އަލީ ހުސެއިންގެ ސުވާލެއް ރައީސް މުއިއްޒު އަށް: ގައުމިއްޔަތު ދިރުވުމަކީ ގައުމު ފޮތިފޮތިކޮށް، ޒަޔަނިސްޓުންގެ އެޖެންޓުންނަށް ވިއްކާލުންތޯ؟
9 ނޮވެމްބަރު 2026 | ހޯމަ 05:47ރަސްމާލެއިން ބޭރުގެ ބަޔަކަށް ބިން ވިއްކުމާ ދެކޮޅަށް ބޭއްވި ހަރަކާތެއްގައި، ރައްޔިތުންގެ ބަހެއް ނެތި ގައުމުގެ މިލްކިއްޔާތުން ވެލިފުކެއް ވެސް ބޭރުގެ ފަރާތްތަކަށް ނުވިއްކޭނެ ކަމަށް ކުރީގެ މެންބަރު އަލީ ހުސެއިން ވިދާޅުވެއްޖެ. ރައީސް މުއިއްޒަކީ ރައްޔިތުން ހަވާލުކުރި ވަޒީފާއެއްގައި ހުންނެވި ބޭފުޅެއްކަން ފާހަގަކުރައްވައި، ބިޑަކާ ނުލައި ބޭރުގެ އެޖެންޓުންނަށް ބިން ދިނުމަކީ ގައުމިއްޔަތު ދިރުވުންތޯ އޭނާ ސުވާލު އުފެއްދެވި. އެހެންކަމުން، ރައްޔިތުންގެ ހުއްދައާ ނުލައި ގައުމުގެ މުދާ ވިއްކާލުމުގެ ބާރު ސަރުކާރަށް ލިބިގެންނުވާކަމަށް އޭނާ ވިދާޅުވި
ގާނޫނީ ވަކީލު އަދި ކެންދޫ ދާއިރާގެ ކުރީގެ މެންބަރު އަލީ ހުސެއިން | ރާއްޖެއެމްވީ
ގައުމިއްޔަތު ދިރުވުމަށްޓަކައި ކުރަންޖެހޭ ކަމަކީ ގައުމު ފޮތިފޮތިކުރުމަށްފަހު ޒަޔަނިސްޓުންނާއި ޒަޔަނިސްޓުންގެ އައުވާނުންނަށް އަދި ޒަޔަނިސްޓުންގެ އެޖެންޓުންނަށް ވިއްކާލުންތޯ، ގާނޫނީ ވަކީލު އަދި ކެންދޫ ދާއިރާގެ ކުރީގެ މެންބަރު އަލީ ހުސެއިން ސުވާލު އުފައްދަވައިފި އެވެ.
"ދިވެހީންގެ ބިން ދިވެހީންނަށް" ނަމުގައި އާދިއްތަ ދުވަހުގެ ރޭ ބޭއްވި ކުއްލި ހަރަކާތުގައި ވާހަކަދައްކަވަމުން އަލީ ހުސެއިން ވިދާޅުވީ މިގައުމުގެ ވެރިންނަކީ ދިވެހި ރައްޔިތުން ކަމަށެވެ. އަދި މި ބިމުގެ ވެރިންނަކީ ވެސް، ރަސްމާލޭގެ ބިމުގެ ވެރިންނަކީ ދިވެހި ރައްޔިތުން ކަމަށެވެ.
ރައީސް ޑރ. މުހައްމަދު މުއިއްޒު އަކީ ދިވެހީން ދިން ވަޒީފާއެއްގައި ހުންނެވި ބޭފުޅެއް ކަމަށާއި، އެ ވަޒީފާގައި ހުންނެވި ބޭފުޅަކަށް ދިވެހި ރައްޔިތުން އެ ބިމުން ގޯއްޗާއި ފްލެޓަށް އެދި އެދި ތިއްބާ، ރައްޔިތުން ގާތު އަހައިވެސް ނުލައި، އެ ބިމުން ވެލިފުކެއް ވެސް ބޭރުގެ ބަޔަކަށް ވިއްކާލެވިގެނެއް ނުވާނެ ކަމަށް ވެސް އަލީ ހުސެއިން ވިދާޅުވި އެވެ.
ރައީސް މުއިއްޒު އަށް ރައްޔިތުންގެ ވަޒީފާ ދިން ލިބުނީ ރައްޔިތުން ގާތު އާދޭސް ކޮށްގެން ކަމަށާއި މިއީ 5 އަހަރު ދުވަހުގެ މުއްދަތެއްގެ ވަޒީފާ އެއް ކަމަށް ވެސް އަލީ ހުސެއިން ވިދާޅުވި އެވެ.
