ބައްޝާރުގެ ވެރިކަން ވެއްޓުނު ފަހުން ފުރަތަމަ ފަހަރަށް އިރާޤުގެ ބޮޑުވަޒީރު ސޫރިޔާއަށް ވަޑައިގަންނަވައި ރައީސް އަލް-ޝަރަޢުއާ ބައްދަލުކުރައްވައިފި
29 އޮކްޓޯބަރު 2026 | ބުރާސްފަތި 08:01އިރާޤުގެ ތެޔޮ ސޫރިޔާ މަގުން ބޭރުކުރުމަށް ބާނިޔާސް ހޮޅިލައިން އަލުން ބޭނުންކުރުމަށާއި، ދަނޑުވެރިކަމާއި ވިޔަފާރީގެ ދާއިރާއިން ގުޅުން ބަދަހިކުރުމަށް ދެ ޤައުމުގެ އިސްވެރިން މަޝްވަރާކުރައްވައިފި. މި މަޝްރޫޢުތައް ތަންފީޒުކުރުމަށް އެމެރިކާގެ ޝެވްރޯން ކުންފުނި ހިމެނޭ ކޮންސޯޓިއަމަކާއެކު ފަހުމުނާމާއެއްގައި ސޮއިކޮށްފައިވާއިރު، މިއީ ސަރަހައްދީ ސަލާމަތާއި އިގުތިސާދީ ފުދުންތެރިކަން އިތުރުކުރުމަށް އެޅުނު މުހިންމު ފިޔަވަޅެއް
އިރާޤުގެ ރައީސް ޢަލީ އަލް-ޒައިދީ ސޫރިޔާއަށް ކުރެއްވި ދަތުރުފުޅުގައި އެ ޤައުމުގެ ރައީސް އަޙްމަދު އަލް-ޝަރަޢުއާ ބައްދަލުކުރައްވަނީ | ރޮއިޓަރސް
ބައްޝާރު އަލް-އަސަދުގެ ވެރިކަން ވެއްޓުނު ފަހުން، އިރާޤުގެ ބޮޑުވަޒީރަކު ސޫރިޔާއަށް ކުރެއްވި ފުރަތަމަ ރަސްމީ ދަތުރުފުޅުގައި، އިރާޤުގެ ބޮޑުވަޒީރު ޢަލީ އަލް-ޒައިދީ ދިމިޝްޤަށް ވަޑައިގަންނަވައި ސޫރިޔާގެ ރައީސް އަޙްމަދު އަލް-ޝަރަޢުއާ ބައްދަލުކުރައްވައިފި އެވެ. މި ދަތުރުފުޅަކީ އަވައްޓެރި ދެ ޤައުމުގެ ދެމެދުގައި އޮތް ގުޅުން ހަރުދަނާކޮށް، އިގުތިސާދީ އަދި ތެލުގެ ދާއިރާއިން އެއްބާރުލުން އިތުރުކުރުމުގެ މަގުސަދުގައި ކުރެއްވި ދަތުރުފުޅެކެވެ.
ދެ ޤައުމުގެ އިސް ވެރިންގެ މި މަޝްވަރާތަކުގައި މައިގަނޑު ގޮތެއްގައި އަލިއަޅުއްވާލެއްވީ ބާނިޔާސް ހޮޅިލައިން މެދުވެރިކޮށް އިރާޤުގެ ތެޔޮ ބޭރުކުރުމަށާއި، ދެމެދުގައި ކުރެވޭ ވިޔަފާރީގެ މިންވަރު ފުޅާކުރުމަށެވެ. މިއާއެކު، ކާބޯތަކެއްޗާއި އިގުތިސާދީ ފުދުންތެރިކަން ހާސިލުކުރުމަށް ޓަކައި ދަނޑުވެރިކަމުގެ ދާއިރާ ތަރައްގީކުރުމަށް ގުޅިގެން މަސައްކަތްކުރުމާ ގުޅޭގޮތުން ވެސް ދެ ބޭފުޅުން މަޝްވަރާކުރެއްވި އެވެ.
