ރާއްޖޭގެ އުފެއްދުންތެރިކަން އިތުރުކުރާ ކަމުގައި ވާނަމަ ލޯކަލް މާރުކޭޓުތަކުން ދިވެހީންނަށް ޖާގަދޭން ޖެހޭ: ފައިސަލް
10 ނޮވެމްބަރު 2026 | އަންގާރަ 03:06ލޯކަލް މާރުކޭޓުތަކަކީ ދިވެހި އުފެއްދުންތަކަށް ޚާއްޞަ ތަންތަނަށް ހަދައި، ބޭރުގެ ގައުމުތަކަށް ބަރޯސާވުން ކުޑަކުރަން ޖެހޭ ކަމަށް ކުރީގެ ނައިބު ރައީސް ފައިސަލް ނަސީމް ވިދާޅުވެއްޖެ. އެމަނިކުފާނު ވިދާޅުވީ ދަނޑުވެރިކަން ފުޅާކޮށް، ރާއްޖޭގެ އުފެއްދުންތައް ތަޒާކަމާއެކު މާކެޓަށް ފޯރުކޮށްދެވޭނެ ފަސޭހަ އިންތިޒާމުތަކެއް ދިވެހީންނަށް މަގުފަހިކޮށްދޭން ޖެހޭ ކަމަށް
ކުރީގެ ނައިބު ރައީސް ފައިސަލް ނަސީމް، ހުޅުމާލޭގައި ހުންނަ ލޯކަލް މާރުކޭޓަށް ޒިޔާރަތް ކުރައްވާ އެފަރާތްތަކުގެ ކަންބޮޑުވުންތައް އަޑުއެއްސެވުން | ފައިސަލް - އާޒިމް ކެމްޕެއިން ޓީމް
ރާއްޖޭގެ އުފެއްދުންތެރިކަން އިތުރުކުރާ ކަމުގައި ވާނަމަ ލޯކަލް މާރުކޭޓުތަކުން ދިވެހީންނަށް ޖާގަދޭން ޖެހޭ ކަމަށް ކުރީގެ ނައިބު ރައީސް ފައިސަލް ނަސީމް ވިދާޅުވެއްޖެ އެވެ.
ހޯމަ ދުވަހު ހުޅުމާލެ ލޯކަލް މާރުކޭޓަށް ޒިޔާރަތްކުރައްވާ އެތަނުގައި ތިބި ފަރާތްތަކުގެ ކަންބޮޑުވުންތައް އެއްސެވުމަށްފަހު ދެއްވި އިންޓަވިއުއެއްގައި ފައިސަލް ވިދާޅުވީ ލޯކަލް މާރުކޭޓުތަކަކީ ދިވެހިރާއްޖޭގައި އުފައްދާ ތަކެއްޗަށް ތައްޔާރުކޮށްފައިވާ ތަންތަން ކަމުގައި ވީނަމަވެސް ފެނިގެން ދަނީ އެހެން މަންޒަރެއް ކަމަށެވެ.
އެގޮތުން ފައިސަލް ވަނީ ބޭރުގެ ގައުމުތަކަށް ބަރޯސާވުން ކުޑަކޮށް ދިވެހީންނަށް އެ ފުރުސަތުތައް ހޯދައިދޭން ޖެހޭ ކަމަށް ވިދާޅުވެފައި އެވެ.
އެބަޖެހޭ ރާއްޖޭގެ އުފެއްދުންތެރިކަން އިތުރުކުރާ ކަމުގައި ވަންޏާ މިކަމަށް ބޮޑަށް ޖާގަދޭން، ދިވެހީންނަށް މި ފުރުސަތުތައް ދޭން އެބަ ޖެހޭ ދިވެހީންނަށް މި މަސައްކަތްތައް ކުރެވޭނެ ގޮތްތައް ހޯދައިދޭން އެބަޖެހޭ އެހެންވީމަ ރާއްޖޭގެ އެކި ރަށްރަށުގައި މިކަންތައް ފުޅާކޮށް އަޅުގަނޑުމެން އެހެން ގައުމުތަކުގެ މައްޗަށް އަބަދުވެސް ބަރޯސާވުން ކުޑަ ކުރަން އެބަޖެހޭ. ކޮންމެ ކަމަކަށް ވެސް ޑޮލަރު އެބަ ބޭނުންވޭ ބޭރުން އެއްޗެއް ގެންނަ ކަމުގައި ވަންޏާފައިސަލް ނަސީމް
ފައިސަލް ވިދާޅުވީ އެމަނިކުފާނުގެ ސަރުކާރެއްގައި ދަނޑުވެރިކަން ފުޅާކޮށް ރާއްޖެއިން ބޭރުން ގެންނަން ޖެހޭ ދަނޑުވެރިކަމުގެ ތަކެތިތައް މަދުކުރެވޭނެ ގޮތެއް ހޯދާނެ ކަމަށެވެ. އަދި ރާއްޖޭގައި ދަނޑުވެރިކަން ކުރާ ފަރާތްތަކަށް އެކަންކަން ފަސޭހަކަމާއެކު ރާއްޖޭގެ އެކި ހިސާބުތަކުގައި ކުރެވި، ރައްކާތެރިކަމާއި ތަޒާކަމާއެކު ރިސޯޓުތަކައް ނުވަތަ ރަށްރަށަށް ފޮނުވޭނެ ގޮތްތައް އިންތިޒާމުކޮށްދެއްވާނެ ކަމަށް ފައިސަލް ވިދާޅުވި އެވެ.
