ބިންގަރާސްތަކުގައި ހަތިޔާރު ކާރުޚާނާތައް ބިނާކޮށް، އީރާނުން ދިގުދެމިގެންދާނެ ހަނގުރާމައަކަށް ތައްޔާރު ވަނީ
8 ނޮވެމްބަރު 2026 | އާދީއްތަ 08:27އީރާނުގެ މިސައިލާއި ޑްރޯން އުފައްދާ ކާރުޚާނާތައް ބިމު އަޑީގެ ބިންގަރާސްތަކަށް ބަދަލުކޮށް، ހަތިޔާރުގެ ރޭންޖަށް ކަނޑައަޅާފައިވާ ހުރިހާ ހިފެހެއްޓުންތަކެއް އުވާލާފައިވާ ކަމަށް އެ ޤައުމުން ހާމަކޮށްފި. އެމެރިކާއާއި އިސްރާއީލާ ދެކޮޅަށް ކުރާ ހަނގުރާމައިގައި މިސައިލް ސިޓީތަކުގެ ބޭނުން ހިފަމުންދާއިރު، ހަމަލާއެއް އަތުވެއްޖެނަމަ އެއްވެސް އިމެއް ނެތި ރައްދުދޭނެ ކަމުގެ އިންޒާރު އީރާނުން ވަނީ ދީފައި
އީރާނުގެ އެންމެ މަތީ އިސްވާރު އާޔަތުالله މުޖުތަބާ ޙުސައިނީގެ ބޮޑު ޕޯސްޓަރެއް ޖަހާފައިވާ ބިނާއެއް ކައިރީގައި ދައްކައިލުމަށް ހަރުކޮށްފައި ހުރި މިސައިލްތަކެއް ކައިރިން ސައިކަލެއްގައި ދެ މީހަކު ދަތުރު ކުރަނީ | އޭޕީ
ބަރުހަތިޔާރުގެ ވަރުގަދަ ހަމަލާތަކުގެ ތެރޭގައި ވެސް ހަތިޔާރު އުފެއްދުމާއި ރައްކާކުރުމުގެ ގާބިލުކަން ދެމެހެއްޓޭނެ އަސްކަރީ މަރުކަޒުތަކެއް ބިމު އަޑީގައިވާ ބިންގަރާސްތަކުގައި އީރާނުން ބިނާކުރަމުންދާ ކަމަށް އެ ޤައުމުގެ އިސްލާމިކް ރިވޮލޫޝަނަރީ ގާޑް ކޯއިން (އައިއާރުޖީސީ) ބުނެފި އެވެ. ވެރިރަށް ތެހެރާނުގައި ބޭއްވި ނޫސްވެރިންގެ ބައްދަލުވުމެއްގައި އަސްކަރިއްޔާގެ ގާބިލުކަމާ ގުޅޭގޮތުން ހޮނިހިރު ދުވަހު ގިނަ ކަންތައްތަކެއް ހާމަކުރެއްވީ އައިއާރުޖީސީގެ ތަރުޖަމާނު ޙުސައިން މުޙިއްބީ އެވެ.
އީރާނުން ހޯދާފައިވާ ކާމިޔާބީތަކުގެ ތެރޭގައި، ރަސްމީކޮށް ދައްކާލުމަށް ތައްޔާރުވަމުންދާ "ބިންގަރާސް މިސައިލް ސިޓީ" ހިމެނޭ ކަމަށް މީޑިއާ ރިޕޯޓުތަކުގައިވެ އެވެ. އައިއާރުޖީސީން ވަނީ މިސައިލާއި ޑްރޯން އުފައްދާ ކާރުޚާނާތައް ވަރަށް ހަލުވިކޮށް ބިމު އަޑީގައިވާ ބިންގަރާސްތަކަށް ބަދަލުކޮށްފައި ކަމަށް މުޙިއްބީ ވިދާޅުވި އެވެ. މި ބަދަލުގެ ސަބަބުން، އީރާނުގެ ހަތިޔާރުގެ ސްޓޮކް ހުސްވަމުންދާ ކަމަށް ދުޝްމަނުން ހީކުރަމުން ދިޔަ ނަމަވެސް، މެދުކެނޑުމެއް ނެތި މިސައިލް އުފެއްދުމުގެ ފުރުސަތު އީރާނަށް ލިބިގެންދާނެ ކަން އޭނާ ތަފްސީލުކޮށްދެއްވި އެވެ.
