ބޭރުގެ ޓުއަރ އޮޕަރޭޓަރުން އަތުން ޓެކްސް ނަގަން ނިންމުމާއި ގުޅިގެން ކަންބޮޑުވުން ފާޅުކޮށް އިންޑިއާ އަދި ރަޝިއާގެ ޓުއަރ އޮޕަރޭޓަރުންގެ އެންމެ ބޮޑު ޖަމިއްޔާ އިން މިނިސްޓަރު އަމީންއަށް ސިޓީއެއް!
1 އޮކްޓޯބަރު 2026 | ބުރާސްފަތި 11:04ރާއްޖޭގައި ރަޖިސްޓްރީވެފައި ނެތް ބޭރުގެ ޓުއަރ އޮޕަރޭޓަރުންގެ އަތުން ޓެކްސް ނަގަން ނިންމުމުން، އިންޑިއާ އާއި ރަޝިއާގެ ޓްރެވަލް އެސޯސިއޭޝަންތަކުން އެކަމާ ކަންބޮޑުވުން ފާޅުކޮށްފި. މި ބަދަލުގެ ސަބަބުން ޕެކޭޖުތަކުގެ އަގު ބޮޑުވެ ފަތުރުވެރިކަމަށް ނޭދެވޭ އަސަރުކޮށްފާނެތީ، މި ނިންމުން މުރާޖައާކޮށް މަދުވެގެން އެއް އަހަރަށް ފަސްކޮށްދިނުމަށް އެ ޖަމިއްޔާތަކުން ވަނީ ސަރުކާރުގައި އެދިފައި
ޓުއަރިޒަމް މިނިސްޓަރު މުހައްމަދު އަމީން | ސޯޝަލް މީޑިއާ
ރާއްޖޭގެ ފަތުރުވެރިކަމުގެ ދާއިރާއިން ނަގާ މުދަލާއި ޚިދުމަތުގެ އަގުން ނަގާ ޓެކްސް، ނުވަތަ ޖީއެސްޓީއަށް ގެންނަން ނިންމާފައިވާ ބަދަލުތަކާ ގުޅިގެން، އިންޑިއާގެ ޓުއަރ އޮޕަރޭޓަރުންގެ އެންމެ ބޮޑު ޖަމިއްޔާ ކަމަށްވާ އިންޑިއަން އެސޯސިއޭޝަން އޮފް ޓުއާ އޮޕަރޭޓާސް (އައިއޭޓީއޯ) އަދި ރަޝިއަން ޔޫނިއަން އޮފް ޓްރެވަލް އިންޑަސްޓްރީ (އާރްއެސްޓީ) އިން ކަންބޮޑުވުން ފާޅުކޮށްފި އެވެ.
މިކަމާ ގުޅިގެން އައިއޭޓީއޯގެ ރައީސް ރަވީ ގޮސައިން ސޮއިކުރައްވައި ރާއްޖޭގެ ފަތުރުވެރިކަމާ ބެހޭ ވަޒީރު މުހައްމަދު އަމީންއަށް ފޮނުއްވި ސިޓީއެއްގައި ވަނީ، މި ބަދަލުތަކުގެ ސަބަބުން ބައިނަލްއަގުވާމީ ފަތުރުވެރިކަމަށް ނޭދެވޭ އަސަރުތަކެއް ކޮށްފާނެ ކަމުގެ އިންޒާރު ދެއްވާފަ އެވެ.