އެމެރިކާ އިސްވެ އީރާނާ ދެކޮޅަށް ފެށި ޣައިރުގާނޫނީ ހަނގުރާމައާ ގުޅިގެން، އިރާޤުން ދާދި ފަހުން ވަނީ ސޫރިޔާ މަގުން މަދު މިންވަރަކަށް ތެޔޮ ބޭރުކުރަން ފަށާފަ އެވެ. މި ގޮތުން، އިރާޤުގެ ތެޔޮ އުފުލުމަށް ޓަކައި ޙަދީޘާ-ބާނިޔާސް ހޮޅިލައިން އަލުން ބޭނުންކުރަން ފެށުމުގެ އެއްބަސްވުންތަކުގައި ދެ ޤައުމުން ސޮއިކުރީ ޖުލައި މަހުގަ އެވެ. ހަމަމިއާއެކު، އެ މަޝްރޫޢު ތަންފީޒުކުރުމަށް ޓަކައި ތިން ކުންފުންޏެއްގެ މައްޗަށް އެކުލެވޭ ކޮންސޯޓިއަމަކާއެކު ފަހުމުނާމާއެއްގައި ސޮއިކޮށްފައިވާއިރު، އޭގެ ތެރޭގައި އެމެރިކާގެ ހަކަތައިގެ ބޮޑު ކުންފުނި ޝެވްރޯން ޚާއްސަ ގޮތެއްގައި ހިމެނެ އެވެ.
"އިރާޤާއި ސޫރިޔާގެ ރައްޔިތުންނަކީ ދެ ޤައުމެއްގައި ތިބި އެއް ބައެއް،" ދެ ޤައުމުގެ ގުޅުމާ ގުޅޭގޮތުން ވާހަކަފުޅު ދައްކަވަމުން އަލް-ޒައިދީ ވިދާޅުވި އެވެ. އަދި، ޚާއްސަކޮށް އިގުތިސާދީ އަދި އިޖުތިމާޢީ ކަންކަން ހިމެނޭހެން އެކި ދާއިރާތަކުން ބައިވެރިވުން ތަރައްގީކުރުމަށާއި، ސަލާމަތީ އެއްބާރުލުން ވަރުގަދަކުރުމަށާއި، ސަރަހައްދީ އަދި ބައިނަލްއަގުވާމީ މައްސަލަތަކުގައި އެއް ވިސްނުމެއް ގެންގުޅެ، ސަރަހައްދީ ސުލްހައާއި ހަމަޖެހުން ގާއިމުކުރުމަށް ގުޅިގެން މަސައްކަތްކުރުމުގެ މުހިންމުކަން ވެސް އަލް-ޒައިދީ ފާހަގަކުރެއްވި އެވެ.
ސޫރިޔާގެ ރައީސް އަލް-ޝަރަޢު ވަނީ ބޮޑުވަޒީރު އަލް-ޒައިދީއާއި އޭނާގެ އަރިހުގައި ވަޑައިގެންނެވި ވަފުދުގެ މި ޒިޔާރަތުގެ އަގު ވަރަށް ބޮޑަށް ވަޒަންކުރައްވާ ކަމަށް ވިދާޅުވެފަ އެވެ. މި ބައްދަލުކުރެއްވުމުގައި ދެ ޤައުމުގެ ގުޅުމުގެ ބަދަހިކަމުގެ މައްޗަށް އަލިއަޅުއްވާލައްވަމުން، ދެ ޤައުމުގެ މެދުގައި އެންމެ މަތީ ދަރަޖައިގެ އެއްބާރުލުން ގާއިމުކުރުމަށް ސޫރިޔާއިން އަބަދުވެސް ބޭނުންވާ ކަމަށް ރައީސް އަލް-ޝަރަޢު ވިދާޅުވި އެވެ.
އަލް-ޝަރަޢުއާއި ބޮޑުވަޒީރު އަލް-ޒައިދީ މީގެ ކުރިން ބައްދަލުކުރައްވާފައި ވަނީ ސެޕްޓެންބަރު މަހު އެމެރިކާގެ ނިއު ޔޯކުގައި ބޭއްވި އދ.ގެ އާންމު މަޖިލީހުގެ ހަވާސާގަ އެވެ. އެ ބައްދަލުވުމުގައި ވެސް ސިޔާސީ އަދި ސަލާމަތީ ގޮތުން ވިލަރެސްކުރުން އިތުރުކުރުމަށާއި، އިގުތިސާދީ އަދި ވިޔަފާރީގެ ގުޅުން ފުޅާކުރުމާ ގުޅޭގޮތުން ދެ ބޭފުޅުން ވަނީ މަޝްވަރާކުރައްވާފަ އެވެ.
މަސްދަރު: އަލް ޖަޒީރާ
