އީރާނާ ދެކޮޅަށް އަލުން ހަނގުރާމަ ފަށަން އިސްރާއީލުން ތައްޔާރުވަމުންދާ ކަން ހާމަވެއްޖެ
1 ނޮވެމްބަރު 2026 | އާދީއްތަ 08:39އީރާނަށް ހަމަލާދިނުމުގެ އަސްކަރީ ތައްޔާރީތައް އިސްރާއީލުން ފުރިހަމަކޮށްފައިވީ ނަމަވެސް، ހަނގުރާމަ ފެށުމުގެ އެންމެ ފަހުގެ ނިންމުން ބިނާވެފައި ވަނީ އެމެރިކާގެ ރައީސް ޑޮނަލްޑް ޓްރަމްޕްގެ ނިންމެވުމެއްގެ މައްޗަށް. މި ދަނޑިވަޅަކީ ޤަތަރު މެދުވެރިވެގެން އެމެރިކާއާއި އީރާނާ ދެމެދު ނުސީދާ މަޝްވަރާތަކެއް ކުރިއަށްދާ ވަގުތެއް ކަމުން، އަސްކަރީ ބާރުގެ ބޭނުންކޮށްގެން އީރާނަށް މަޖުބޫރުކުރުވުމުގެ ފުރުސަތު ބޮޑު. މި ފަދަ ކުރިމަތިލުމެއްގެ ތެރެއަށް ހިޒްބުﷲ ވަދެއްޖެނަމަ ހަނގުރާމަ ލުބުނާނަށް ފެތުރި، އިސްރާއީލުގެ ދިފާޢީ ނިޒާމަށް ބޮޑެތި ގޮންޖެހުންތަކެއް ކުރިމަތިވެދާނެ ކަމުގެ އިންޒާރު މަސްދަރުތަކުން ދޭ
ޔަހޫދީ އިސްރާއީލުގެ ވައިގެ ސިފައިންގެ އެފް-15 މަރުކާގެ އަސްކަރީ މަތިންދާބޯޓެއް ތެލް އަވީވުގެ ރަށްބޭރުގެ ވައިގެ ސަރަހައްދުން ދަތުރު ކުރަނީ | ގެޓީ އިމޭޖަސް
އީރާނާ ދެކޮޅަށް އަލުން ހަނގުރާމަ ފެށުމަށް ބޭނުންވާ އެންމެހައި ދިފާޢީ އަދި ހަމަލާދިނުމުގެ ތައްޔާރީތައް ޔަހޫދީ އިސްރާއީލުގެ ސިފައިން ފުރިހަމަކޮށްފައިވާ ކަމަށާއި، އަލުން ހަމަލާތައް ފެށުމާ ގުޅޭ އަސްކަރީ އިޚުތިޔާރުތައް އެމެރިކާގެ ސެންޓްރަލް ކޮމާންޑުގެ ވެރިޔާ އެޑްމިރަލް ބްރެޑް ކޫޕަރ ރައީސް ޑޮނަލްޑް ޓްރަމްޕަށް ހުށަހަޅުއްވައިފި އެވެ. މި ކަން އެންމެ ފުރަތަމަ ރިޕޯޓުކޮށްފައި ވަނީ ޔަހޫދީ އިސްރާއީލުގެ ނޫހަކުންނެވެ.
ދެ ފަރާތުގެ ދެމެދުގައި ހަނގުރާމަ އަލުން ފެށިދާނެ އެންމެހައި ހާލަތްތަކަށް އިސްރާއީލުގެ އަސްކަރިއްޔާއިން ފުރިހަމައަށް ތައްޔާރުވެ ނިމިފައި ވީނަމަވެސް، އަލުން ހަނގުރާމައަކަށް ދިއުމުގެ އެންމެ ފަހުގެ ނިންމުން ބިނާވެފައި އޮތީ ޓްރަމްޕްގެ ނިންމެވުމެއްގެ މައްޗަށެވެ. މިއީ ވޮޝިންގޓަނާއި ތެހެރާނާ ދެމެދު ސިޔާސީ ގޮތުން ނުސީދާ މަޝްވަރާތަކެއް ކުރިއަށްދާ ދަނޑިވަޅެކެވެ.
