އަލައްބާރުގެ ފަރާތުން "ބްރަދަރ އަބްދުﷲ" އަށް ޑޮލަރު ދިންކަމަށް ދެކެވޭ ވާހަކައަކީ ސިޔާސީ ވާހަކަތަކެއްކަމަށް ރައީސް މުއިއްޒު ވިދާޅުވެއްޖެ
9 ނޮވެމްބަރު 2026 | ހޯމަ 07:56ރަސްމާލެ މަޝްރޫއު ހަވާލުކޮށްފައިވާ އީގަލް ހިލްސްގެ ވެރިޔާ މުޙައްމަދު އަލައްބާރު، "އަބްދުﷲ" ކިޔާ ފަރާތަކަށް އެތައް މިލިއަން ޑޮލަރެއް ދިން ކަމަށް ބުނާ ވާހަކަތައް ރައީސް ޑރ. މުއިއްޒު ދޮގުކުރައްވައިފި. މި މަޝްރޫއާ ގުޅޭގޮތުން ކޮރަޕްޝަންގެ އެއްވެސް އަމަލެއް ހިންގާފައި ނުވާނެ ކަމަށާއި، މިއީ ސިޔާސީ ބޭނުމަކަށް ފަތުރާ ހަގީގަތެއް ނެތް ވާހަކަތަކެއް ކަމަށް ރައީސް ވިދާޅުވި
ރައީސް ޑރ މުހައްމަދު މުއިއްޒު | ރާއްޖެ ޓީވީ
ރަސްމާލެ މަޝްރޫއުގެ ބޮޑު ބައެއް ހަވާލުކޮށްފައިވާ އީގަލް ހިލްސް ކުންފުނީގެ ވެރިޔާ މުޙައްމަދު އަލައްބާރު، ރާއްޖޭގެ ނަން މަޝްހޫރު ވިޔަފާރިވެރިންނާއި ސަރުކާރުގެ އިސް ބޭފުޅުންގެ ހާޒިރުގައި "އަބްދުﷲ" ކިޔާ ފަރާތަކަށް އެތައް މިލިއަން ޑޮލަރެއް ދީފައިވާ ކަމަށް ވިދާޅުވިކަމަށް ދެކެވޭ ވާހަކައަކީ ސިޔާސީ އިދިކޮޅު ފަރާތްތަކުން ދައްކާ ހަގީގަތެއް ނެތް ވާހަކައެއްކަމަށް ރައީސް ޑރ. މުޙައްމަދު މުއިއްޒު ވިދާޅުވެއްޖެ އެވެ.
ރާއްޖެއެމްވީ އަށް އިތުބާރު ހުރި ގޮތަކަށް މައުލޫމާތު ލިބިފައިވާ ގޮތުގައި، މި ވާހަކަތައް އަލައްބާރު ދައްކަވާފައިވަނީ މިދިޔަ އޮކްޓޯބަރު މަހު އޭނާ ރާއްޖެއަށް ކުރެއްވި ދަތުރުގެ ތެރެއިން ބޭއްވި ބައްދަލުވުމެއްގަ އެވެ.
މި ބައްދަލުވުމުގައި ރާއްޖޭގެ މަޝްހޫރު ވިޔަފާރިވެރިން ވަނީ ރަސްމާލެ މަޝްރޫއުގެ ސަބަބުން ރާއްޖެއަށް ލިބޭނެ މަންފާތަކާ ގުޅޭގޮތުން ސުވާލު އުފައްދާފަ އެވެ. ވަކިން ހާއްސަކޮށް، ރާއްޖެއަށް ޑޮލަރުގެ ދަތިކަން އިންތިހާއަށް ކުރިމަތިވެފައިވާ ދަނޑިވަޅެއްގައި، ދިވެހި ދައުލަތަށް އެއްވެސް ފައިދާއެއް ނުލިބޭ ގޮތަށް މިފަދަ ބޮޑު މަޝްރޫއެއް ކުރިއަށް ގެންދާތީ ވިޔަފާރިވެރިން ވަނީ އެކަމުގެ ކަންބޮޑުވުން ފާޅުކޮށްފަ އެވެ.
ވިޔަފާރިވެރިންގެ މި ސުވާލުތަކަށް ޖަވާބު ދެއްވަމުން އަލައްބާރު ވިދާޅުވީ، އެ މަޝްރޫއުން ރާއްޖެއަށް ފައިދާ ނުވާ ކަމަށް ބުނާ ވާހަކަ ގަބޫލު ނުކުރައްވާ ކަމަށެވެ. އަދި "ނޫނެކޭ، އަބްދުﷲ އަށް ފައިސާ ދީފީމޭ، އެތައް ފަހަރަކު ދީފީމޭ" މިފަދައިން އަލައްބާރު ވިދާޅުވި ކަމަށް މައުލޫމާތު ލިބެއެވެ. އަލައްބާރުގެ މި ވާހަކަތަކާއެކު އެ ބައްދަލުވުމުގައި ތިއްބެވި ފަރާތްތަކުގެ މެދުގައި ބޮޑު ސުވާލެއް އުފެދުނު ނަމަވެސް، އެ ފައިސާ ލިބުނު ކަމަށް ބުނާ "އަބްދުﷲ" އަކީ ކާކުކަން އޭނާ ސީދާ ހާމަކޮށްފައެއް ނުވެ އެވެ.
އެހެންނަމަވެސް، އެތައް ފަހަރެއްގެ މަތިން އެތައް މިލިއަން ޑޮލަރެއް އެ ފަރާތަށް ދީފައިވާނެ ކަމަށް އަލައްބާރު ތަކުރާރުކޮށް ވިދާޅުވި ކަމަށްވެ އެވެ.
މި މައްސަލައާ ގުޅޭގޮތުން ހޯމަ ދުވަހު ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ސުވާލު ކުރުމުން، ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވަނީ އެކަން ދޮގުކުރައްވާފަ އެވެ. ރައީސް ވިދާޅުވީ އެއްވެސް މަޝްރޫއެއް ހިންގުމަށްޓަކައި ކޮރަޕްޝަންގެ އެއްވެސް ފައިސާއެއް ނުވަތަ ފައިދާއެއް އެމަނިކުފާނަށްވެސް އަދި ސަރުކާރުގެ އެހެން ބޭފުޅަކަށްވެސް ލިބިފައި ނުވާނެ ކަމަށެވެ.
ރައީސް މުއިއްޒު އިތުރަށް ވިދާޅުވީ، މިއީ ހަގީގަތާ ހިލާފު ވާހަކަތަކެއް ކަމަށާއި، މިފަދަ ވާހަކަތައް ފަތުރަނީ އިދިކޮޅު ފަރާތްތަކުން ސިޔާސީ ބޭނުމެއްގައި ކަމަށެވެ.
ރަސްމާލެ މަޝްރޫއަކީ މި ސަރުކާރުގެ އެންމެ ބޮޑު އެއް މަޝްރޫއަށް ވާއިރު، މި މަޝްރޫއުގެ ދަށުން ބިން ހިއްކުމުގެ މަސައްކަތް ހަވާލުކޮށްފައިވަނީ ދުބާއީގެ އީގަލް ހިލްސް ކުންފުންޏާއެވެ. މި މަޝްރޫއުގެ ދެފުށް ފެންނަ މިންވަރާ މެދު އިދިކޮޅު ފަރާތްތަކުންނާއި އާންމުންގެ މެދުގައި މީގެ ކުރިންވެސް ވަނީ ގިނަ ސުވާލުތަކެއް އުފެދިފަ އެވެ.
