މި އަހަރު ނިމުމުގެ ކުރިން ޑްރެޖަރެއް ގެންނާނެކަމަށް ރައީސް މުއިއްޒު ވިދާޅުވެފައި ވަނިކޮށް އައު ޑްރެޖަރު ގެނެވޭނީ އަންނަ އަހަރު ކަމަށް މިނިސްޓަރު މުއްތޮލިބު ވިދާޅުވެއްޖެ
10 ނޮވެމްބަރު 2026 | އަންގާރަ 08:27އެމްޓީސީސީގެ ބިން ހިއްކުމުގެ މަޝްރޫއުތައް އަވަސްކުރުމަށްޓަކައި 10،000 ކިޔުބިކް މީޓަރުގެ ބޮޑު ޑްރެޖަރެއް ހޯދުމުގެ މަސައްކަތް ސަރުކާރުން ދަނީ ކުރަމުން. މި އުޅަނދު އަންނަ އަހަރުގެ ކުރީކޮޅު ރާއްޖެ ގެނެވޭނެ ކަމަށް ހައުސިންގ މިނިސްޓަރު ވިދާޅުވެފައިވާއިރު، ރައީސް މުއިއްޒު ވަނީ މިއަހަރު ގެންނާނެ ކަމަށް ވިދާޅުވެފައި
ހައުސިންގ މިނިސްޓަރު މުއްތޮލިބު "އަހާ ފޯރަމް" ގައި | ރައީސް އޮފީސް
އެމްޓީސީސީގައި މިހާރު އޮތް ޑްރެޖަރަށް ވުރެ ތިން ގުނަ ބޮޑު އުޅަނދެއް މި އަހަރު ނިމުމުގެ ކުރިން ގެންނާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެފައި ވަނިކޮށް އައު ޑްރެޖަރު ގެނެވޭނީ އަންނަ އަހަރު ކުރީކޮޅު ކަމަށް ހައުސިންގ މިނިސްޓަރު ޑރ އަބްދުﷲ މުއްތޮލިބު ވިދާޅުވެއްޖެ އެވެ.
އެމްޓީސީސީގައި މިހާރު އޮތް ޑްރެޖަރަށް ވުރެ ތިން ގުނަ ބޮޑު އުޅަނދެއް މި އަހަރު ނިމުމުގެ ކުރިން ގެންނާނެ ކަމަށް ރައީސް މުއިއްޒު ވިދާޅުވެފައި ވަނީ މިއަހަރުގެ ސެޕްޓެމްބަރު މަހު ދައުލަތުގެ މީޑިއާއިން ގެނެސްދޭ "ނޭޝަންސް ޗެޓް" ޕޮޑްކާސްޓުގައި ވާހަކަފުޅު ދައްކަވަމުންނެވެ.
މިހާރު އެމްޓީސީސީގައި އޮތް މަހާޖައްރާފާގެ ތިން ގުނަ ބޮޑު ޖައްރާފާއެއް މިހާރު އިރާދަކުރެއްވިއްޔާ އެވަނީ ސެކިއާ ކުރެވިފައި. އުއްމީދުމިކުރެވެނީ މި އަހަރު ނިމުމުގެ ކުރިން ރާއްޖެއަށް ގެނެވޭނެ ކަމުގައި. ގެނެވުނީމާ އެމްޓީސީސީއާ ހަވާލުވެފައި ހުރި މިހާރު ނުފެށި ހުރި ބިން ހިއްކުމުގެ ހުރިހާ މަޝްރޫއެއް ބާރަށް ހިނގާނެރައީސް ޑރ. މުހައްމަދު މުއިއްޒު
ރައީސް މުއިއްޒު މިފަދައިން ވިދާޅުވެފައިވީ ނަމަވެސް ހޯމަ ދުވަހުގެ ރޭ އޮތް އަހާ ފޯރަމްގައި ވާހަކަދައްކަވަމުން މިނިސްޓަރު މުއްތޮލިބު ވަނީ ސަރުކާރުން 10،000 ކިޔުބިކް މީޓަރު އެއްފަހަރާ ލޯޑު ކުރެވޭ ވަރުގެ ޑްރެޖަރެއް ހޯދުމުގެ މަސައްކަތް ކުރަމުންދާ ކަމަށް ވިދާޅުވެފަ އެވެ. އަދި އެ ޑްރެޖަރު ރާއްޖެ ގެނެވޭނީ އަންނަ އަހަރުގެ ކުރީ ކޮޅު ކަމަށް މިނިސްޓަރު މުއްތޮލިބު ވިދާޅުވި އެވެ.
އެގޮތުން، ބިން ހިއްކުމަށް ދިމާވެފައިވާ އެންމެ ބޮޑު ދައްޗަކީ އެމްޓީސީސީގައި ހުރި ޑްރެޖަރުގެ އަދަދު މަދުވުން ކަމަށް މިނިސްޓަރު މުއްތޮލިބު ވިދާޅުވި އެވެ.
އެގޮތުން ކަޓަރ ސަކްޝަން ޑްރެޖަރު އެކި ރަށްރަށުގައި މަސައްކަތް ކުރަމުން އެބަދޭ، އަދި އެންމެ ހޮޕަރ ޑްރެޖަރެއް މި އޮންނަނީ އެ ޑްރެޖަރު ވެސް ހަމަ މެދުކެނޑުމެއްނެތި މަސައްކަތް ކުރަމުންދޭ. އެހެންވީމަ މި ދަތިތަކާއި ހެދި އަޅުގަނޑުމެން އަތުގައި މިއޮތް އެމްޓީސީސީގައި މިއޮތް ޑޮރެޖަރަކީ 3000 ސީޕީއެމް އެއްފަހަރާ ނެގޭވަރުގެ ޑްރެޖަރެއް، އެހެންވީމަ އެވަރު ކުރިއަށްދާ ކަމުގައި ވެއްޖެޔާމު ހަގީގަތުގައި ފުދޭ ވަރަކަށް ލަސްތަކެއް އަންނާތީވެ ސަރުކާރުން މިހާރު މަސައްކަތް ކުރަނީ އެމްޓީސީސީއަށް އޭގެ ތިން ގުނަ 10000 ކިޔުބިކް މީޓަރު އެއްފަހަރާ ލޯޑް ކުރެވޭ ވަރުގެ ޑްރެޖަރެއް ހޯދުމަށް. އަންނަ އަހަރުގެ ކުރީކޮޅު އެ ޑްރެޖަރު ރާއްޖެ ގެނެވޭނެ ކަމަށް މި ބަލަނީޑރ. އަބްދުﷲ މުއްތޮލިބު
މިނިސްޓަރު މުއްތޮލިބު ވިދާޅުވީ އެ ޑްރެޖަރު ގެނެވުމުން ބިން ހިއްކުމުގެ މަސައްކަތް ވަރަށް ބޮޑުތަނުން ހަލުވި ކުރެވޭނެ ކަމަށެވެ.
ރައީސް މުއިއްޒުގެ ސަރުކާރުން ވަނީ ކައުންސިލް އިންތިހާބާއި ދިމާކޮށް ގިނަ ރަށްރަށުގައި ބިން ހިއްކުމުގެ މަޝްރޫއުތައް ފަށާފައި އެވެ. ނަމަވެސް އެއްވެސް މަޝްރޫއުއެއް ކުރިއަށް ނުދާ ކަމަށް ކައުންސިލްތަކުން އަންނަނީ ބުނަމުންނެވެ.