ސިޔާސީ ނިންމުމާއި އަސްކަރީ ފަރިތަކުރުންތައް
ސިޔާސީ އިސް މަސްދަރުތަކާ ހަވާލާދީ އިސްރާއީލުގެ 'ޔެދިއޯތު އަޚަރޮނޯތު' ނޫހުން ބުނީ، އިސްރާއީލު މިހާރު އޮތީ އީރާނާއެކު ހަނގުރާމައިގެ އިތުރު ބުރަކާ ވަރަށް ބޮޑަށް ގާތްވެފައި ކަމަށެވެ. ނަމަވެސް، މި ކުރިމަތިލުން ފެށުމުގެ އެއްވެސް ބާރެއް އިސްރާއީލުގެ ސިޔާސީ އަދި އަސްކަރީ ލީޑަރުންގެ އަތްމަތީގައި ނެތް ކަމަށާއި، މި ކަން ބިނާވެފައި އޮތީ ތެހެރާނާއެކު އެއްބަސްވުމަކަށް ދިއުމަށް ޓްރަމްޕް މަސައްކަތްޕުޅު ކުރެއްވުމަށް ނުވަތަ އިސްރާއީލާ ގުޅިގެން އަލުން ހަމަލާތައް ފެށްޓެވުމަށް ނިންމަވާ ނިންމެވުމެއްގެ މައްޗަށް ކަމަށް އެ މަސްދަރުތަކުން ބުންޏެވެ.
މި ތައްޔާރީތަކަކީ ހަމައެކަނި ރޭވުންތެރިކަމުގެ ފެންވަރުގައި ހިނގާ ކަންކަމެއް ނޫން ކަމަށް އެ ނޫހުން ބުންޏެވެ. މި ގޮތުން، އިސްރާއީލުގެ ވައިގެ ސިފައިން ވަނީ ސޫރިޔާ އަދި އިރާޤުގެ ވައިގެ ސަރަހައްދު ހުރަސްކޮށް އީރާނުގެ ސަރަހައްދީ ރޮނގާ ދިމާއަށް ގިނަ އަދަދެއްގެ އަސްކަރީ މަތިންދާބޯޓުތަކާއި ވައިގެ ތެރޭގައި ތެޔޮ އަޅައިދޭ ބޯޓުފަހަރު ބޭނުންކޮށްގެން އުދުހުންތައް ބާއްވައި، ހަމަލާދެވިދާނެ މަގުތައް އެއްފަހަރަށް ވުރެ ގިނަ ފަހަރު ފަރިތަކޮށްފަ އެވެ.
ވޮޝިންގޓަންގެ ބައްދަލުވުމާއި އަސްކަރީ އެހީގެ ދަތުރުތައް
އެމެރިކާގެ ދިފާޢީ ވަޒީރު ޕީޓް ހެގްސެތު އަދި ޖޮއިންޓް ޗީފްސް އޮފް ސްޓާފްގެ ޗެއާމަން ޑޭން ކެއިން ބައިވެރިވެވަޑައިގެންނެވި ޚާއްސަ ބައްދަލުވުމެއްގައި، އީރާނަށް ހަމަލާދިނުމާ ގުޅޭ އަސްކަރީ އިޚުތިޔާރުތައް ބްރެޑް ކޫޕަރ ވަނީ ޓްރަމްޕާ ހިއްސާކުރައްވާފަ އެވެ. ނަމަވެސް، އަލުން ހަނގުރާމަ ފެށުމާމެދު މި ބައްދަލުވުމުގައި އެއްވެސް ނިންމުމެއް ނިންމާފައި ނުވާ ކަމަށް އެ ނޫހުން ފާހަގަކުރި އެވެ.
