އިރާޤުގެ ޤާނޫނުހަދާ މަޖިލީހުގެ ކުރީގެ މެންބަރު އަޙްމަދު އަލް-ޢަލްވާނީ ބައިރޫތުގައި އަވަހާރަކޮށްލައިފި
11 ނޮވެމްބަރު 2026 | ބުދަ 07:02ލުބުނާނުގެ ބައިރޫތުގައި އަވަހާރަކޮށްލާފައިވާ އިރާޤުގެ ބަރުލަމާނުގެ ކުރީގެ މެންބަރު އަޙްމަދު އަލް-ޢަލްވާނީގެ މަރުގެ މައްސަލައިގައި ތުހުމަތުކުރެވޭ މީހަކު ހައްޔަރުކޮށް، އިތުރު ދެ މީހަކު ހޯދުމުގެ މަސައްކަތް ފަށައިފިއި. މިއީ، ސިޔާސީ ގޮތުން ރޭވިގެން ހިންގި ފިނޑި އަމަލެއް ކަމަށް އޭނާގެ އޮފީހުން ބުނާއިރު، މި މައްސަލަ ދެފުށް ފެންނަ ގޮތަށް ތަހުގީގުކުރުމަށް އިރާޤު ސަރުކާރުން ވަނީ ގޮވާލާފައި
އިރާޤުގެ ޤާނޫނުހަދާ މަޖިލީހުގެ ކުރީގެ މެންބަރު، އަޙްމަދު އަލް-ޢަލްވާނީ | ފޭސްބުކް
އިރާޤުގެ ޤާނޫނުހަދާ މަޖިލީހުގެ ކުރީގެ މެންބަރު އަޙްމަދު އަލް-ޢަލްވާނީ، ލުބުނާނުގެ ވެރިރަށް ބައިރޫތުގެ އެޕާޓްމަންޓެއްގެ ތެރޭގައި މަރުވެފައި އޮއްވާ ފެނިފައިވާ އިރު، އެ މައްސަލަ ބަލަމުންދަނީ ގަސްދުގައި މީހަކު މަރާލުމުގެ މައްސަލައެއްގެ ގޮތުގައި ކަމަށް ސަލާމަތީ މަސްދަރަކުން ބުނެފި އެވެ.
އަލް-ޢަލްވާނީ މަރުވި ސަބަބު އެ މަސްދަރުން ސީދާ ބަޔާންކޮށްފައި ނުވި ނަމަވެސް، އޭނާގެ ހަށިގަނޑު ފެނުނީ އަންގާރަ ދުވަހުގެ ހަވީރުގެ ވަގުތެއްގައި ބައިރޫތުގެ ޠަރީޤު އަލް-ޖަދީދާ ސަރަހައްދުގެ އެޕާޓްމަންޓަކުން ކަމަށް ލުބުނާނުގެ މަސްދަރުތަކުން ބުނެ އެވެ.
ތަހުގީގާއި ހައްޔަރުކުރުންތައް
މި މައްސަލައިގެ ތަހުގީގު ލުބުނާނުގެ ދާޚިލީ ސަލާމަތީ ބާރުތަކުގެ އިންފޮމޭޝަން ބްރާންޗުން ކުރިއަށްގެންދާއިރު، އެ ތަހުގީގު އެ ޤައުމުގެ އެންމެ އިސް ޕްރޮސެކިއުޓަރު، ގާޒީ އަޙްމަދު ރާމީ އަލް-ޙާއްޖު ބައްލަވަމުން ގެންދަވާ ކަމަށް ލުބުނާނުގެ ރަސްމީ އިދާރާތަކުން ބުންޏެވެ.
މި ތަހުގީގުގެ އިބްތިދާއީ ހޯދުންތަކުން ދައްކާ ގޮތުގައި އަލް-ޢަލްވާނީ އަވަހާރަކޮށްލާފައި ވަނީ ކަރުގައި ހިފާ ނޭވާ ހާސްކޮށްލައިގެން ކަމަށާއި، މި އަމަލުގައި ބައިވެރިވި ކަމަށް ތުހުމަތުކުރެވޭ ލުބުނާނުގެ ރައްޔިތަކު މިހާރު ހައްޔަރުކޮށްފައިވާ ކަމަށް އެ ޤައުމުގެ ޤަޟާއީ މަސްދަރަކުން ހާމަކުރި އެވެ. ހަމަމިއާއެކު، މި މައްސަލައިގައި ޝާމިލުވާ ކަމަށް ތުހުމަތުކުރެވޭ އަދި ފިލައިގެން އުޅޭ ސޫރިޔާގެ ދެ މީހަކު ހޯދުމުގެ މަސައްކަތް ކަމާބެހޭ ފަރާތްތަކުން ކުރަމުންދާ ކަމަށް ވެސް އެ މަސްދަރުން ބުންޏެވެ. މި ތުހުމަތުކުރެވޭ މީހުންނަކީ ވޭތުވެދިޔަ ހަފުތާގައި އަލް-ޢަލްވާނީ ބައިރޫތަށް ވަޑައިގެންނެވުމުން ވައިގެ ބަނދަރުން އޭނާ ހޮޓަލަށް ގެންދިޔަ މީހުން ކަމަށް އެ މަސްދަރުން އިތުރަށް ބުންޏެވެ.
