ރަސްމާލެ ހިއްކުމުގެ މުޅި މަޝްރޫއަށް ޚަރަދުވާނީ 330 މިލިއަން ޑޮލަރު: މިނިސްޓަރު މުއްތަލިބު

ރަސްމާލެ މަޝްރޫއުގެ ދަށުން މުޅި ފަޅު ހިއްކައި ނިންމުމަށް ޚަރަދުވާނީ ގާތްގަނޑަކަށް 330 މިލިއަން ޑޮލަރު (ގާތްގަނޑަކަށް 5.1 ބިލިއަން ރުފިޔާ) ކަމަށް މިނިސްޓަރ އޮފް އިންފްރާސްޓްރަކްޗަރ، ހައުސިންގ އެންޑް އަރބަން ޑިވެލޮޕްމަންޓް ޑރ. އަބްދުﷲ މުއްތަލިބު ވިދާޅުވެއްޖެ އެވެ.

ނަމަވެސް މިނިސްޓަރު މުއްތަލިބު މީގެ ކުރިން ވިދާޅުވީ، ރަސްމާލެ ހިއްކުމުގެ މަޝްރޫއަށް 500 މިލިއަން ޑޮލަރާއި 700 މިލިއަން ޑޮލަރާ ދެމެދުގެ އަދަދެއް ހަރަދުވާނެ ކަމަށެވެ. 

Advertisement

 ހޯމަ ދުވަހުގެ ރޭ ބޭއްވި "އަހާ" ފޯރަމްގައި ވާހަކަދައްކަވަމުން މިނިސްޓަރު މުއްތަލިބު ވިދާޅުވީ، ރަސްމާލެ ހިއްކަން ފެށި ދުވަސްވަރު އެ މަޝްރޫއަށް 500 މިލިއަނާއި 700 މިލިއަން ޑޮލަރާ ދެމެދުގެ ޚަރަދެއް ހިނގާނެ ކަމަށް ކުރިން އަންދާޒާކުރެވުނު ކަމަށެވެ. އެ އަންދާޒާއަކީ އޭރު ކުރީ ސަރުކާރުން ގުޅިފަޅާއި ގިރާވަރުފަޅު ހިއްކުމަށް ހިނގާފައިވާ ޚަރަދުތަކަށާއި، މާކެޓް ރޭޓްތަކުގެ އިތުރުން ގޮނޑުދޮށް ހިމާޔަތްކުރުމުގެ މަސައްކަތްތަކަށް ބަލައިގެން ހެދި ހިސާބުތަކެއް ކަމަށް މިނިސްޓަރު ފާހަގަކުރެއްވި އެވެ. އަދި ޚަރަދު ކުޑަކުރުމަށް ސަރުކާރުން އެޅި ފިޔަވަޅުތަކާއެކު މިހާރު ޚަރަދު ވަރަށް ބޮޑަށް ކުޑަކުރެވިފައިވާ ކަމަށް މިނިސްޓަރު މުއްތަލިބު ވިދާޅުވި އެވެ.

އެގޮތުން ސަރުކާރުގެ ކުންފުނިތަކާ ހަވާލުކޮށްގެންނާއި، ޑްރެޖަރު ޗާޓަރުކޮށްގެން މަސައްކަތް ކުރިއަށްގެންދިއުމުގެ ސަބަބުން، މުޅި ރަސްމާލޭގެ 1,009 ހެކްޓަރު ހިއްކުމަށް ދައުލަތުން ޚަރަދުވާނީ 330 މިލިއަން ޑޮލަރު ކަމަށް މިހާރު ލަފާކުރެވޭ ކަމަށް މިނިސްޓަރު މުއްތަލިބު ވިދާޅުވި އެވެ. އޭގެ ތެރެއިން 500 ހެކްޓަރުގެ ބިން ހިއްކުމަށް ހިނގާނީ ގާތްގަނޑަކަށް 160 މިލިއަން ޑޮލަރު ކަމަށް މިނިސްޓަރު މުއްތަލިބު ވިދާޅުވި އެވެ.

މި ދެންނެވި 330 މިލިއަން ޑޮލަރުގެ ތެރެއިން ހަމަ ވަރަށް ބޮޑު އަދަދެއް އިންނާނެ ދިވެހި ރުފިޔާއިން ވެސް ޚަރަދު ދީފައި. އެއީ ޑޮލަރުގެ ތާށިކަމަށް ވީހާވެސް ބޮޑަކަށް އަސަރު ނުކުރާނެހެން ސަރުކާރުން ކުރި މަސައްކަތްތަކެއް

ޑރ. އަބްދުﷲ މުއްތަލިބު

މީގެ އިތުރުން، ރަސްމާލެ މަޝްރޫއަށް 700 މިލިއަން ނުވަތަ 1,000 މިލިއަން ޑޮލަރު ޚަރަދުވާ ކަމަށް ބުނެ ބައެއް ފަރާތްތަކުން ދައްކަނީ ސިޔާސީ ބޭނުމަށް ރައްޔިތުންގެ ހިތްތަކުގައި ބިރުވެރިކަން އުފެއްދުމަށް ދައްކާ ވާހަކަތަކެއް ކަމަށް ވިދާޅުވެ، އެ ވާހަކަތައް މިނިސްޓަރު މުއްތަލިބު ވަނީ ދޮގުކުރައްވާފަ އެވެ.

މިނިސްޓަރު މުއްތަލިބު ވިދާޅުވީ ރާއްޖޭގައި މިހާތަނަށް ބިން ހިއްކި ރޭޓްތަކަށް ބަލާއިރު ރަސްމާލެ ހިއްކުމުގެ މަސައްކަތް ކުރެވެމުންދަނީ ނިސްބަތުން ވަރަށް ރަނގަޅު އަދި އަގުހެޔޮ ރޭޓެއްގައި ކަމަށެވެ. 

ރަސްމާލެ ހިއްކުމުގެ މަސައްކަތުގެ ބޮޑުބައި މި އަހަރު ނިމުމުގެ ކުރިން ނިންމުމަކީ ސަރުކާރުގެ އަމާޒު ކަމަށްވެސް މިނިސްޓަރު މުއްތަލިބު ވިދާޅުވި އެވެ.