އައިއޭޓީއޯ އިން ފާހަގަކޮށްފައިވާ ގޮތުގައި، 2026 ވަނަ އަހަރުގެ އޮކްޓޫބަރު މަހުން ފެށިގެން އަމަލުކުރަން ފަށާ މި އިސްލާހުތަކުގެ ދަށުން، ރާއްޖޭގައި ރަޖިސްޓްރީވެފައި ނެތް ނަމަވެސް، ރާއްޖޭގެ ފަތުރުވެރިކަމުގެ ޚިދުމަތްތައް ވިއްކާ ބޭރުގެ ޓުއަރ އޮޕަރޭޓަރުންނާއި އެޖެންޓުންގެ އަތުން ޓެކްސް ނަގަން ވަނީ ނިންމާފަ އެވެ. މީގެ ތެރޭގައި އެ ފަރާތްތަކަށް ލިބޭ ކޮމިޝަނާއި މާޖިންއިން ޓެކްސް ދައްކަން ޖެހުމަކީ، ރާއްޖޭގެ ޗުއްޓީ ޕެކޭޖުތަކުގެ އަގު ބޮޑުވެ، ފަތުރުވެރިކަމުގެ ސިނާއަތަށް ކުރިމަތިވާނެ ބޮޑު ގޮންޖެހުމެއް ކަމަށް އެ ޖަމިއްޔާއިން ބުނެ އެވެ.
މި ސިޓީގައި ބުނެފައިވަނީ ރާއްޖޭގައި އެއްވެސް އޮފީހެއް ނުވަތަ ވިޔަފާރި ހިންގާ ތަނެއް ނެތް ބޭރުގެ ކުންފުނިތަކުން، ރާއްޖޭގެ ޓެކްސް އިދާރާގައި ރަޖިސްޓްރީވެ، ޓެކްސް ދެއްކުމުގެ އިޖުރާއަތްތައް ފުރިހަމަކުރަން ޖެހުމަކީ އިދާރީ ގޮތުން އުފުލަންޖެހޭ ބޮޑު ތަކުލީފެއް ކަމަށެވެ. އަދި މިފަދަ ބޮޑު ބަދަލެއް ގެނައުމުގެ ކުރިން، އިންޑިއާގެ ޓުއަރ އޮޕަރޭޓަރުންނާއި ބައިނަލްއަގުވާމީ ފަތުރުވެރިކަމުގެ ދާއިރާގައި ހަރަކާތްތެރިވާ މުހިންމު ފަރާތްތަކާ އެކު އެކަށީގެންވާ މަޝްވަރާތަކެއް ކުރެވިފައި ނުވާކަން ވެސް އައިއޭޓީއޯ އިން ވަނީ ފާހަގަކޮށްފަ އެވެ.
އައިއޭޓީއޯ އިން ވަނީ މި ނިންމުން އަލުން މުރާޖައާކޮށް، ކަމާގުޅޭ ފަރާތްތަކާ މަޝްވަރާ ކުރުމަށް ސަރުކާރަށް ގޮވާލާފަ އެވެ. އަދި މި ބަދަލަށް އަމަލުކުރަން ފަށާ ތާރީޚު މަދުވެގެން އެއް އަހަރު ދުވަހަށް ފަސްކޮށްދިނުމަށް ވެސް އެ ޖަމިއްޔާއިން ވަނީ އެދިފަ އެވެ. އެއީ 2026-2027 ވަނަ އަހަރުގެ ފަތުރުވެރިކަމުގެ ސީޒަނަށް މިހާރު ވެސް ގިނަ ބުކިންތަކެއް ހެދިފައިވާތީ، ކުއްލިއަކަށް އަގުތަކަށް ބަދަލު އައުމުން ކުރިމަތިވެދާނެ ގެއްލުންތަކުން ސަލާމަތްވުމަށްޓަކައި ކަމުގައި ބުނެފައިވެ އެވެ.
މީގެ އިތުރުން، މި ގާނޫނުގެ ދަށުން ޓެކްސް ނަގާނެ ސީދާ ދާއިރާތަކާއި، ޓެކްސް ހިސާބުކުރާނެ އުސޫލުތަކާއި ރަޖިސްޓްރީވުމުގެ ކަންކަން ކުރިއަށްދާނެ ގޮތުގެ ތަފްސީލީ މައުލޫމާތު ސާފުކޮށްދިނުމަށް ވެސް އައިއޭޓީއޯ އިން ވަނީ އެދިފަ އެވެ. އަދި ޓެކްސް ނެގުމުގައި ބަލާނީ ބުކިން ހަދާ ތާރީޚަށްތޯ، ފައިސާ ދައްކާ ތާރީޚަށްތޯ ނުވަތަ ފަތުރުވެރިޔާ ދަތުރުކުރާ ތާރީޚަށްތޯ ސާފުކޮށްދިނުމަކީ މުހިންމު ކަމެއް ކަމަށް އެ ޖަމިއްޔާއިން ބުނެ އެވެ.
