ބޯޑަރުތައް ބަންދުކުރަން އެމެރިކާއިން އެންގުމުން ވެސް އިރާޤުން އީރާނާ ގުޅޭ މައި ބޯޑަރު ހުރަހެއް ހުޅުވައިފި

އީރާނާ ގުޅޭ 'ޝީބް' ސަރަހައްދީ ބޯޑަރު ހުރަސް، ތިން ހަފުތާގެ މެދުކެނޑުމަކަށްފަހު ފަސިންޖަރުންނަށާއި ވިޔަފާރި މުދާ އުފުލާ އުޅަނދުފަހަރަށް އިރާޤުން އަންގާރަ ދުވަހު އަލުން ހުޅުވާލައިފި އެވެ. ހަމަމިއާއެކު، މަރާމާތު މަސައްކަތްތަކަކަށް ޓަކައި 'މަންދަލީ' ބޯޑަރު ހުރަސް ކުރިއަށް އޮތް ހުކުރު ދުވަހުން ފެށިގެން ވަގުތީ ގޮތުން ބަންދުކުރުމަށް ނިންމާފައިވާ ކަން ވެސް އެ ޤައުމުން ވަނީ ހާމަކޮށްފަ އެވެ.

ޝީބް ހުރަސް އަންގާރަ ދުވަހުގެ ހެނދުނު އިރާޤު ގަޑިން 8:00 ގައި އަލުން ހުޅުވާލީ އޮޕަރޭޝަންތައް ފެށުމަށް ބޭނުންވާ ފަންނީ ކަންކަމާއި އިޖުރާތުތައް ފުރިހަމަކުރުމަށްފަހު ކަމަށް، އިރާޤުގެ ބޯޑަރު ބަނދަރުތަކާ ބެހޭ އިދާރާގެ ވެރިޔާ ޢުމަރު އަލް-ވާޢިލީ ނެރުއްވި ބަޔާނެއްގައި ވިދާޅުވި އެވެ.

Advertisement

ކުރިއަށް އޮތް ވިއްސާރަ މޫސުމަށް ތައްޔާރުވުމަށާއި، ބޯޑަރު ހުރަހުގެ މަރާމާތު މަސައްކަތްތައް ނިންމުމަށް ޓަކައި ހުކުރު ދުވަހުގެ ހެނދުނު 8:00 ގައި މަންދަލީ ހުރަސް ބަންދުކުރާނެ ކަމަށް ވެސް އަލް-ވާޢިލީ ވިދާޅުވި އެވެ. ވިއްސާރަ މޫސުމުގައި ކުރިމަތިވާ މޫސުމީ ގޮންޖެހުންތަކުގެ ސަބަބުން ބޯޑަރު ހުރަހުގެ އެތެރޭގައި ދުއްވާ އުޅަނދުފަހަރުގެ ދަތުރުފަތުރަށް ބުރޫއަރައި ހުރަސްއެޅިދާނެތީ މި މަރާމާތުތައް ކުރުން ކޮންމެހެން ލާޒިމުވާ ކަން އޭނާ ފާހަގަކުރެއްވި އެވެ. މަންދަލީ ހުރަސް ބަންދުކޮށްފައި ބަހައްޓާނީ ކިހާ މުއްދަތަކަށް ކަމެއް ކަމާބެހޭ އިދާރާއިން ސާފުކޮށް ހާމަކޮށްފައި ނުވާއިރު، އެ ތަން އަލުން ހުޅުވާލާނެ ތާރީޚެއް އިޢުލާނުކުރާނީ މަރާމާތުގެ މަސައްކަތްތައް އެއްކޮށް ނިމުމުން ކަމަށް އެ އިދާރާއިން ބުންޏެވެ.

ޖުޣުރާފީ ގޮތުން ބަލާއިރު، އިރާޤުގެ ދެކުނު އިރުމަތީ މައިސާން ޕްރޮވިންސުގައި އޮންނަ ޝީބް ހުރަސް ގުޅެނީ އީރާނުގެ ޚޫޒިސްތާން ޕްރޮވިންސުގެ ޗަޒާބޭ ހުރަހާ އެވެ. އަދި، މަންދަލީ ހުރަސް އޮންނަނީ އިރާޤުގެ އިރުމަތީ ދިޔާލާ ޕްރޮވިންސުގަ އެވެ.

