ޑްރޯން ހަމަލާއަކާއެކު ކޫރްމޫރުގައި އަލިފާން ރޯވެ، އިރާޤުގެ ކުރުދީ ސަރަހައްދުގެ %70 އިން ކަރަންޓު ކެނޑިއްޖެ
9 ނޮވެމްބަރު 2026 | ހޯމަ 07:18އިރާޤުގެ ކުރުދީ ސަރަހައްދުގެ ގޭސް ދަނޑަކަށް ދިން ޑްރޯން ހަމަލާއަކާ ގުޅިގެން ކަރަންޓު އުފައްދާ މިންވަރު ދަށްވެ، އެ ސަރަހައްދުގެ ބޮޑު ބަޔަކުން ކަރަންޓުގެ ޚިދުމަތް ވަނީ މެދުކެނޑިފައި. މި ހަމަލާގެ ސަބަބުން އެއްވެސް މީހަކަށް ގެއްލުމެއް ލިބިފައި ނުވި ނަމަވެސް، މި ކަން ތަހުގީގު ކުރުމަށް އިރާޤުގެ ބޮޑުވަޒީރު ވަނީ ޚާއްސަ ކޮމިޓީއެއް އެކުލަވައިލައްވާފައި
އިރާޤުގެ އުތުރުގައި ކުރުދީން ދިރިއުޅޭ ސަރަހައްދުގައި އޮންނަ ކޫރްމޫރް ގޭސް ދަނޑުތައް | ރޮއިޓަރސް
އިރާޤުގެ އުތުރުގައި އޮންނަ ކުރުދީ ސަރަހައްދުގެ ކޫރްމޫރް ގޭސް ދަނޑަށް އަމާޒުކޮށް ދިން ޑްރޯން ހަމަލާއެއްގެ ސަބަބުން އެ ތަނުގައި އަލިފާން ރޯވެ، މުޅި ސަރަހައްދުން ކަރަންޓުގެ ޚިދުމަތް މެދުކެނޑިފައިވާ ކަމަށް އިރާޤާއި ކުރުދީ އޮފިޝަލުން ވިދާޅުވެއްޖެ އެވެ. އާދީއްތަ ދުވަހުގެ ރޭ ދިން މި ހަމަލާގެ ސަބަބުން ކުރުދީ ސަރަހައްދުގެ %70 އަށްވުރެ ބޮޑު ބަޔަކުން ވަނީ ކަރަންޓުގެ ޚިދުމަތް ކެނޑިފަ އެވެ.
މި ހަމަލާގެ ޒިންމާ އުފުލާފައި ވަނީ ކޮން ފަރާތަކުން ކަމެއް އަދި މިއީ އެމެރިކާއާއި އިސްރާއީލުން އީރާނާ ދެކޮޅަށް ކުރަމުންދާ ޣައިރުޤާނޫނީ ހަނގުރާމައާ ގުޅުމެއް އޮތް ކަމެއް ކަން އަދި ސާފެއް ނުވެ އެވެ. ހަމަމިއާއެކު، ސުލައިމާނިއްޔާ މުޙާފަޡާގައި އޮންނަ އެ ގޭސް ދަނޑު ހިމެނޭ ސަރަހައްދުން ދުމާއި އަލިފާންގަނޑު އަރަމުންދާ މަންޒަރު ފެންނަ ވީޑިއޯ ފުޓޭޖުތަކުގެ ސައްހަކަން ކަށަވަރުކުރެވިފައިވާ ކަމަށް މީޑިއާއިން ބުނެ އެވެ.
މި ހަމަލާގެ ސަބަބުން އަރްބީލް، ސުލައިމާނިއްޔާ، ބާޒިޔާން، ޗަމްޗަމާލް އަދި ދުހޯކްގެ އިންޖީނުގެތަކަށް ގޭސް ފޯރުކޮށްދިނުން މެދުކެނޑިފައިވާ ކަމަށް ކުރުދިސްތާން ސަރަހައްދީ ސަރުކާރުގެ ކަރަންޓާ ބެހޭ ވުޒާރާގެ ތަރުޖަމާނު އޮމީދު އަޙްމަދު ވިދާޅުވި އެވެ. މި ހަމަލާގެ ސަބަބުން ކަރަންޓު ވިއުގައަށް ފޯރުކޮށްދޭ ކަރަންޓުގެ ތެރެއިން 2،500 އާއި 2،800 މެގަވޮޓާ ދެމެދުގެ މިންވަރެއް އުފެއްދުން ހުއްޓުމަކަށް އައިސްފައިވާ ކަމަށް ވެސް އަޙްމަދު ވިދާޅުވި އެވެ. މި ގޮތުން، ފެން ސާފުކުރާ މަރުކަޒުތަކާއި ހަސްފަތާލުތައް ފަދަ ޒަރޫރީ ޚިދުމަތްދޭ ތަންތަނަށް، ފެނުން ހަކަތަ އުފައްދާ ސްޓޭޝަންތަކާއި ބަދަލު ތެލުގައި ހިންގާ އެހެނިހެން އިންޖީނުގެތައް ބޭނުންކޮށްގެން ކަރަންޓު ފޯރުކޮށްދޭނެ ކަމަށް ވެސް އެ ވުޒާރާއިން ވަނީ ހާމަކޮށްފަ އެވެ.
ގޮވާތަކެތި ހަރުކޮށްފައިވާ ޑްރޯން ކޫރްމޫރުގެ ގޭސް ރައްކާކުރާ މަރުކަޒަށް އަމާޒުވެ، މުޅި ކަރަންޓު ވިއުގަ މަސައްކަތްކުރާ މިންވަރު %70 އާއި %80 އާ ދެމެދުގެ މިންވަރަކަށް ދަށްވެފައިވާ ކަމަށް ސަލާމަތީ ބާރުތަކުން ބުންޏެވެ.
މި ހަމަލާއާ ގުޅިގެން ކުރި ފުރަތަމަ ވަޒަންކުރުންތަކަށް ބަލާއިރު އެއްވެސް މީހަކަށް ގެއްލުމެއް ލިބިފައި ނުވާ ކަމަށް އިރާޤުގެ ބޮޑުވަޒީރު ޢަލީ އައްޒައިދީ ވިދާޅުވި ކަމަށް މީޑިއާއިން ރިޕޯޓުކުރެ އެވެ. އަދި، ހަމަލާ ހިނގައިދިޔަ ގޮތް ތަހުގީގުކުރުމަށް ޓަކައި ކުރުދީ ސަރަހައްދުގެ ކަމާބެހޭ އިދާރާތަކާ ގުޅިގެން ހިންގާ ޖޮއިންޓް އިންވެސްޓިގޭޓިވް ކޮމިޓީއެއް އެކުލަވައިލުމަށް ބޮޑުވަޒީރު އައްޒައިދީ އަމުރުކުރައްވާފައިވާ ކަމަށް ވެސް މީޑިއާއިން ބުންޏެވެ.
މި ހަމަލާ ދީފައި ވަނީ ސަރަހައްދީ ނުތަނަވަސްކަން އިންތިހާއަށް ބޮޑުވެފައިވާ ދަނޑިވަޅެއްގަ އެވެ. ހަމަމިއާއެކު، ވޭތުވެދިޔަ އަހަރު ވެސް އެ މަރުކަޒަށް ޑްރޯން ހަމަލާއެއް އަމާޒުވެފައިވާއިރު، އެއްވެސް ޖަމާޢަތަކުން އެ ހަމަލާގެ ޒިންމާ އުފުލާފައެއް ނުވެ އެވެ.
މަސްދަރު: އަލް ޖަޒީރާ