ރައީސް މުއިއްޒަކީ އަޅުގަނޑުމެން ހުރިހާ އެންމެންގެ އޮޑިއަކަށް އަރުވައިގެން އުޅޭ ކެޔޮޅެއް. ކެޔޮޅު އަރުވާފައި މިހުރީ 5 އަހަރުގެ މުއްދަތަށް. އެހެން ނަމަވެސް ސުވަލަކީ އޮޑިވެރިންގެ ބަހެއް ނެތި، އޮޑީގެ މިލްކުވެރިންގެ ބަހެއް ނެތި، ކެޔޮޅު މީހާ އަށް އޮޑީގެ ބައެއް ވިއްކާލެވިދާނެ ހެއްޔޭ. ވިއްކައެއް ނުލެވޭނެ. އެނޫން ގޮތަކަށް ވިސްނާލަމާ. މި ގައުމަކީ ކުންފުންޏެއް ކަމަށް. މި ކުންފުނީގެ ޝެއަރހޯލްޑަރުންނަކީ، ހިއްސާދާރުންނަކީ ދިވެހި ރައްޔިތުން. އެހެންވީމަ ކުންފުނި ހިންގަން ހަވާލުކޮށްފައި މިހުރި ސީއީއޯ ނުވަތަ މެނޭޖިންގ ޑިރެކްޓަރު އަކީ ރައީސް މުއިއްޒު. ސުވާލަކީ ކުންފުނީގެ ހަރުމުދާ، ކުންފުނީގެ މެނޭޖިންގ ޑިރެކްޓަރަށް ވިއްކިދާނެތޯ ކުންފުނީގެ ހިއްސާދާރުންގެ ބަހެއް ނެތި. ވަކިން ޚާއްސަކޮށް އެ ކުންފުނީގެ އެންމެ އަގުބޮޑު މުދާ. އެންމެ މަދު މުދާ، ކުންފުނީގެ ޝެއަރހޯލްޑަރުން ނުވަތަ ހިއްސާދާރުންގެ ބަހެއް ނެތި، ކުންފުނީގެ އެމްޑީ އަށް ވިއްކާލެވިދާނެ ތޯ. ސުވާލުގެ ޖަވާބަކީ ނުވިއްކޭނެ އޭއަލީ ހުސެއިން
އަލީ ހުސެއިން ވިދާޅުވީ ރައީސް މުއިއްޒު ވެރިކަމަށް ވަޑައިގެންނެވީ ދިވެހި ގައުމުން އެންމެ ވެލިފުކެއް ވެސް ވިއްކާނުލައްވާނެ ކަމަށް ވިދާޅު ކަމަށެވެ. އެހެން ނަމަވެސް އަޑު އިވުނީ 500 ހެކްޓަރުގެ ބިން ބިޑަކާ ނުލައި، ހިލޭ ޒަޔަނިސްޓުންނަށް، ޒަޔަނިސްޓް އެޖެންޓަކަށް ދޭން، މި ސަރުކާރުން ކޮމަރޝަލް ޓަރމްސް އެއްބަސްވުމެއްގައި ސޮއިކުރި ވާހަކަ ކަމަށް ވެސް އޭނާ ވިދާޅުވި އެވެ.
އެހެން ކަމުން ރައީސް މުއިއްޒު ގައުމިއްޔަތު ދިރުވަނީ ކިހިނެއްތޯ ސުވާލު އުފެދޭ ކަމަށް ވިދާޅުވެ އަލީ ހުސެއިން ވަނީ ގައުމިއްޔަތު ދިރުވުމަށްޓަކައި ކުރަން ޖެހޭ ކަމަކީ ގައުމު ވިއްކާލުންތޯ ސުވާލު އުފައްދަވާފަ އެވެ. އަދި ގައުމިއްޔަތު ދިރުވުމަށްޓަކައި ކުރަންޖެހޭ ކަމަކީ ގައުމު ފޮތިފޮތިކޮށް، ޒަޔަނިސްޓުންނާއި ޒަޔަނިސްޓުންގެ އައުވާނުންނަށް، ޒަޔަނިސްޓުންގެ އެޖެންޓުންނަށް ވިއްކާލުންތޯ ވެސް އަލީ ހުސެއިން ސުވާލު އުފެއްވި އެވެ.
