"އީރާނުން ހުށަހެޅީ ބަލައިގަންނަން ދަތި ޝަރުތުތަކެއް": ރޫބިއޯ ވިދާޅުވީ ސުލްހައިގެ އުންމީދު ފަނޑު ކަމަށް!
9 ނޮވެމްބަރު 2026 | ހޯމަ 03:14އީރާނުގެ ނިއުކްލިއަރ ހަތިޔާރުގެ ނުރައްކަލުން ސަލާމަތްވުމަށް ރައީސް ޓްރަމްޕް އަޅުއްވާ ފިޔަވަޅުތައް ދިފާޢުކުރައްވައި، އެމެރިކާގެ ޚާރިޖީ ވަޒީރު މާކޯ ރޫބިއޯ ވަނީ އީރާނުން ހުށަހަޅަނީ ބަލައިނުގަނެވޭނެ ފަދަ ޝަރުތުތަކެއް ކަމަށް ވިދާޅުވެފައި. އަދި، ހުރްމުޒް ކަނޑުއޮޅީގައި އެމެރިކާއިން ދޭ ހަމަލާތަކަކީ އަމިއްލަ ނަފްސުގެ ދިފާޢުގައި އަޅާ ފިޔަވަޅުތަކެއް ކަމަށާއި، ކުރިއަށް އޮތް ތަނުގައި ވެސް އަސްކަރީ ފިޔަވަޅު އެޅުން ބިނާވާނީ އީރާނުން ކުރިމަތިކުރާ ނުރައްކަލުގެ މައްޗަށް ކަމަށް އޭނާ ފާހަގަކުރެއްވި
އެމެރިކާގެ ޚާރިޖީ ވަޒީރު މާކޯ ރޫބިއޯ ނޫސްވެރިންނާ ވާހަކަފުޅު ދައްކަވަނީ | ގެޓީ އިމޭޖަސް
އީރާނާއެކު ޚާރިޖީ އެއްބަސްވުމަކަށް އައުމަކީ އެކަށީގެންވާ ކަމެއް ނޫން ކަމަށް ވިދާޅުވެ، އެ ޤައުމުން ހުށަހަޅަމުންދަނީ ހަގީގަތާ ޚިލާފު ޝަރުތުތަކެއް ކަމަށް ތުހުމަތުކުރައްވައި، މަޝްވަރާތަކުން އަވަސް ހައްލެއް ފެނުމާ ގާތަށް ވެސް ނުދެވޭ ކަމަށް އެމެރިކާގެ ޚާރިޖީ ވަޒީރު މާކޯ ރޫބިއޯ އާދީއްތަ ދުވަހު ވިދާޅުވެއްޖެ އެވެ.
ފަރަންސޭސިވިލާތުގެ ވެރިރަށް ޕެރިހުގައި ބާއްވާ ޖީ7 ގެ މެންބަރު ޤައުމުތަކުގެ ޚާރިޖީ ވަޒީރުންގެ ބައްދަލުވުމުގައި ބައިވެރިވެވަޑައިގެންނެވުމަށް ފުރާވަޑައިގެންނެވުމުގެ ކުރިން މީޑިއާއާ ވާހަކަފުޅު ދައްކަވަމުން، ތަފާތު އެކި ޚިޔާލުތަކާއެކު އީރާނާއެކު މުއާމަލާތް ކުރަމުންދާ އެތައް ޤައުމެއް އެބައޮތް ކަމަށާއި ނަމަވެސް އެއްބަސްވުމަކާ ގާތަށް ދެވިފައިވާ ކަމަށް ވިދާޅުވެވެން ނެތް ކަމަށް ރޫބިއޯ ވިދާޅުވި އެވެ. ކޮންމެ މައްސަލައެއް ވެސް ޚާރިޖީ ހަމަތަކުގެ މަތިން ހައްލުކުރުމަށް އެމެރިކާގެ ރައީސް ޑޮނަލްޑް ޓްރަމްޕް އަބަދު ވެސް އިސްކަންދެއްވާ ކަމަށާއި ނަމަވެސް ބައެއް ފަހަރު އެއީ ވާނެ ކަމެއް ނޫން ކަމަށް، ހިތާމައާއެކު ފާހަގަކުރައްވަމުން އޭނާ ވިދާޅުވި އެވެ.