އޮފީހުގެ ބަޔާން: "މިއީ ފިނޑި ޖަރީމާއެއް"
އަލް-ޢަލްވާނީ އަވަހާރަކޮށްލުމަކީ ދުރާލައި ރޭވިގެން ހިންގި "ސިޔާސީ އަވަހާރަކޮށްލުމެއް" އަދި "ޚިޔާނާތްތެރި ޖަރީމާއެއް" ކަމަށް އޭނާގެ އޮފީހުން ނެރުނު ބަޔާނުގައި ސިފަކޮށްފައިވެ އެވެ. މި އަމަލު ހިންގި ފަރާތްތައް ހޯދައި އިންސާފުގެ ކުރިމައްޗަށް ހާޒިރުކުރުމަށް ވެސް އެ ބަޔާނުގައި ވަނީ ގޮވާލާފަ އެވެ.
"މިއީ ހަމައެކަނި ތަޢުޒިޔާ ކިޔައި ކުށްވެރިކޮށްލުމަށް ފަހު ދޫކޮށްލެވޭނެ އާދައިގެ ހާދިސާއެއް ނޫން. މިއީ، މި ކަން ރޭވި ފަރާތްތަކާއި، ތަންފީޒުކުރި މީހުންނާއި، މި ކަމުގައި ބައިވެރިވި އެންމެން ހާމަކޮށްދޭނެ ހަރުދަނާ ރަސްމީ ފިޔަވަޅުތަކަކާއި ދެފުށް ފެންނަ ތަހުގީގެއް ބޭނުންވާ ޖަރީމާއެއް. މި ކަމުގެ ފަހަތުގައި ކޮންމެ ފަރާތެއް ވިޔަސް، އިންސާފުގެ ކުރިމަތިން އިސްތިސްނާވާނެ އެއްވެސް މީހަކު ނުހުންނާނެ،" އެ އޮފީހުން ނެރުނު ބަޔާނުގައި ބުނެފައިވެ އެވެ.
ސިޔާސީ ހަަޔާތްޕުޅާއި ތާރީޚު
އަލް-ޢަލްވާނީއަކީ އިރާޤުގެ ހުޅަނގު އަލް-އަންބާރު ޕްރޮވިންސް ތަމްސީލުކުރެއްވި ސުންނީ މަޒުހަބުގެ ފާހަގަކޮށްލެވޭ ސިޔާސީ ބޭފުޅެކެވެ. އޭނާ ސިޔާސީ މަޝްރަހުގައި އެންމެ ބޮޑަށް ވިދާލީ، އޭރުގެ ބޮޑުވަޒީރު ނޫރީ އަލް-މާލިކީގެ ޝީޢީ ސަރުކާރާ ދެކޮޅަށް 2012 އަދި 2013 ގައި ކުރިއަށްދިޔަ މުޒާހަރާތަކުގެ ތެރެއިންނެވެ. އެ މުޒާހަރާތަކުގެ ބައިވެރިން ތުހުމަތުކުރި ގޮތުގައި މާލިކީގެ ސަރުކާރުން ގެންގުޅުނީ މަޒުހަބީ ތަފާތުކުރުންތަކާއި ސުންނީން އެކަހެރިކުރުމުގެ ސިޔާސަތުތަކެކެވެ. މިއާއެކު، އަލް-ޢަލްވާނީ ފާހަގަކުރެވިފައި ވަނީ އިރާޤުގެ ކަންކަމުގެ ތެރެއަށް އީރާނުން ވަނުމާއި، އީރާނުގެ މަދަދު ލިބޭ ޝީޢީ ހަނގުރާމަވެރި ޖަމާޢަތްތަކުގެ ނުފޫޒަށް ފާޅުގައި އެންމެ ބޮޑަށް ފާޑުވިދާޅުވި އެއް ލީޑަރުގެ ގޮތުގަ އެވެ.
އައްރަމާދީގައި ހުންނަ އަލް-ޢަލްވާނީގެ ގެކޮޅަށް 2013 ޑިސެންބަރު ގައި ސަލާމަތީ ބާރުތަކުން ދިން ކުއްލި ހަމަލާއެއްގައި އޭނާގެ ކޮއްކޮއާއި އިތުރު ބަޔަކު މަރާލައި، އޭނާ ހައްޔަރުކުރި އެވެ. މި ގޮތުން، ޓެރަރިޒަމްގެ ކުށުގައި 2014 ގައި އޭނާއަށް މަރުގެ އަދަބު ކަނޑައެޅި ނަމަވެސް، ޖަލުގައި ދިހަ އަހަރަށްވުރެ ގިނަ ދުވަސް ހޭދަކުރެއްވުމަށް ފަހު އޭނާ މިނިވަންވީ، އިރާޤުގެ އާންމު މަޢާފުގެ ޤާނޫނުގެ ދަށުން 2025 އެޕްރީލު ގަ އެވެ.
އިރާޤު ސަފާރާގެ ރައްދު
މި ހާދިސާއާ ގުޅިގެން، ލުބުނާނުގައި ހުންނަ އިރާޤުގެ ސަފާރާއިން މި މައްސަލަ ވަރަށް ގާތުން ބަލަމުން އަންނަ ކަމަށް އެ ޤައުމުން ލުބުނާނަށް ކަނޑައަޅުއްވާފައި ހުންނަވާ ސަފީރު މުޙައްމަދު ރިޟާ އަލް-ޙުސައިނީ ވިދާޅުވި އެވެ. މި ޖަރީމާ ހިނގައިދިޔަ ގޮތުގެ ހަގީގަތްތައް ހާމަކުރުމަށް ޓަކައި ލުބުނާނުގެ ސަލާމަތީ އިދާރާތަކުގެ ފަހުގެ ރިޕޯޓަށް ސަފާރާއިން އިންތިޒާރުކުރަމުންދާ ކަމަށް ވެސް ސަފީރު ވިދާޅުވި އެވެ.
މަސްދަރު: އަލް ޖަޒީރާ
