ކުއްލި ކޮމިޓީ ބައްދަލުވުމެއް ބާއްވައި، ޓެކްސްއަށް މަކަރު ހަދާ މީހުން ޖަލަށް ލެވޭ ބިލު ކޮމިޓީ އިން ފާސްކޮށްފި

ޓެކްސް ނެގުމުގެ ކަންކަން ބަލަހައްޓާ މީރާއަށް ދީފައިވާ ބާރުތައް އިތުރުކޮށް ޓެކްސް ނުދައްކާ މީހުން ޖަލަށްލުމަށް، ޓެކްސް ނެގުމާބެހޭ އިދާރީ ގާނޫނަށް ހުށަހެޅި އިސްލާހު، ރައްޔިތުންގެ މަޖިލީހުގެ އިގްތިސާދީ ކޮމިޓީ އިން ފާސްކޮށްފި އެވެ. 

ސަރުކާރުގެ ފަރާތުން ވިލިމާލޭ ދާއިރާގެ މެންބަރު މުހައްމަދު އިސްމާއީލް ހުށަހަޅުއްވާފައިވާ މި ބިލަކީ މިދިޔަ އަހަރުގެ އޮގަސްޓު މަހުގެ 6 ވަނަ ދުވަހު މަޖިލީހުން ފާސްކޮށް، އެ ކޮމިޓީ އަށް ފޮނުވާފައިވާ ބިލެކެވެ. 60 މެންބަރުންގެ އިއްތިފާގުން ފާސްކޮށް ކޮމިޓީ އަށް ހުށަހެޅި މި ބިލު، އޭގެ އެއް އަހަރު ފަހުން ދިރާސާކޮށް ނިންމާފައިވާއިރު ކޮމިޓީ އިން ވަނީ ބިލަށް ބައެއް އިސްލާހުތަކެއް ވެސް ގެނަސްފަ އެވެ. 

Advertisement

އެގޮތުން ފުނަދޫ ދާއިރާގެ ޕީއެންސީ މެންބަރު މުހައްމަދު މަމްދޫހު ވަނީ އެ ބިލުގެ 64 ވަނަ މާއްދާގެ (ރ) އުނިކުރުމަށް ހުށަހަޅުއްވާފަ އެވެ. މެންބަރު ވިދާޅުވި ގޮތުގައި އެ މާއްދާ އުނިކުރަން ހުށަހެޅުއްވީ، އެ މާއްދާ ބިލުގައި އޮތީ، މިހާރު ވެސް ގާނޫނުގައި އެ މާއްދާ އޮތް ގޮތަށް ކަމަށްވާތީ ކަމަށެވެ. އެހެންކަމުން އަލުން އެ ބިލުގައި އެ މާއްދާ ހިމެނުމުގެ ބޭނުމެއް ނެތް ކަމަށް މެންބަރު ވިދާޅުވި އެވެ. އެ އިސްލާހާއެކު އެ ބިލު ކޮމިޓީ އިން ފާސްކުރީ ވޯޓުގައި ބައިވެރިވެވަޑައިގެންނެވި މެންބަރުންގެ އިއްތިފާގުންނެވެ. 

ޓެކްސް ނެގުމުގެ ގާނޫނަށް އިސްލާހު ގެނައުމުގެ ނަމުގައި ހުށަހެޅި މި ބިލު ހުށަހެޅުމުގެ މަގްސަދުގެ ގޮތުގައި ޓެކްސްގެ ގޮތުގައި ލިބެންވާ ފައިސާ ހޯދުމުގައި މީރާއަށް ލިބޭ ބާރުތައް މުރާޖާކޮށް، ޓެކުހާ ގުޅޭ ކުށާއި ކުށުގެ އަދަބު ބޮޑުކުރުން ހިމެނެ އެވެ.

ޓެކްސް ބަޔާން ހުށަނޭޅުމާއި މައުލޫމާތު ހުށަނޭޅުމުގެ ކުށެއްގެ ގޮތުގައި މީގެ ކުރިން ޖަލަށްލައި ޖޫރިމަނާއެއް ނުކުރެ އެވެ. ނަމަވެސް، އަލަށް ގެންނަ ބަދަލުގައި އެފަދަ ކުށެއް ކޮށްފިނަމަ 250،000 ރުފިޔާ އިން ޖޫރިމަނާކޮށް އެއް މަހާއި ހަ މަސް ދުވަހުގެ މުއްދަތަކަށް ޖަލަށްލުން ހިމެނެ އެވެ.