ޝީބް ހުރަސް ބަންދުކުރަން ޖެހުނީ ފަންނީ ގޮތުން ވާންޖެހޭ ތައްޔާރީތައް ފުރިހަމަވެފައި ނުވުމުން ކަމަށާއި، ނަމަވެސް އެ މުއްދަތުގައި އެހެން ބޯޑަރު ހުރަސްތައް މެދުވެރިކޮށް އީރާނާއެކު ވިޔަފާރީގެ މުޢާމަލާތްތައް މެދުކެނޑުމެއްނެތި ކުރިއަށްދިޔަ ކަމަށް، އޮކްޓޫބަރު 21 ގައި އިރާޤު ސަރުކާރުގެ ތަރުޖަމާނު ޙައިދަރު އަލް-ޢައްބޫދީ ވިދާޅުވި އެވެ. މީގެއިތުރުން، ސެޕްޓެންބަރު މަހު ވެސް ޝީބް ހުރަސް ވަގުތީ ގޮތުން ބަންދުކުރިއިރު، އެ ފިޔަވަޅަކީ ބޯޑަރު ހުރަސްތަކުގެ އޮޕަރޭޝަންތައް އަލުން ތަރުތީބުކުރުމަށާއި ހުރަސްތަކުގައި ހިނގާފައިވާ ގަވާއިދާ ޚިލާފު ކަންކަން ތަހުގީގުކުރުމަށް އެޅި ފިޔަވަޅެއް ކަމަށް އިރާޤުގެ ސެކިއުރިޓީ މީޑިއާ ސެލުން ވަނީ ބުނެފަ އެވެ. އެ ދުވަސްވަރު ދަތުރުވެރިންނަށް ޒުރުބާތިޔާ އަދި އަލް-މުންޛިރިއްޔާ ހުރަސްތައް ހުޅުވާލާފައި ބެހެއްޓުމަށްފަހު، ތާށިވެފައި ތިބި ފަސިންޖަރުންނަށް ޝީބް އަދި ޝަލަމްޗޭ ހުރަސް މެދުވެރިކޮށް ދަތުރުކުރުމުގެ ހުއްދަ ދެއްވުމަށް ބޮޑުވަޒީރު ޢަލީ އައްޒައިދީ އަމުރުކުރެއްވި އެވެ.

ސަރަހައްދީ ނުތަނަވަސްކަން ކުޑަކުރުމުގެ މަގުތަކާ ގުޅޭގޮތުން މަޝްވަރާކުރެއްވުމަށް ބޮޑުވަޒީރު އައްޒައިދީ ދާދިފަހުން އީރާނަށް ވަޑައިގެންނެވި ކަމަށް، ތެހެރާންގައި ހުންނަވާ އިރާޤުގެ ސަފީރު ޔާސިރު ޢަބްދުއްޒަހުރާ އަލް-ޙައްޖާޖު ހޯމަ ދުވަހު ވިދާޅުވި އެވެ. ބޮޑުވަޒީރުގެ މި ދަތުރުފުޅަކީ ރަސްމީކޮށް އިޢުލާނުނުކޮށް ކުރެއްވި "އަމިއްލަފުޅު" ދަތުރުފުޅެއް ކަމަށް ވެސް އަލް-ޙައްޖާޖު ވިދާޅުވި އެވެ. ނަމަވެސް، ޝީބް ހުރަސް އަލުން ހުޅުވުން ގުޅިފައި ވަނީ ފަންނީ އިޖުރާތުތައް ފުރިހަމަކުރުމާ ކަމަށާއި، އެ ނިންމުމަކީ ބޮޑުވަޒީރު އީރާނަށް ކުރެއްވި ދަތުރުފުޅާ އެއްވެސް ގުޅުމެއް އޮތް ކަމެއް ނޫން ކަމަށް ބޯޑަރު ބަނދަރުތަކާ ބެހޭ އިދާރާއިން ބުންޏެވެ.

އީރާނާއެކު އޮންނަ ބޯޑަރު ހުރަސްތަކުގެ ތެރެއިން ދެ ހުރަސް ފިޔަވައި އެހެން ހުރިހާ ހުރަސްތަކެއް އެއްކޮށް ބަންދުކުރުމަށް އެމެރިކާގެ މާލީ ވުޒާރާއިން ބަޣުދާދުގެ ކިބައިން އެދިފައިވާ ކަމަށް، އާދީއްތަ ދުވަހު ދެއްވި ޓީވީ ބަސްދީގަތުމެއްގައި އިރާޤުގެ ޚާރިޖީ ވަޒީރު ފުއާދު ޙުސައިން ވިދާޅުވި އެވެ. އެމެރިކާގެ އެ އެދުމާ ގުޅިގެން ވޮޝިންގޓަނާއެކު އިރާޤު ސަރުކާރުން މަޝްވަރާތައް މެދުކެނޑުމެއްނެތި ކުރިއަށްގެންދާ ކަމަށާއި، އެ އެދުން ތަންފީޒުކޮށްފިނަމަ އިރާޤުގެ އިގުތިސާދަށް އޭގެ ނޭދެވޭ އަސަރު ވަރަށް ބޮޑަށް ފޯރާނެ ކަމަށް އިންޒާރުދެއްވަމުން ޚާރިޖީ ވަޒީރު ވިދާޅުވި އެވެ.