އޭނާ މި މޭރުމުން ވިދާޅުވި ނަމަވެސް، އިސްވެ އީރާނާ ދެކޮޅަށް ޣައިރުޤާނޫނީ ހަނގުރާމައެއް ފެށްޓެވީ ޓްރަމްޕެވެ. އޭނާ، މި ހަނގުރާމަ ފެށްޓެވީ ސިހްޔޫނީން ރުއްސުމަށެވެ. ޚާރިޖީ ގޮތުން ސުލްހަވުމުގެ ފުރުސަތުތައް ހޯދުމަށް ވޮޝިންގޓަނުން އަދިވެސް ތައްޔާރަށް އޮތް ނަމަވެސް، މިހާތަނަށް ކުރެވުނު މަޝްވަރާތަކަކީ އެއްވެސް ނަތީޖާއެއް ނުނެރެވުނު ކަންތައްތަކެއްގެ ގޮތުގައި ސިފަކުރައްވައި، އީރާނުގެ ހުށަހެޅުންތަކަކީ ބަލައިނުގަނެވޭ ފަދަ ހެއްވާ އަދި ހަގީގަތާ ޚިލާފު ކަންތައްތަކެއް ކަމަށް ރޫބިއޯ ވިދާޅުވި އެވެ.
ސިޔާސީ ނުރައްކަލާއެކު ވެސް ޓްރަމްޕް އެޅުއްވި ފިޔަވަޅުތައް
މިހާރު ނުވަވަނަ މަހަށް ދެމިގެން ގޮސްފައިވާ މި ހަނގުރާމަ ޓްރަމްޕް މެނޭޖުކުރައްވަމުން ގެންދަވާ ގޮތް ދިފާޢުކުރައްވަމުން، ސިޔާސީ ގޮތުން ކުރިމަތިވެދާނެ ނޭދެވޭ އަސަރުތަކަށް ބެއްލެވުމެއް ނެތި، އެމެރިކާގެ ޤައުމީ ސަލާމަތަށް އޮތް ދިގު މުއްދަތުގެ ނުރައްކަލަކާ ޓްރަމްޕް ކުރިމަތިލައްވާފައިވާ ކަން ރޫބިއޯ ފާހަގަކުރެއްވި އެވެ. މިއާއެކު، އީރާނަށް ނިއުކްލިއަރ ހަތިޔާރު އުފެއްދުމުގެ ފުރުސަތު ނުދިނުމަކީ އެމެރިކާގެ ދެ ޕާޓީން ވެސް އެއްބަސްވާ މައިގަނޑު ކަމެއްގެ ގޮތުގައި ދެމިއޮންނަންޖެހޭނެ ކަމެއް ކަމަށް ވެސް އޭނާ ވިދާޅުވި އެވެ.
ފަރަންސޭސިވިލާތުގެ ވެރިރަށް ޕެރިހުގައި ހޯމަ އަދި އަންގާރަ ދުވަހު ބާއްވާ ޖީ7 ގެ ޚާރިޖީ ވަޒީރުންގެ ބައްދަލުވުމުގައި މަޝްވަރާކުރުމަށް އެޖެންޑާކޮށްފައިވާ މައިގަނޑު މައްސަލަތަކުގެ ތެރޭގައި އީރާނުގެ މައްސަލަ ހިމެނެ އެވެ. އީރާނާ ދެކޮޅަށް އެމެރިކާއާއި އިސްރާއީލުން އަސްކަރީ ހަމަލާތައް ދޭން ފެށީ ފެބުރުވަރީ 28 ގަ އެވެ. އޭގެ ފަހުން އެޕްރީލު މަހު ހަނގުރާމަ ހުއްޓާލުމުގެ އެއްބަސްވުމަކަށް އައިސް، ސުލްހައިގެ އެއްބަސްވުމެއް ޤާއިމުކުރުމަށް ޖޫން މަހު ފަހުމުނާމާއެއް އެކުލަވާލި ނަމަވެސް، ކުރިއަށްދިޔަ މަޝްވަރާތަކުން ދާއިމީ ހައްލަކަށް ވާސިލުވެވިފައެއް ނުވެ އެވެ.