ބިންގަރާސްތަކުގައި ހަތިޔާރު އުފެއްދުމާއި ސްޓެލްތު ކުރިއެރުން
މިއާއެކު، ސްޓެލްތު ޓެކްނޮލޮޖީއަށް ގެނެސްފައިވާ ކުރިއެރުންތަކުގެ ސަބަބުން، އެމެރިކާއާއި އިސްރާއީލާއެކު ކުރިން ހިނގި ކުރިމަތިލުންތަކުގައި ވައިގެ ދިފާޢީ ނިޒާމުތައް ފޫއަޅުވާލައި އަމާޒުތަކަށް ސީދާ ހަމަލާދިނުމުގެ ފުރުސަތު މިސައިލްތަކަށާއި ޑްރޯންތަކަށް ލިބިފައިވާ ކަން ވެސް ތަރުޖަމާނު ފާހަގަކުރެއްވި އެވެ.
"މިއަދު އައިއާރުޖީސީގެ އޭރޯސްޕޭސް ފޯސްއިން ބޭނުންކުރާ ކޮންމެ ހަތިޔާރަކީ އަމިއްލަ ޢިލްމާއި ތަޖުރިބާގެ އަލީގައި އުފައްދާފައިވާ ތަކެތި. އަދި، އަޅުގަނޑުމެންގެ އުފެއްދުންތަކަކީ ހަނގުރާމައިގެ ތެރޭގައި އަތުލައިގަނެވުނު ދުޝްމަނުންގެ އަސްކަރީ ހަތިޔާރުތައް 'ރިވަރސް-އިންޖިނިއަރ' ކޮށްގެން އުފައްދާފައިވާ ތަކެއްޗެއް ވެސް ނޫން،“ މުޙިއްބީ ވިދާޅުވި އެވެ.
ފާއިތުވި ހަނގުރާމައިގެ ބުރުތަކުގައި މެދުއިރުމަތީގައިވާ އެމެރިކާގެ އަސްކަރީ މަރުކަޒުތަކަށް އީރާނުން ބިލިޔަން ޑޮލަރުގެ ބޮޑެތި ގެއްލުންތަކެއް ދީފައިވާ ކަން މަސްރަހުގެ ދާރިސުން ފާހަގަކުރައްވަ އެވެ. މީގެ އިތުރުން، ހަމަ އެ މުއްދަތުގެ ތެރޭގައި އީރާނުން ވަނީ ގަލްފުގެ އުމްރާނީ ވަސީލަތްތަކަށް ގާތްގަނޑަކަށް 135 ފަހަރު ކާމިޔާބު ހަމަލާތަކެއް ދީ، އެތައް ބިލިޔަން އެމެރިކާ ޑޮލަރެއްގެ ގެއްލުމާއި ގެއްލުނު އާމްދަނީ ކުރިމަތިކުރުވާފަ އެވެ.
ސަރަހައްދީ ހަމަނުޖެހުމާއި މިސައިލްގެ އައު އިންޒާރުތައް
އީރާނުގެ މިސައިލްތަކުގެ ރޭންޖަށް ކަނޑައަޅާފައިވާ ހުރިހާ ހިފެހެއްޓުންތަކެއް މިހާރު އުވާލާފައިވާ ކަމަށް ހޮނިހިރު ދުވަހު މުޙިއްބީ އިންޒާރު ދެއްވި އެވެ. މި އިންޒާރު ދެއްވާފައި ވަނީ، އެމެރިކާއާއި އިސްރާއީލުން އީރާނަށް އަލުން ހަމަލާއެއް ދީފިނަމަ، އެ ޤައުމުގެ ރައްދު ހަމަލާތަކަށް އެއްވެސް "ޖިއޮގްރަފިކް ހިފެހެއްޓުމެއް ނުވަތަ ސަރަހައްދީ އިމެއް" ނޯންނާނެ ކަމަށް އީރާނުގެ އެންމެ މަތީ އިސްވާރު އާޔަތުالله މުޖުތަބާ ޚާމަނާއީ ވިދާޅުވެފައިވަނިކޮށެވެ.