އެ ބިލުގައި ހިމަނާފައިވާ ބަދަލުތަކުގެ ތެރޭގައި ސިއްރު ހިފެހެއްޓުމުގެ ބައި، 15 ވަނަ ބާބަށް ބައެއް ބަދަލުތައް ގެނައުން ހިމެނެ އެވެ. އެގޮތުން އެ މާއްދާގެ (ކ) ގެ ފަހަތަށް ތިން އަކުރު އިތުރުކުރަން މި ބިލުގައި ވަނީ ހިމަނާފަ އެވެ.

އެ ބައިގައި މި ގާނޫނުގެ ސިއްރު ހިފެހެއްޓުމާއި ގުޅޭ މާއްދާ، (15) ވަނަ މާއްދާގެ ޓެކްސް ނެގުމާއި ބެހޭ ގާނޫނުތައް ހިންގުމުގައި ހަރަކާތްތެރިވާ މުވައްޒަފަކު އެފަދަ އެހެން މުވައްޒަފަަކަށް ވަޒީފާ އަދާކުރުމަށް ބޭނުން ކުރާ މައުލޫމާތު އެހެން ފަރާތަކާއި ހިއްސާކޮށްގެން ނުވާނެ ކަމަށް ބަޔާން ކޮށްފައި ވެ އެވެ. އަދި ހަމަ އެހެންމެ ބޭރުގެ ގައުމެއްގައި ނުވަތަ ސަރަހައްދުގައި ހިންގާ ގާނޫނެއްގެ ދަށުން އެ ގައުމަކަށް ނުވަތަ ސަރަހައްދަކަށް ނަގާ ޓެކްސް އާއި މެދު އެ ސަރަހައްދެއްގައި ޓެކްސް ގާނޫނު ހިންގުމަށް ހުއްދަ ލިބިފައިވާ ފަރާތްތަކަށް ރާއްޖޭގެ ޓެކްސް ދައްކަން ޖެހޭ މައުލޫމާތު ވެސް ސިއްރުކުރަން ވާނެ ކަަަމަށް ބުނެފައި ވެ އެވެ.

މީގެ އިތުރުން މައުލޫމާތު ނިސްބަތްވާ ފަރާތް ނޭނގޭ ގޮތަށް ތަފާސްހިސާބުގައި ހިމަނަން ހާމަކުރާ މައުލޫމާތު ވެސް ސިއްރުކުރަން ވާނެ ކަމަށް ބަޔާން ކޮށްފައި ވެ އެވެ. އެފަދަ ހާލަތެއްގައި މީރާގެ މުވައްޒަފަކު ހާމަކުރާ މައުލޫމާތުގެ ސިއްރުކަން އެ މައުލޫމާތު ލިބޭ ފަރާތުން ދަމަހައްޓަން ވާނެ ކަމަށް ބަޔާން ކޮށްފައި ވެ އެވެ. އަދި އެ މައުލޫމާތު ލިބޭ ފަރާތުން ތިން ވަނަ ފަރާތަކާއި އެކަން ހިއްސާކޮށްގެން ނުވާނެ ކަމަށް ބުނެފައި ވެ އެވެ.

މި ބިލާ ގުޅިގެން ގިނަ ބަޔަކު ކަންބޮޑުވުން ފާޅުކޮށްފައިވާއިރު، މާލީ ދާއިރާގެ ބައެއް ތަޖުރިބާކާރުން ފާހަގަކުރައްވާ ގޮތުގައި ސަރުކާރުން މިކަން މި ކުރަނީ ސީދާ ސަރުކާރަށް ފައިސާ ބޭނުން ވެގެންނެވެ. އަދި ސަރުކާރުން އުޅެނީ ގަދަކަމުން ފެލާލައިގެން ވެސް ރުފިޔާ ނެގޭތޯ ކަމަށާއި އެއީ ފަހަރެއްގައި ޓެކްސް އޮތޯރިޓީގެ ކޮމިޝަނަރުގެ މައްސަލައެއް ނޫން ކަމަށް ވެސް ބައެއް ފަރާތްތަކުން ވަނީ ބުނެފަ އެވެ.