުރާ ގޮތުން ދައުލަތުގެ އެންމެ ވަރުގަދަ ބާރަކީ ރައްޔިތުން ކަމަށްވާއިރު، ސަރުކާރު ޖަވާބުދާރީ ކުރުވުމަށް ރައްޔިތުން މިހާރު ނުކުންނަން ޖެހިފައިވާ ކަމަށް ވެސް އޭނާ ވިދާޅުވި އެވެ.