އެމެރިކާއާއި އިސްރާއީލުން ގުޅިގެން އީރާނާ ދެކޮޅަށް ޣައިރުޤާނޫނީ ހަނގުރާމަ ފަށާފައިވަނީ ފެބުރުވަރީ 28 ގަ އެވެ. މި ހަނގުރާމައާ ގުޅިގެން އީރާނުން ވަނީ ހުރްމުޒް ކަނޑުއޮޅި ބަންދުކޮށް، މުޅި ދުނިޔެއަށް ހަކަތައިގެ ބޮޑު ކާރިސާއެއް ކުރިމަތިކުރުވާފަ އެވެ. މި ހަނގުރާމަ ނިމުމަކަށް ގެނައުމުގެ އުއްމީދުގައި ސަރަހައްދީ ޤައުމުތަކުން ކުރަމުންދާ ސުލްހައިގެ މަސައްކަތްތައް ދާދިފަހުން ވަނީ އިތުރަށް ވަރުގަދަކޮށްފަ އެވެ.
އީރާނުގެ ޤަޝްމު ޖަޒީރާއަށް އެމެރިކާގެ އަސްކަރިއްޔާއިން ދާދިފަހުން ހަމަލާތަކެއް ދީފައިވާ ކަމަށާއި، އަދި އީރާނާއެކު ކުރިއަށްދާ މަޝްވަރާތަކުގައި ވޮޝިންގޓަނުން ވަރަށް ބޮޑު ކުރިއެރުމެއް ހޯދާފައިވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ހުކުރު ދުވަހު ވިދާޅުވި އެވެ. ނަމަވެސް، ހަނގުރާމަ އަލުން ފެށިއްޖެނަމަ ގަލްފުގެ ހަކަތައިގެ ވަސީލަތްތަކަށް އަމާޒުކޮށް ހަމަލާދޭނެ ކަމަށް ތެހެރާނުން ދަނީ ތަކުރާރުކޮށް އިންޒާރު ދެމުންނެވެ. މި ފަދަ ހަމަލާތަކެއްގެ ސަބަބުން ހަކަތައިގެ އަގުތައް އިތުރަށް އުފުލިގެންދާނެ ކަމަށް ބެލެވެ އެވެ.
އެމެރިކާގެ އަސްކަރީ ފިޔަވަޅުތަކާއި ހިސާރު
މިއާއެކު، އީރާނުން އެމެރިކާގެ ޑިމާންޑުތަކަށް ބޯލެނބުމަށް މަޖުބޫރުކުރުވުމުގެ ގޮތުން ވޮޝިންގޓަނުން ވަނީ އީރާނާ ދެކޮޅަށް އިތުރު ދަތިކުރުމުގެ ފިޔަވަޅުތައް އަޅާފަ އެވެ. މި ފިޔަވަޅުތަކުގެ ސަބަބުން އީރާނުގެ އިގުތިސާދަށް އިތުރު ބުރަތަކެއް ކުރިމަތިވެ، ވިޔަފާރީގެ އައު މަގުތައް ޚިޔާރުކުރުމަށް އެ ޤައުމަށް ވަނީ މަޖުބޫރުވެފަ އެވެ.
އީރާނުން އެއްގަމު މަގުތައް ބޭނުންކޮށްގެން ޒަމާނީ ހަތިޔާރާއި އެހެނިހެން އަސްކަރީ ސާމާނު އުފުލުން ހުއްޓުވުމަށް އެމެރިކާއިން ކުރަމުންދާ މަސައްކަތްތަކަށް އެހީތެރިވުމަށް އައު ޓާސްކު ފޯސްއެއް އެކުލަވާލަމުންދާ ކަމަށް އެމެރިކާގެ ސެންޓްރަލް ކޮމާންޑުން (ސެންޓްކޮމް) ހޮނިހިރު ދުވަހު ވަނީ އިޢުލާނުކޮށްފަ އެވެ. މީގެއިތުރުން، އީރާނުން ތެޔޮ ބޭރުކުރުން ހުއްޓުވުމުގެ ގޮތުން އެމެރިކާއިން ވަނީ އެ ޤައުމާ ދެކޮޅަށް ކަނޑުމަގުން ހުރަސްއެޅުމުގެ ޚާއްސަ ހިސާރެއް ވެސް ގާއިމުކޮށްފަ އެވެ.
މަސްދަރު: އަލް ޖަޒީރާ
