މަރުގެ ހުކުމާ ކުރިމަތިލައްވަން ޝައިޚް ޙަސީނާ އެނބުރި ދާކާއަށް ވަޑައިގަންނަވަނީ
10 ނޮވެމްބަރު 2026 | އަންގާރަ 10:02ބަންގްލަދޭޝްގައި ހިނގައިދިޔަ ހަމަނުޖެހުންތަކާ ގުޅިގެން މަރުގެ ހުކުމް އިއްވާފައިވާ ޝައިޚް ޙަސީނާ އަނބުރާ ޤައުމަށް ވަޑައިގަންނަވައި ކޯޓަށް ހާޒިރުވާނެ ކަން އިޢުލާނުކުރައްވައި، އައު ޕާސްޕޯޓަކަށް ވަނީ އެދިވަޑައިގަންނަވާފައި. އޭނާ އަނބުރާ ގެނައުމަށް ބަންގްލަދޭޝް ސަރުކާރުން މަސައްކަތް ކުރަމުންދާއިރު، މި ކަމުގެ ސަބަބުން ޤައުމުގެ ސިޔާސީ މަސްރަހަށް ބޮޑެތި ގޮންޖެހުންތަކެއް ކުރިމަތިވެދާނެ ކަމަށް ބެލެވޭ
ބަންގްލަދޭޝްގެ ކުރީގެ ބޮޑުވަޒީރު ޝައިޚް ޙަސީނާ | އޭއެފްޕީ
ވެރިކަމުން ދުރުކުރެވިފައިވާ ބަންގްލަދޭޝްގެ ކުރީގެ ބޮޑުވަޒީރު ޝައިޚް ޙަސީނާ، އިންޑިއާގައި އަމިއްލަފުޅަށް އަރުވާލެއްވިގެން ހުންނެވި ހުންނެވުމަށް ނިމުމެއް ގެންނަވައި އަނބުރާ ޤައުމަށް ވަޑައިގެންނެވުމަށް ޓަކައި، އައު ޕާސްޕޯޓަކާއި އައިޑެންޓިޓީ ކާޑަކަށް އެދިވަޑައިގަންނަވަފި އެވެ. މިއީ، އިންޑިއާގައި ދެ އަހަރު ދުވަސް ހޭދަކުރެއްވުމަށްފަހު، ކުރިއަށް އޮތް ޑިސެންބަރު މަހު އަނބުރާ ބަންގްލަދޭޝަށް ވަޑައިގަންނަވާނެ ކަމަށް ވެވަޑައިގެންނެވި ވަޢުދު ފުރިހަމަކުރައްވާނެ ކަމުގެ ސާފު ހެއްކެއްގެ ގޮތުގައި މަސްރަހުގެ ދާރިސުން ފާހަގަކުރައްވަ އެވެ.
އަނބުރާ ޤައުމަށް ވަޑައިގެންނެވުމަށްފަހު ބަންގްލަދޭޝްގެ ކޯޓަކަށް އަމިއްލަފުޅަށް ހާޒިރުވެވަޑައިގަންނަވާނެ ކަމަށް ޝައިޚް ޙަސީނާ ވަނީ ވިދާޅުވެފަ އެވެ. އަދި، މިކަމާ ގުޅޭ ރަސްމީ އެންމެހައި އިޖުރާތުތައް ފުރިހަމަވުމުން، އެނބުރި ވަޑައިގަންނަވާނެ ސީދާ ތާރީޚު އިޢުލާނު ކުރައްވާނެ ކަމަށް އޭނާގެ އަރިސް ބޭފުޅުން ވަނީ ވިދާޅުވެފަ އެވެ.
2024 ވަނަ އަހަރު ބަންގްލަދޭޝްގައި ހިނގައިދިޔަ ދަރިވަރުންގެ މުޒާހަރާތައް ހުއްޓުވުމަށް ބާރުގެ ބޭނުންކުރުމަށް އަމުރުކުރެއްވި ކަމުގެ ކުށް ސާބިތުވެ، ޝައިޚް ޙަސީނާގެ ޣައިރު ހާޒިރުގައި އޭނާ މަރަން ހުކުމްކޮށްފައި ވަނީ ނޮވެންބަރު މަހު އެ ޤައުމުގެ ހަނގުރާމައިގެ ކުށްތައް ބަލާ ޚާއްސަ ކޯޓުންނެވެ. އެ ދުވަސްވަރު ހިނގައިދިޔަ ހަމަނުޖެހުންތަކުގައި 1،400 އެއްހާ މީހުން މަރުވެފައިވާ ކަމަށް އދ. ގެ އަންދާޒާތަކުން ދައްކަ އެވެ.
