މާލީ އިދާރާތަކުން ދައުލަތަށް ދަރަންޏަށް ދޫކުރާ ފައިސާ ދަނީ އިތުރުވަމުން: ވޯލްޑް ބޭންކް

މާލީ ދާއިރާއިން ދައުލަތަށާއި ސަރުކާރު ހިއްސާވާ ކުންފުނިތަކަށް ދޫކޮށްފައިވާ ފައިސާ، 2025 ވަނަ އަހަރު ނިމުނުއިރު އޭގެ ކުރީ އަހަރާ އަޅާބަލާއިރު 15.4 އިންސައްތަ އިތުރުވެފައިވާ ކަމަށް ވޯލްޑް ބޭންކުން ފާހަގަ ކޮށްފި އެވެ.

މީގެ ތެރޭގައި މަރުކަޒީ ސަރުކާރުގެ ސެކިއުރިޓީޒްތަކާއި ލޯނުތަކުގެ ގޮތުގައި ނެގި 75 ބިލިއަން ދިވެހި ރުފިޔާ (4.9 ބިލިއަން އެމެރިކާ ޑޮލަރު ނުވަތަ ޖީޑީޕީގެ 62.8 އިންސައްތަ) އާއި، ސަރުކާރު ހިއްސާވާ ކުންފުނިތަކަށް ދޫކޮށްފައިވާ 8.5 ބިލިއަން ދިވެހި ރުފިޔާގެ (552 މިލިއަން އެމެރިކާ ޑޮލަރު ނުވަތަ ޖީޑީޕީގެ 7.1 އިންސައްތަ) ލޯނު ހިމެނެ އެވެ.

ވޯލްޑް ބޭންކުން އާންމު ކޮށްފައިވާ "މޯލްޑްވިސް ޑިވެލޮޕްމަންޓް އަޕްޑޭޓް" ގައި ބުނެފައިވަނީ ބޭންކުތަކުން ދައުލަތަށް ދޫކޮށްފައިވާ ފައިސާގެ މިންވަރު 25.9 އިންސައްތަ އިތުރުވެފައިވާއިރު، މަރުކަޒީ ބޭންކު (އެމްއެމްއޭ) އިން ދައުލަތަށް ދޫކޮށްފައިވާ މިންވަރު ވަނީ 1.5 އިންސައްތަ ދަށްވެފަ އެވެ.

ޖުމްލަގޮތެއްގައި ބަލާއިރު، 2025 ވަނަ އަހަރުގެ ނިޔަލަށް، ބޭންކުތަކުން 40 އިންސައްތަ، މާލީ އެހެނިހެން އިދާރާތަކުން 66 އިންސައްތަ، އެމްއެމްއޭ އިން 42 އިންސައްތަ ދައުލަތަށް ފައިސާގެ ގޮތުގައި ދޫކޮށްފައިވެ އެވެ. މި އިންސައްތަ އަކީ އެތަންތާނގެ މުޅި މިލްކިއްޔާތުގެ ނިސްބަތުން ދޫކޮށްފައިވާ ފައިސާގެ މިންވަރުކަން ބޭންކުން ވަނީ ފާހަގަ ކޮށްފައެވެ.

ވޯލްޑް ބޭންކުން ބުނެފައިވަނީ މެދުއިރުމަތީގެ ހަމަނުޖެހުންތަކާ ގުޅިގެން ރާއްޖޭގެ ދަރަނި އަދާކުރުމުގައި ކުރިމަތިވެދާނެ ނުރައްކާ ބޮޑުވެފައިވާތީ، މާލީ އިދާރާތަކުން ދައުލަތަށް ދޫކޮށްފައިވާ މި ފައިސާގެ ކަންކަން ވަރަށް ގާތުން ބަލަންޖެހޭ ކަމަށެވެ.