އިރާޤުގެ ސަރަހައްދުން އަވައްޓެރިންނަށް އަމާޒުވާ ހަމަލާތަކުގެ ހެކި ފެނިއްޖެ، ތެލުގެ ވިޔަފާރިން 60 ބިލިޔަން ޑޮލަރުގެ ގެއްލުމެއް
8 ނޮވެމްބަރު 2026 | އާދީއްތަ 08:53އިރާޤުގައި ހަރަކާތްތެރިވާ ހަތިޔާރުއެޅި ޖަމާޢަތްތަކުގެ ހަތިޔާރު ދައުލަތުގެ ބާރުގެ ދަށަށް ގެނައުމަށް ބަޣުދާދުން މަޝްވަރާކުރަމުންދާއިރު، އީރާނާއެކު އޮންނަ ބޯޑަރުގެ ބައެއް ދޮރުތައް ބަންދުކުރުމަށް އެމެރިކާއިން ވަނީ އެދިފައި. އަދި، ހުރްމުޒް ކަނޑުއޮޅި ބަންދުވުމުން ލިބުނު ބޮޑު ގެއްލުމަށްފަހު އަލުން ތެޔޮ ބޭރުކުރަން ފަށާފައިވާއިރު، އައިއެސްއާ ދެކޮޅަށް މަސައްކަތްކުރުމަށް އަވައްޓެރި ޤައުމުތަކާއެކު ޚާއްސަ ކޮމިޓީއެއް ވަނީ އެކުލަވާލާފައި
އިރާޤުގެ ޚާރިޖީ ވަޒީރު ފުޢާދު ޙުސައިން ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަނީ | ރޮއިޓަރސް
އަވައްޓެރި ޤައުމުތަކަށް ހަމަލާދިނުމަށް ޓަކައި ބޭރުގެ އެކި ފަރާތްތަކުން އިރާޤުގެ ސަރަހައްދު ބޭނުންކުރަމުންދާ ކަމުގެ ހެކި އެބަހުރި ކަމަށް އެ ޤައުމުގެ ޚާރިޖީ ވަޒީރު ފުއާދު ޙުސައިން ހޮނިހިރު ދުވަހު ވިދާޅުވެއްޖެ އެވެ. އިރާޤުގެ ސަރަހައްދުން ގަލްފުގެ ޤައުމުތަކަށް އަމާޒުކޮށް ދެމުންދާ ހަމަލާތައް ބަޣުދާދުން މިހާރު ތަހުގީގުކުރަމުންދާއިރު، ސަޢުދީ ޢަރަބިއްޔާއާ ދެމެދު އުފެދިފައިވާ ޚިޔާލުތަފާތުވުންތައް މަޝްވަރާގެ މަގުން ހައްލުކުރުމަށް އިރާޤުން އެދޭ ކަމަށް އޭނާ ވިދާޅުވި އެވެ.
ސަރަހައްދީ ހަމަލާތަކުގެ ތަހުގީގާއި ހަތިޔާރުއެޅި ޖަމާޢަތްތަކުގެ މައްސަލަ
ސަޢުދީ ޢަރަބިއްޔާގެ ތެލުގެ އުމްރާނީ ވަސީލަތްތަކަށް ހަމަލާދޭ ކަމުގެ ތުހުމަތު، އިރާޤުގައި ހަރަކާތްތެރިވާ އީރާނާ ގުޅުން އޮންނަ ޖަމާޢަތްތަކުގެ މައްޗަށް އެ ޤައުމުން ވަނީ ކޮށްފަ އެވެ. ސަޢުދީ ޢަރަބިއްޔާގެ އިރުމައްޗާއި ހުޅަނގު ގުޅުވައިދޭ ތެޔޮ ހޮޅިލައިނަށް އަމާޒުކޮށް ދާދިފަހުން ދިން ޑްރޯން ހަމަލާތަކަކީ އިރާޤުގެ ސަރަހައްދުން ފޮނުވާލި ހަމަލާތަކެއްކަން ސެޕްޓެންބަރު މަހު ބަޣުދާދުން ވަނީ ކަށަވަރުކޮށްދީފައި އެވެ.
މި ގޮތުން، އީރާނާ ގުޅުން އޮންނަ ހަތިޔާރުއެޅި ޖަމާޢަތްތަކުގެ ހަތިޔާރުތައް ދައުލަތުގެ ބާރުގެ ދަށަށް ގެނައުމަށް ބަޣުދާދުން އެ ފަރާތްތަކާ އެކު މަޝްވަރާކުރަމުންދާ ކަމަށާއި، މި ކަން ކުރިއަށް ގެންދަންވާނީ ބާރުގެ ބޭނުންކުރުމުގެ ބަދަލުގައި ސުލްހަވެރި މަޝްވަރާގެ އުސޫލުން ކަމަށް ޙުސައިން ވިދާޅުވި އެވެ. ހަމަމިއާއެކު، އިރާޤުގެ އެކި ޖަމާޢަތްތަކުގެ އަތުގައި ހުރި ހަތިޔާރުތަކުގެ މައްސަލައިގައި ތެހެރާނާއެކު ވެސް މުއާމަލާތު ކުރެވެމުންދާ ކަން އޭނާ ފާހަގަކުރެއްވި އެވެ.