ހުރްމުޒް ކަނޑުއޮޅީގެ ހަމަލާތަކާއި ދިފާޢީ ފިޔަވަޅުތައް
ހުރްމުޒް ކަނޑުއޮޅީގައި އޮންނަ އީރާނުގެ ޤަޝްމު ޖަޒީރާއަށް އެމެރިކާއިން ދާދިފަހުން ދިން ހަމަލާތައް އަމާޒުކޮށްފައި ވަނީ އީރާނުގެ އިސްލާމީ އިންގިލާބީ ލަޝްކަރުގެ (އައިއާރްޖީސީ) ވައިގެ ދިފާޢީ ނިޒާމުތަކަށް ކަމަށް ޓްރަމްޕް ހުކުރު ދުވަހު ވިދާޅުވި އެވެ.
އެމެރިކާއިން އިތުރު އަސްކަރީ ހަމަލާތަކެއް ދީފާނެ ހާލަތްތަކާ ގުޅޭގޮތުން ވާހަކަފުޅު ދައްކަވަމުން، ވޮޝިންގޓަނުގެ ފިޔަވަޅުތަކަކީ "ދިފާޢީ" ފިޔަވަޅުތަކެއް ކަމަށާއި އެއީ އެ ސަރަހައްދުގައި ތިބި އެމެރިކާގެ ފައުޖުތަކަށް ނުވަތަ ކަނޑު ދަތުރުފަތުރަށް ކުރިމަތިވާ ނުރައްކާތަކާ ގުޅިފައިވާ ކަމެއް ކަމަށް ރޫބިއޯ ވިދާޅުވި އެވެ.
"އެމެރިކާއިން އަޅަނީ 'ދިފާޢީ' ފިޔަވަޅުތައް. މި ސަރަހައްދުގައިވާ އަޅުގަނޑުމެންގެ ފައުޖުތަކަށް ނުރައްކަލެއް އޮތްނަމަ، އަޅުގަނޑުމެން އެ ކަންކަމާ ދެކޮޅަށް ފިޔަވަޅު އަޅާނަން. ކަނޑު ދަތުރުފަތުރަށް ނުރައްކަލެއް އޮތްނަމަ، އަޅުގަނޑުމެން އެ ދަތުރުފަތުރުގެ ދިފާޢުގައި މަސައްކަތްކުރާތާ ދުވަސްތަކެއް ވެއްޖެ. އެހެންކަމުން ކަނޑު ދަތުރުފަތުރަށް ނުވަތަ މި ސަރަހައްދުގައިވާ އަޅުގަނޑުމެންގެ ފައުޖުތަކަށް ސާފު އަދި ސީދާ ނުރައްކަލެއް އޮތްނަމަ، އަމިއްލަ ނަފްސުގެ ދިފާޢުގައި ފިޔަވަޅު އެޅުމުގެ ހައްގު އަޅުގަނޑުމެންނަށް ލިބިގެންވޭ،" މީޑިއާއާ ވާހަކަފުޅު ދައްކަވަމުން ރޫބިއޯ ވިދާޅުވި އެވެ.
ކުރިއަށްއޮތް ތަނުގައި އެޅިދާނެ ކޮންމެ އަސްކަރީ ފިޔަވަޅެއް ވެސް ބިނާވާނީ ނުރައްކާ އޮތް މިންވަރެއްގެ މައްޗަށާއި، އީރާނުގެ ފައުޖުތަކުން އެމެރިކާގެ މަސްލަހަތުތަކަށް ހަމަލާދެމުންދާ މިންވަރަށް ނުވަތަ ހަމަލާދިނުމަށް ތައްޔާރުވަމުންދާ މިންވަރެއްގެ މައްޗަށް ކަމަށް ވެސް ރޫބިއޯ ވިދާޅުވި އެވެ.
މަސްދަރު: އަނަދޮލު އޭޖެންސީ