މީޑިއާ ރިޕޯޓުތަކާ ހަވާލާދީ ނޫހުން ރިޕޯޓުކުރި ގޮތުގައި، މެދުއިރުމަތީގެ ސަރަހައްދަށް އަސްކަރީ ސާމާނު ގެނައުމަށް ހިންގާ ވައިގެ އޮޕަރޭޝަނުގެ ދަށުން، ފާއިތުވި ދުވަސްތަކުގައި އެމެރިކާ އަސްކަރިއްޔާގެ މުދާ އުފުލާ 10 މަތިންދާބޯޓު ވަނީ އިސްރާއީލުގެ ވައިގެ އަސްކަރީ މަރުކަޒުތަކަށް ޖައްސާފަ އެވެ. މިއީ، އެ ސަރަހައްދުގައި އެމެރިކާގެ ފައުޖުތައް އިތުރަށް ވަރުގަދަކުރުމާއި އަސްކަރީ އޮޕަރޭޝަންތައް އަލުން ފެށުމަށް ވަމުންދާ ތައްޔާރީތަކާ އެއް ދަނޑިވަޅެއްގައި ހިނގި ކަމެއް ކަމަށް ވެސް އެ ނޫހުން ބުންޏެވެ.
އިސްތިރާޖީ އަމާޒުތަކުގެ ދަތިކަމާއި ލުބުނާނުގެ ނުރައްކާ
އިސްރާއީލުގެ ނޫހުން ބުނީ، މި ފަދަ އޮޕަރޭޝަނެއް ހިންގުމުގައި ކުރިމަތިވެފައިވާ މައިގަނޑު ގޮންޖެހުމަކީ އެމެރިކާގެ ސާފު އިސްތިރާޖީ އަމާޒުތަކެއް ނެތުން ކަމަށެވެ. އެ މަސްދަރުތަކުން ފާހަގަކުރި ގޮތުގައި، އީރާނުގެ ނިއުކްލިއަރ ވަސީލަތްތަކަށާއި، މިސައިލް ނިޒާމުތަކަށާއި، އަސްކަރީ ގާބިލުކަންކަމަށް ވައިގެ މަގުން ދޭ ހަމަލާތަކަކީ އެ ޤައުމުގެ ސަރުކާރު ވައްޓާލެވޭނެ ނުވަތަ އެ ޤައުމުގެ ސިޔާސަތުތައް ބަދަލުކުރެވޭނެ ކަންކަމެއް ނޫނެވެ. އޭގެ ބަދަލުގައި، އެމެރިކާއަށް ފައިދާހުރި ޝަރުތުތަކެއްގެ މަތިން އެއްބަސްވުމަކަށް އައުމަށް ތެހެރާނަށް މަޖުބޫރުކުރުވުމުގެ ގޮތުން ވޮޝިންގޓަނުން އަސްކަރީ އިންޒާރުތައް ބޭނުންކޮށްފާނެ ކަމަށް މަސްދަރުތަކުން ބުންޏެވެ.
ހަމަމިއާއެކު، އީރާނުގެ ނިއުކްލިއަރ ޕްރޮގްރާމާއި، މިސައިލް ނިޒާމުތަކާއި، ހަތިޔާރު އެޅުމާ މެދު އިސްރާއީލުން ފާޅުކުރާ ކަންބޮޑުވުންތަކަށް ހައްލެއް ނުލިބޭ އެއްވެސް އެއްބަސްވުމަކުން، އިސްރާއީލަށް ކުރިމަތިވެފައިވާ ކަމަށް ބުނާ ނުރައްކާތައް ފިލައިގެން ނުދާނެ ކަމަށް ވެސް އެ މަސްދަރުތަކުން ވަކާލާތުކުރި އެވެ.
