ސަރުކާރުން ބަޖެޓު ހުށަހަޅާފައިވަނީ ހިސާބު އަކުރުތައް އޮޅުވާލައިގެން މަކަރުވެރިކަމާއެކު، މިއީ ޑރ. ޕިނޯކިއޯގެ ޕިނޯކިއޯ ބަޖެޓު: މީކާއިލް
10 ނޮވެމްބަރު 2026 | އަންގާރަ 06:18އަންނަ އަހަރަށް ލަފާކުރާ ބަޖެޓަކީ ހިސާބުތައް އޮޅުވާލައިގެން ތައްޔާރުކޮށްފައިވާ "މަކަރުވެރި" ބަޖެޓެއް ކަމަށް ވިދާޅުވެ، ގަލޮޅު ދެކުނު ދާއިރާގެ މެންބަރު މީކާއިލް ނަސީމް ސަރުކާރަށް ވަރަށް ބޮޑަށް ފާޑުވިދާޅުވެއްޖެ. ބަޖެޓުގައި ފައިސާ ހޯދާނެ ގޮތުގެ ސާފު ތަފްސީލެއް ނެތްކަން ފާހަގަކުރައްވައި، މީގެ ސަބަބުން ރައްޔިތުންގެ ދިރިއުޅުމުގެ ހާލަތު އިތުރަށް ގޯސްވެދާނެ ކަމުގެ އިންޒާރު އޭނާ ދެއްވި. އެހެންކަމުން މިއީ ހަގީގަތް އޮޅުވާލުމަށް ހުށަހަޅާފައިވާ ބަޖެޓެއްގެ ގޮތުގައި މީކާއިލް ސިފަކުރެއްވި
ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް | ރާއްޖެ ޓީވީ
ރައީސް ޑރ. މުހައްމަދު މުއިއްޒުގެ ސަރުކާރުން ހުށަހަޅާފައިވާ ބަޖެޓަކީ ހިސާބު އަކުރުތައް އޮޅުވާލައިގެން ރައްޔިތުންނަށް ދޮގު ވިއްކުމަށް ތައްޔާރުކޮށްފައިވާ "މަކަރުވެރި" ބަޖެޓެއްކަމަށް ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް ވިދާޅުވެއްޖެ އެވެ.
އަންގާރަ ދުވަހު ބޭއްވި ރައްޔިތުންގެ މަޖިލީހުގެ ޖަލްސާގައި ވާހަކަދައްކަވަމުން މެންބަރު މީކާއިލް ވަނީ ސަރުކާރުން ހުށަހަޅާފައިވާ އަންނަ އަހަރުގެ ބަޖެޓަށް ވަރަށް ބޮޑަށް ފާޑުވިދާޅުވެފަ އެވެ.
މީކާއިލް ވިދާޅުވީ ދައުލަތުން ބަޖެޓު ހުށަހެޅުމުގެ އަސްލު މަގުސަދަކީ ރައްޔިތުންގެ ހާލަތު އަހަރުން އަހަރަށް ރަނގަޅު ކުރުމާއި، ދައުލަތުގެ މާލިއްޔަތަށް ފާރަވެރިވުމުގެ ފުރުސަތު ރައްޔިތުންގެ މަންދޫބުންނަށް ދިނުން ކަމަށެވެ. ނަމަވެސް މިހާރު ހުށަހަޅާފައިވާ ބަޖެޓުން ފެންނަނީ މުޅިން ތަފާތު މަންޒަރެއް ކަމަށް އޭނާ ފާހަގަކުރެއްވި އެވެ.
މީކާއިލްގެ ވާހަކައިގައި ރައީސް މުއިއްޒުގެ ސަރުކާރުން ހުށަހަޅާފައިވާ ބަޖެޓަކީ ދިވެހި ރައްޔިތުންގެ ޙާލަތު މިހާރަށްވުރެ ގޯސްވެގެންދާނެ ބަޖެޓެއްގެ ގޮތުގައި ސިފަކުރެއްވި އެވެ.
އޭނާ ވިދާޅުވީ ބަޖެޓު އެކުލަވާލަން ޖެހޭނީ ތެދު މައުލޫމާތުގެ މައްޗަށް ކަމަށްވީ ނަމަވެސް، މި ސަރުކާރުން ހުށަހަޅާފައިވަނީ ހިސާބު އަކުރުތައް އޮޅުވާލައިގެން ރައްޔިތުންނަށް ދޮގު ވިއްކުމަށް ތައްޔާރުކޮށްފައިވާ "މަކަރުވެރި" ބަޖެޓެއް ކަމަށެވެ. މި ބަޖެޓަށް އިޝާރާތް ކުރައްވައި މީކާއިލް ވަނީ މިއީ "ޑރ. ޕިނޯކިއޯގެ ޕިނޯކިއޯ ބަޖެޓު" ކަމަށް ވިދާޅުވެ ސަރުކާރަށް ވަރަށް ބޮޑަށް ފާޑުވިދާޅުވެފަ އެވެ.
ބަޖެޓުގެ ތަފްސީލުތަކަށް އަލިއަޅުވާލައްވަމުން މީކާއިލް ވިދާޅުވީ، ދައުލަތުން ޚަރަދު ކުރާނެ ގޮތާއި ފައިސާ ހޯދާނެ ގޮތުގެ ސާފު ތަފްސީލުތަކެއް މި ބަޖެޓުން ފެންނަން ނެތް ކަމަށެވެ. އަދި ބަޖެޓުގެ ހިސާބުތަކަށް ބަލާއިރު 2.4 ބިލިއަން ރުފިޔާގެ ފައިނޭންސިންގ ގެޕެއް ބަޖެޓުގައި އެބައޮތް ކަމަށާއި، މިއީ ކަންބޮޑުވާންޖެހޭ ކަމެއް ކަމަށް އޭނާ ފާހަގަކުރެއްވި އެވެ.
މީގެ އިތުރުން މީކާއިލް ވިދާޅުވީ، ބަޖެޓު ހުށަހެޅުމުގައި ހާމަކަން ބޮޑު ގޮތެއްގައި ކަންކަން ކުރަން ޖެހޭނެ ކަމަށާއި، ނަމަވެސް މި ސަރުކާރުން މަސައްކަތް ކުރަނީ ހަގީގަތް އޮޅުވާލައިގެން ރައްޔިތުންނަށް ނުބައި ތަސައްވުރެއް ދެއްކުމަށް ކަމަށެވެ. މި ބަޖެޓުގެ ސަބަބުން ރައްޔިތުންގެ ދިރިއުޅުމުގެ ފެންވަރަށް ބޮޑެތި ގޮންޖެހުންތަކެއް ކުރިމަތިވާނެ ކަމުގެ އިންޒާރުވެސް އޭނާ ވަނީ ދެއްވާފަ އެވެ.