2،000 އަށްވުރެ ގިނަ މެންބަރުން ހިމެނޭ އައިއޭޓީއޯ އަކީ އިންޑިއާގެ އިތުރުން ދުނިޔޭގެ އެކި މާކެޓްތަކުން ރާއްޖެއަށް ފަތުރުވެރިން ގެނައުމުގައި މުހިންމު ދައުރެއް އަދާކުރާ ޖަމިއްޔާއެކެވެ. އެ ޖަމިއްޔާއިން ބުނީ ރާއްޖެއަކީ އިންޑިއާގެ ފަތުރުވެރިންގެ މެދުގައި ވަރަށް މަގުބޫލު މަންޒިލެއް ކަމަށާއި، މި ގާތް ގުޅުން ދެމެހެއްޓުމަށްޓަކައި ވިޔަފާރިތަކަށް ދަތިނުވާނެ ފަދަ ގޮތަކަށް ޓެކްސްގެ ސިޔާސަތުތައް ބައްޓަންކުރުން މުހިންމު ކަމަށެވެ. މި މައްސަލައިގައި މިނިސްޓްރީއާ އެކު އިތުރަށް މަޝްވަރާކުރަން ތައްޔާރަށް އޮތްކަން ހާމަކުރަމުން، އައިއޭޓީއޯ އިން ވަނީ މިކަމަށް އަވަސް ހައްލެއް ހޯދައިދިނުމަށް އެދިފަ އެވެ.
މިކަމާ ގުޅިގެން ރަޝިއާގެ 3000 އަށްވުރެ ގިނަ ކުންފުނި ތަމްސީލުކުރާ އަދި ރަޝިއަން ޔޫނިއަން އޮފް ޓްރެވަލް އިންޑަސްޓްރީ (އާރްއެސްޓީ) އިން ރާއްޖޭގެ ފަތުރުވެރިކަމާ ބެހޭ ވަޒީރު މުހައްމަދު އަމީންއަށް ފޮނުވި ސިޓީއެއްގައި ބުނެފައިވަނީ، 2026 ވަނަ އަހަރުގެ އޮކްޓޫބަރު މަހުގެ 1 ވަނަ ދުވަހުން ފެށިގެން އަމަލުކުރަން ފަށާ އައު ގަވާއިދުގެ ދަށުން ރަޝިއާގެ ޓުއަރ އޮޕަރޭޓަރުންނާއި އެޖެންޓުންގެ ފައިދާއިން 17 އިންސައްތަ ޖީއެސްޓީ ނެގުމަކީ ބަލައިގަނެވޭނެ ކަމެއް ނޫން ކަމަށެވެ.
އާރްއެސްޓީގެ ރައީސް އިލްޔާ އުމަންސްކީ ސޮއިކުރައްވައި ފޮނުއްވި މި ސިޓީގައި ފާހަގަކޮށްފައިވާ ގޮތުގައި، ރާއްޖޭގެ ޖީއެސްޓީ ގާނޫނަށް ގެނައި އިސްލާހުގެ ދަށުން ރާއްޖޭގައި ރަޖިސްޓްރީވެފައި ނުވާ ބޭރުގެ ކުންފުނިތަކުން ވެސް ޓެކްސް ދައްކަން ޖެހުމަކީ އަމަލީގޮތުން ކުރެވޭނެ ކަމެއް ނޫނެވެ. ޚާއްސަކޮށް ރަޝިއާގެ ކުންފުނިތަކުން ރާއްޖޭގެ ޚިދުމަތްތައް ގަންނަނީ މިހާރު ވެސް ރާއްޖޭގައި ނަގާ ހުރިހާ ޓެކްސްތަކެއް ހިމެނޭ އަގުގައި ކަމަށާއި، އޭގެ ފަހުން ރަޝިއާގެ އެތެރޭގައި ހިންގާ ވިޔަފާރީގެ މުއާމަލާތްތަކުން އަލުން ރާއްޖެއަށް ޓެކްސް ދައްކަން ޖެހުމަކީ އެއް ޚިދުމަތަކުން ދެފަހަރަށް ޓެކްސް ނެގުން ކަމަށް އެ ޖަމިއްޔާއިން ބުނެފައިވެ އެވެ.