މީގެ އިތުރުން، ކުރިން ވެސް ކަން ހިނގައިދިޔަ ފަދައިން މި ކުރިމަތިލުމުގެ ތެރެއަށް ޙިޒްބުﷲ ވަދެއްޖެނަމަ، ހަނގުރާމަ ލުބުނާނަށް ފެތުރިގެން ހިނގައިދާނެ ކަމުގެ އިންޒާރު ވެސް މަސްދަރުތަކުން ދިނެވެ. އެ ފަދަ ހާލަތެއް މެދުވެރިވެއްޖެނަމަ، ހަނގުރާމަ ދިގުދެމިގެން ގޮސް އިސްރާއީލުގެ ވައިގެ ދިފާޢީ ނިޒާމުތަކަށާއި، މިސައިލް ވައްޓާލާ އިންޓަސެޕްޓަރ މިސައިލްގެ ސްޓޮކަށް ބޮޑެތި ބުރަތަކެއް އުފުލަންޖެހިދާނެ ކަމަށް އެ ފަރާތްތަކުން ބުންޏެވެ.
ދޯހާގެ ނުސީދާ މަޝްވަރާތަކާއި ހަނގުރާމައިގެ ފަސްމަންޒަރު
އަސްކަރީ ތައްޔާރީތަކުގެ އިތުރުން، ޤަތަރު މެދުވެރިވެގެން އެމެރިކާއާއި އީރާނާ ދެމެދު ސީދާ މަޝްވަރާތަކަށް މަގުފަހިކުރުމަށް ހިންގާ ނުސީދާ ގުޅުންތަކުގައި ކުރިއެރުންތަކެއް ލިބެމުންދާ ކަމަށް ވެސް އެ ނޫހުން ރިޕޯޓުކުރި އެވެ. މި މަޝްވަރާތައް އަމާޒުކުރެވިފައި ވަނީ އީރާނުގެ ނިއުކްލިއަރ މައްސަލައާއި، ހުރްމުޒް ކަނޑުއޮޅީގެ ސަލާމަތާއި، އަދި ތެހެރާނަށް ދެވޭނެ އިގުތިސާދީ އިނާޔަތްތަކުގެ މައްޗަށެވެ. އަދި، މި ފަދަ އެއްބަސްވުމެއްގެ ޔަގީންކަން ދޭ ޤައުމުތަކުގެ ގޮތުގައި ޗައިނާ އަދި ރަޝިޔާ ހަމަޖެހުމުގެ ފުރުސަތު އޮތް ކަމަށް ވެސް ރިޕޯޓުގައިވެ އެވެ.
ނޫހުގެ ރިޕޯޓު ނިންމާލަމުން ފާހަގަކޮށްފައި ވަނީ، އިސްރާއީލަށް އޮތް މައިގަނޑު ގޮންޖެހުމަކީ ހަމައެކަނި އިތުރު ހަމަލާއަކަށް ތައްޔާރުވުން ނޫން ކަމަށެވެ. އޭގެ އިތުރުން، ދެވޭ ކޮންމެ އަސްކަރީ ހަމަލާއަކީ އިސްރާއީލުގެ ދުރު-ރާސްތާގެ ސަލާމަތީ މަސްލަހަތުތަކަށް ޚިދުމަތްކުރާ، ސާފު ލަނޑުދަނޑިތަކަކާއި، ހަނގުރާމަ ނިންމާނެ ޝަރުތުތަކަކާއި، އަދި ހާސިލުކުރަން ބޭނުންވާ ނަތީޖާތަކެއް ކަނޑައެޅިފައިވާ ކަމެއްކަން ކަށަވަރުކުރުމެވެ.
މި ހަނގުރާމަ އެންމެ ފުރަތަމަ ފެށުނީ ފެބުރުވަރީ 28 ގައި އެމެރިކާއާއި އިސްރާއީލުން ގުޅިގެން އީރާނަށް ދިން ހަމަލާތަކާ ގުޅިގެންނެވެ. އެއަށްފަހު އެޕްރީލު މަހު ހަނގުރާމަ ހުއްޓާލުމުގެ އެއްބަސްވުމަކަށް އާދެވުނު ނަމަވެސް، މަޝްވަރާތައް ހުއްޓުމަކަށް އައުމާ ގުޅިގެން ޖުލައި މަހު ވޮޝިންގޓަނާއި ތެހެރާނާ ދެމެދު އަނެއްކާ ވެސް ހަނގުރާމަ ވަނީ ފެށިފަ އެވެ.
މަސްދަރު: ރޮއިޓަރސް