އެޕްލިކޭޝަންގެ ޤާނޫނީ ހައިސިއްޔަތު ބެލުން
ބަންގްލަދޭޝްގެ ރައްޔިތެއްކަމުގެ ހައިސިއްޔަތުން، އޭނާ އެދިވަޑައިގަންނަވާފައިވާ ލިޔެކިޔުންތައް ވީ އެންމެ އަވަހަކަށް ހަމަޖައްސައިދިނުމަށް، ސަރުކާރަށް ފޮނުއްވި ސިޓީފުޅުގައި ޝައިޚް ޙަސީނާ ވަނީ އެދިވަޑައިގަންނަވާފަ އެވެ. މި މައްސަލައިގައި ޤާނޫނީ އެއްވެސް އަސާސެއް އޮތްތޯއާއި އެ ފަދަ ލިޔެކިޔުންތަކަކަށް އެދިވަޑައިގެންނެވުމުގެ ޤާނޫނީ ހައްގު ޝައިޚް ޙަސީނާއަށް ލިބިވަޑައިގަންނަވާތޯ އެ ޤައުމުގެ ޚާރިޖީ ވުޒާރާއާއި ޤާނޫނީ ވުޒާރާއިން ދިރާސާކުރަމުން އަންނަ ކަމަށް ބަންގްލަދޭޝްގެ ދާޚިލީ ވަޒީރު ސަލާހުއްދީން އަޙްމަދު ވަނީ ވިދާޅުވެފަ އެވެ.
ހަމަމިއާއެކު، އިންޑިއާއާއެކު ވެފައިވާ ކުށްވެރިން ބަދަލުކުރުމުގެ މުއާހަދާގެ ދަށުން ޝައިޚް ޙަސީނާ އަނބުރާ ޤައުމަށް ގެނައުމަށް ބަންގްލަދޭޝް ސަރުކާރުން ބޭނުންވާ ކަމަށް، ޚާރިޖީ ވުޒާރާގެ ޖޫނިއާ ވަޒީރު ހުމާޔޫން ކޮބީރު ވަނީ ނިމިދިޔަ ހަފުތާގައި ވިދާޅުވެފަ އެވެ. ނަމަވެސް، އޭނާ ހަވާލުކުރުމަށް އިންޑިއާގެ ސަރުކާރުން މިހާތަނަށް ވަނީ ދެކޮޅު ހަދާފަ އެވެ.
"އަޅުގަނޑުމެން ބޭނުންވަނީ ޙަސީނާ ހަވާލުކުރުމަށް. އޭނާ ހަވާލުކުރަން ޖެހޭނެ. އެއީ ޓެރަރިސްޓެއް. އެއީ ފިލައިގެން އުޅޭ ކުށްވެރިއެއް. ބަންގްލަދޭޝާއި އިންޑިއާއާ ދެމެދު ކުށްވެރިން ބަދަލުކުރުމުގެ މުއާހަދާއެއް އެބައޮތް،" ބުރާސްފަތި ދުވަހު ދާކާގައި ނޫސްވެރިންނާ ވާހަކަފުޅު ދައްކަވަމުން ކޮބީރު ވިދާޅުވި އެވެ.
ސިޔާސީ މުސްތަގުބަލާއި އިގުތިސާދީ ހަމަޖެހުން
ޝައިޚް ޙަސީނާއަކީ ބަންގްލަދޭޝްގެ ބާނީ އަދި އެ ޤައުމުގެ ފުރަތަމަ ރައީސް ޝައިޚް މުޖީބު އައްރަޙްމާންގެ ދަރިކަނބަލުންނެވެ. އޭނާ ވަނީ 1996 އިން 2001 އަށް އަދި ފަހުން 2009 އިން 2024 އަށް އެ ޤައުމުގެ ބޮޑުވަޒީރުކަން ކުރައްވާފަ އެވެ. ޝައިޚް ޙަސީނާ ވެރިކަމުން ދުރުކުރެވުނީ، މިނިވަންކަމުގެ ހަނގުރާމައިގެ ބައިވެރިންގެ ދަރިފަސްކޮޅަށް ސަރުކާރުގެ ވަޒީފާތަކުން ކޯޓާ ކަނޑައެޅުމަށް ސުޕްރީމް ކޯޓުން ނިންމުމާ ގުޅިގެން ފެށުނު ދަރިވަރުންގެ ވަރުގަދަ މުޒާހަރާތަކެއްގަ އެވެ.
އޭނާ އަނބުރާ ޤައުމަށް ވަޑައިގެންނެވުމަކީ ޤާނޫނީ އަދި ސިޔާސީ ގޮތުން އައު ހަލަބޮލިކަމަކަށް މަގުފަހިވެދާނެ ކަމެކެވެ. ބަންގްލަދޭޝްގެ ރައްޔިތުންގެ ވަކި ބައެއްގެ މެދުގައި އަދިވެސް އޭނާއަށް ބޮޑު ތާއީދެއް އޮތްއިރު، ވޭތުވެދިޔަ ދެ އަހަރުގެ ހަލަބޮލިކަމަށްފަހު ޤައުމާއި އިގުތިސާދު ހަމައަކަށް އެޅުވުމަށް މިހާރުގެ ސަރުކާރުން ކުރަމުންދާ މަސައްކަތްތަކަށް އޭނާ އެނބުރި ވަޑައިގެންނެވުމުގެ ސަބަބުން ބޮޑެތި ގޮންޖެހުންތަކެއް ކުރިމަތިވެދާނެ ކަމަށް މަސްރަހު ދިރާސާކުރާ ފަރާތްތަކުން ދެކިވަޑައިގަންނަވަ އެވެ.
މަސްދަރު: އަލް ޖަޒީރާ
