ވޭތުވެދިޔަ 10 އަހަރު ދެކުނު އޭޝިއާގައި ދަރަނި އެންމެ ހަލުވިކޮށް އިތުރުވީ ރާއްޖެއާއި ބަންގްލަދޭޝްގައި ކަމަށް ވޯލްޑް ބޭންކުން ބުނެފި
9 ނޮވެމްބަރު 2026 | ހޯމަ 07:35ވޯލްޑް ބޭންކުން ފާހަގަ ކުރާ ގޮތުގައި ރާއްޖޭގެ އެކްސްޕޯޓް އާމްދަނީގެ 11 އިންސައްތަ ހޭދަކުރަނީ ދަރަނި ދެއްކުމަށް. ދަރަނި އަނބުރާ ދެއްކުމުގެ މުއްދަތު ކުރުވެ، އިންޓްރެސްޓް ރޭޓް ބޮޑުވަމުންދާތީ މާލީ ހަމަޖެހުން ގާއިމުކުރުމަށް އިސްލާހީ ފިޔަވަޅުތައް އެޅުމަށް ވޯލްޑް ބޭންކުން ބާރުއަޅާ
ވޯލްޑް ބޭންކުގެ މައި އިދާރާ | ގެޓީއިމޭޖަސް
ވޭތުވެދިޔަ 10 އަހަރު ދުވަހުގެ ތެރޭގައި ދެކުނު އޭޝިއާ ސަރަހައްދުން ބޭރުގެ ދަރަނި އެންމެ ބޮޑަށް އިތުރުވީ ދިވެހި ރާއްޖޭގައި ކަމަށް ވޯލްޑް ބޭންކުގެ އިންޓަނޭޝަނަލް ޑެޓް ރިޕޯޓް 2026 އިން ދައްކައިފި އެވެ. ދިވެހިރާއްޖެ ފިޔަވައި ދެކުނު އޭޝިއާގައި މި މުއްދަތުގައި ބޭރުގެ ދަރަނި ދެން އެންމެ ބޮޑަށް އިތުރުވީ ބަންގްލަދޭޝްގަ އެވެ. 2015 ވަނަ އަހަރު ރާއްޖޭގެ ބޭރުގެ ދަރަނި 1 ބިލިއަން ޑޮލަރުގައި ހުރިއިރު، 2025 ވަނަ އަހަރުގެ ނިޔަލަށް އެ އަދަދު ވަނީ 4.7 ބިލިއަން ޑޮލަރަށް އަރާފަ އެވެ. މިއީ މި ސަރަހައްދުގެ ގައުމުތަކުގެ ތެރެއިން ދަރަނި އެންމެ ހަލުވިކަމާއެކު އިތުރުވި ރޭޓެވެ.
ދެކުނު އޭޝިއާ ސަރަހައްދަށް ބަލާއިރު، އެންމެ ބޮޑު ބޭރުގެ ދަރަންޏެއް އޮތީ އިންޑިއާގަ އެވެ. އެ ގައުމުގެ ދަރަނި ފާއިތުވި 10 އަހަރު ތެރޭގައި 59 އިންސައްތަ އިތުރުވެ، 764 ބިލިއަން ޑޮލަރަށް ވަނީ އަރާފަ އެވެ. ޕާކިސްތާނުގެ ދަރަނި 135 ބިލިއަން ޑޮލަރުގައި ހުރިއިރު، މިއީ މީގެ 10 އަހަރު ކުރިއާ އަޅާބަލާއިރު ގާތްގަނޑަކަށް ދެގުނަ އިތުރު އަދަދެކެވެ. ސްރީލަންކާގެ ބޭރުގެ ދަރަނި 31 އިންސައްތަ އިތުރުވެ 57 ބިލިއަން ޑޮލަރަށް އަރާފައިވާއިރު، ނޭޕާލުގެ ދަރަނި 186.5 އިންސައްތަ އިތުރުވެ 11 ބިލިއަން ޑޮލަރަށް އަދި ބޫޓާންގެ ދަރަނި 57 އިންސައްތަ އިތުރުވެ 3.3 ބިލިއަން ޑޮލަރަށް ވަނީ އަރާފަ އެވެ.
2025 ވަނަ އަހަރު ދިވެހިރާއްޖޭގެ އެކްސްޕޯޓުން ލިބުނު އާމްދަނީގެ 11 އިންސައްތަ ހޭދަކޮށްފައިވަނީ ދަރަނި ދެއްކުމަށެވެ. މިއީ އިންޑިއާ އާއި ދެކުނު އޭޝިއާގެ އެވްރެޖް ރޭޓް ކަމަށްވާ 10 އިންސައްތައަށްވުރެ މަތީ އަދަދެއް ނަމަވެސް، ސްރީލަންކާގެ 26 އިންސައްތަ އާއި ބޫޓާންގެ 19 އިންސައްތައަށްވުރެ ދަށް އަދަދެކެވެ. ވޯލްޑް ބޭންކުގެ ރިޕޯޓުގައި ފާހަގަކޮށްފައިވާ ގޮތުގައި، މިވަގުތަށް ދަރަނި މެނޭޖްކުރެވުނު ކަމުގައިވިޔަސް، ދަރަނި އަނބުރާ ދައްކަން ފަށަން ލިބޭ މުއްދަތު (ގްރޭސް ޕީރިއަޑް) ކުރުވުމާއި، ދަރަނި ނެގުމުގެ އަގު ބޮޑުވަމުން ދިއުމަކީ މި ސަރަހައްދުގެ އިގްތިސާދުތަކަށް އޮތް ބޮޑު ގޮންޖެހުމެކެވެ. ދިވެހިރާއްޖެއާއި ބަންގްލަދޭޝްގައި ހަލުވިކަމާއެކު ދަރަނި އިތުރުވަމުންދާތީ، ދިގު މުއްދަތުގެ މާލީ ހަމަޖެހުން ގާއިމުކުރުމަށްޓަކައި މާލީ ކަންކަމަށް އިސްލާހުތައް ގެނައުމަށާއި، ދަރަނިގެ ގޮތުގައި ނަގާ ފައިސާ މިހާރަށްވުރެ ހަރުދަނާ ގޮތެއްގައި ބޭނުންކުރުމަށް މާހިރުން ބާރުއަޅުއްވަ އެވެ.