މީގެ އިތުރުން މި ޓެކްސް ތަންފީޒު ކުރުމުގައި ދިމާވާނެ އިދާރީ ދަތިތަކަށް ވެސް އާރްއެސްޓީ އިން ވަނީ އަލިއަޅުވާލާފަ އެވެ. އެގޮތުން ރަޝިއާގެ ކުންފުނިތަކުގެ އާމްދަނީއާއި ފައިދާގެ ތަފްސީލުތައް ބަލައި ކަށަވަރުކުރުމަށް ރާއްޖޭގެ ޓެކްސް އިދާރާ، މީރާއަށް ރަޝިއާގެ އެތެރޭގެ މާލީ ލިޔެކިޔުންތަކަށް ވަދެވޭނެ ގާނޫނީ އެއްވެސް މަގެއް ނެތްކަން އެ ސިޓީގައި ފާހަގަކޮށްފައިވެ އެވެ. އަދި ރަޝިއާގެ ގާނޫނުތަކުގެ ދަށުން ޓުއަރ އޮޕަރޭޓަރުން ހުށަހަޅަންޖެހޭ ރިޕޯޓުތަކާއި "ޕާސަނަލް ލައިބިލިޓީ ފަންޑު" އަށް ދައްކަންޖެހޭ ފައިސާއަށް ވެސް މި އައު ޓެކްސްގެ ސަބަބުން ނޭދެވޭ އަސަރުކުރާނެ ކަމަށް ބުނެފައިވެ އެވެ.
ރަޝިއާގެ ފަތުރުވެރިކަމުގެ ސިނާއަތުން ބުނާ ގޮތުގައި 2026 އަދި 2027 ވަނަ އަހަރުގެ ފިނި މޫސުމުގެ ޕެކޭޖުތައް މިހާރު ވެސް ވަނީ އަގުކުރެވި، އޭގެ ތެރެއިން ބައެއް ޕެކޭޖުތައް ވަނީ ވިއްކާފަ އެވެ. އެހެންކަމުން ކުއްލިއަކަށް މިފަދަ ޓެކްސްއެއް އިތުރުވުމަކީ ރަޝިއާގެ ކުންފުނިތަކަށް މާލީގޮތުން ބޮޑެތި ގެއްލުންތަކެއް ލިބޭނެ ކަމެއް ކަމަށް އެ ޖަމިއްޔާއިން އިންޒާރުދެ އެވެ. ރަޝިއާއަކީ ރާއްޖޭގެ ފަތުރުވެރިކަމަށް މުހިންމު މާކެޓަކަށް ވާއިރު، މި މައްސަލައިގައި ރަޝިއާގެ ކުންފުނިތަކުގެ ފައިދާއާއި އެޖެންޓުންގެ އުޖޫރަ ޖީއެސްޓީގެ ދާއިރާއިން އިސްތިސްނާ ކުރުމަށް ނުވަތަ ގާނޫނީ ގޮތުން އަމަލީ ހައްލެއް ފެންނަންދެން މިކަން ފަސްކޮށްދިނުމަށް އާރްއެސްޓީ އިން ވަނީ ދިވެހި ސަރުކާރުގެ ކިބައިން އެދިފަ އެވެ.