ބޯޑަރުގެ ނިންމުންތަކާއި އެމެރިކާ އަދި އީރާނުގެ ނުފޫޒު
ނިރުބަވެރި ޖަމާޢަތެއް ކަމަށްވާ 'އައިއެސް' އާ ދެކޮޅަށް އެމެރިކާ އިސްވެ އޮންނަ ބައިނަލްއަގުވާމީ އިއްތިހާދުގެ ދައުރު ނިންމައި އެ ޤައުމުން ފައިބަން ހަމަޖެހިފައި އޮތް ސެޕްޓެންބަރު 30 ގެ ނިޔަލަށް ހަތިޔާރުތައް ދައުލަތުގެ ބާރުގެ ދަށަށް ގެނައުމަށް ހަތިޔާރުއެޅި ޖަމާޢަތްތަކަށް އިރާޤު ސަރުކާރުން ކުރިން މުހުލަތެއް ދީފައިވާ ކަމަށް މީޑިއާ ރިޕޯޓުތައް ބުނެ އެވެ. ނަމަވެސް، ހަތިޔާރު ދޫކޮށްލުމަށް ވެފައިވާ ވަޢުދު ފުއްދުމަށް އެމެރިކާއިން ދިގު މުއްދަތަކަށް ފިއްތުންތައް ކުރިމަތިކުރި ނަމަވެސް، އެ ސިޔާސަތަށް ކުރިމަތިވި ދެކޮޅުވެރިކަމާ ގުޅިގެން އެ މުހުލަތު މިހާރު ވަނީ 2027 ޖޫންގެ ނިޔަލަށް ފަސްކޮށްފަ އެވެ.
މިއާއެކު، ތެހެރާނާއި ވޮޝިންގޓަނާ ދެމެދު އިރާޤުން ގެންގުޅޭ ހަމަހަމަ ސިޔާސަތާ ގުޅޭގޮތުން ވާހަކަފުޅު ދައްކަވަމުން، އީރާނާއެކު އޮންނަ ބޯޑަރު ހުރަސްކުރާ ދޮރުތަކުގެ ތެރެއިން ދެ ދޮރު ފިޔަވައި ހުރިހާ ދޮރެއް ބަންދުކުރުމަށް އެމެރިކާއިން ރަސްމީކޮށް އެދިފައިވާ ކަން ޙުސައިން ކަށަވަރުކޮށްދެއްވި އެވެ. ތެހެރާނާއެކު އޮންނަ އެކުވެރިކަމަށާއި އިއްތިހާދަށް އިރާޤުން މަރުހަބާ ކިޔާ ނަމަވެސް، އެ ޤައުމުގެ ދާޚިލީ ކަންކަމުގެ ތެރެއަށް ބޭރުގެ ފަރާތްތަކުން ނުފޫޒު ފޯރުވުމަށް އިންކާރުކުރާ ކަމަށް އޭނާ ވިދާޅުވި އެވެ.
ހުރްމުޒް ކަނޑުއޮޅީގެ ގެއްލުމާއި ސަރަހައްދީ ކޮމިޓީ
ހުރްމުޒް ކަނޑުއޮޅި މެދުވެރިކޮށް ތެޔޮ ބޭރުކުރުން މެދުކަނޑާލަން ޖެހުމުގެ ސަބަބުން އިރާޤަށް ގާތްގަނޑަކަށް 60 ބިލިޔަން އެމެރިކާ ޑޮލަރުގެ ގެއްލުން ވެފައިވާ ކަމަށާއި، ނަމަވެސް ވޮޝިންގޓަނާއި ތެހެރާނާ ދެމެދު އެއްބަސްވުންތަކަކަށް އާދެވުމާ ގުޅިގެން މިހާރު އަލުން ތެޔޮ ބޭރުކުރަން ފަށާފައިވާ ކަމަށް ޚާރިޖީ ވަޒީރު ވިދާޅުވި ކަމަށް މީޑިއާ ރިޕޯޓުތައް ބުނެ އެވެ.
ހަމަމިއާއެކު، ބައިނަލްއަގުވާމީ އިއްތިހާދުގެ ސިފައިން ފޭބުމަށްފަހު އައިއެސްއާ ދެކޮޅަށް މަސައްކަތްކުރުމާ ގުޅޭގޮތުން ވާހަކަފުޅު ދައްކަވަމުން، ސޫރިޔާގައި އެ ޖަމާޢަތުގެ ހަރަކާތްތަކާ ދެކޮޅަށް ހަނގުރާމަކުރުމަށް އިރާޤާއި ސޫރިޔާ، އުރުދުން އަދި ތުރުކީވިލާތާ ގުޅިގެން ޚާއްސަ ކޮމިޓީއެއް އެކުލަވާލާފައިވާ ކަމަށް ވެސް ޙުސައިން ވިދާޅުވި އެވެ.
މަސްދަރު: އަލް ޖަޒީރާ
