ޖަޕާނުގެ މެދުތެރެއަށް އައި ބާރުގަދަ ބިންހެލުމެއްގައި 20 އަށްވުރެ ގިނަ މީހުން ޒަޚަމުވެއްޖެ
8 ނޮވެމްބަރު 2026 | އާދީއްތަ 08:14ޖަޕާނުގެ ޝިޒުއޯކާ ޕްރިފެކްޗަރއަށް އާދީއްތަ ދުވަހު އައި ރިކްޓަރ މިންގަނޑުން 5.7 ގެ ބާރުގަދަ ބިންހެލުމުގައި 20 އަށްވުރެ ގިނަ މީހުން ޒަޚަމުވެ، ބައެއް އިމާރާތްތަކަށް ގެއްލުންތަކެއް ލިބިއްޖެ. މި ހާދިސާއާ ގުޅިގެން ރޭލު ދަތުރުފަތުރަށް ބުރޫއަރާފައިވާއިރު، ކުރިއަށް އޮތް ދުވަސްތަކުގައި އިތުރު ލޮޅުންތަކެއް އަތުވެދާނެތީ ސަމާލުވުމަށް ކަމާބެހޭ އިދާރާތަކުން ވަނީ އިލްތިމާސްކޮށްފައި
ޖަޕާނުގެ މެދުތެރޭ ސަރަހައްދަކަށް އައި ބާރުގަދަ ބިންހެލުމެއްގެ ސަބަބުން ގިނަ އަދަދެއްގެ ފިހާރަތަކެއް ހުންނަ އިމާރާތެއްގެ ކުޑަދޮރުތަކުގެ ބިންލޫރިތައް ތެޅުމުން، މަގުތައް ސާފުކުރަން އޮފިޝަލުން ހަރަކާތްތެރި ވަނީ | އޭއެފްޕީ
ޖަޕާނުގެ މެދުތެރޭ ސަރަހައްދަށް އައި ބާރުގަދަ ބިންހެލުމެއްގައި ފިހާރަތަކުގެ ބިއްލޫރިގަނޑުތައް ތަޅައިގެން ގޮސް، 20 އަށްވުރެ ގިނަ މީހުން ޒަޚަމުވެއްޖެ ކަމަށް ކަމާބެހޭ އިދާރާތަކުންނާއި މީޑިއާތަކުން ރިޕޯޓުކޮށްފި އެވެ. މި ބިންހެލުމާއެކު ރައްކާތެރިކަން ހޯދުމަށް ޓަކައި ގިނަ އަދަދެއްގެ މީހުން ވަނީ އިމާރާތްތަކުން ބޭރަށް، މަގުމައްޗަށް ނުކުމެފަ އެވެ.
ޖަޕާނުގެ މޫސުމާ ބެހޭ އިދާރާއާ ހަވާލާދީ މީޑިއާ ރިޕޯޓުތަކުން ހާމަކޮށްފައިވާ ގޮތުގައި، ރިކްޓަރ މިންގަޑުން 5.7 ގެ ބާރުމިނުގައި އައި މި ބިންހެލުން އުފެދިފައި ވަނީ އާދީއްތަ ދުވަހުގެ ފަތިހު އެ ޤައުމުގެ ގަޑިން 1:04 ގަ އެވެ. މި ލޮޅުން އުފެދުނީ ހުޅަނގު ޝިޒުއޯކާ ޕްރިފެކްޗަރގެ ބިމުގެ ގާތްގަނޑަކަށް 40 ކިލޯމީޓަރު އަޑިންނެވެ. މި ބިންހެލުމާ ގުޅިގެން ސުނާމީގެ އެއްވެސް އިންޒާރެއް ނެރެފައި ނުވާ ކަމަށް މީޑިއާތަކުން ވަނީ ރިޕޯޓުކޮށްފަ އެވެ.
ކަމާބެހޭ އިދާރާތަކާ ހަވާލާދީ މީޑިއާތަކުން ރިޕޯޓުކޮށްފައިވާ ގޮތުގައި، މި ހާދިސާގައި 20 އަށްވުރެ ގިނަ މީހުން ޒަޚަމުވެފައިވަނީ އައިޗީ އަދި ޝިޒުއޯކާ ޕްރިފެކްޗާއިންނެވެ. މީޑިއާތަކުން ބުނީ، ޒަޚަމުވި މީހުންގެ ތެރޭގައި އިމާރާތްތަކުން އަވަހަށް ނުކުތުމަށް މަސައްކަތް ކުރުމުގެ ތެރޭގައި ސިޑިމައްޗަށް ވެއްޓި އަނިޔާވި މީހުން ހިމެނޭ ކަމަށެވެ. މި ބިންހެލުމުގެ އަސަރު އައިޗީ ޕްރިފެކްޗަރ ކައިރީގައިވާ ބޮޑު ސަރަހައްދަކަށް ވަނީ ފޯރާފަ އެވެ. މި ގޮތުން، ހަމަމަޓްސޫ ސިޓީގެ އިތުރުން ޖަޕާނުގެ ތާރީޚީ ދެ ވެރިރަށް ކަމަށްވާ ކިޔޯޓޯއާއި ނާރާ، އަދި ފޫޖީ ފަރުބަދަ އޮންނަ ޔަމަނާޝީ ޕްރިފެކްޗަރއާއި ގީފޫ ޕްރިފެކްޗަރއަށް ވެސް މި ލޮޅުން އިހުސާސް ކުރެވުނެވެ. ނަމަވެސް، ބިންހެލުން އުފެދުނު މަރުކަޒާ ދުރުގައި އޮތުމުގެ ސަބަބުން ވެރިރަށް ޓޯކިޔޯއަށް މި ލޮޅުމުގެ އަސަރެއް ފޯރާފައެއް ނުވެ އެވެ.
ލިބުނު ގެއްލުންތަކާއި ފެނުނު މަންޒަރުތައް
މީޑިއާތަކުން ދެއްކި މަންޒަރުތަކުން ފެންނަ ގޮތުގައި، ލޮޅުމުގެ ބާރުގަދަކަމުން ފިހާރަތަކުގެ ބިއްލޫރިގަނޑުތައް ތަޅައިގެން ގޮސް މަގުތަކުގެ އެކި ހިސާބުތަކަށް ވަނީ ބުރައިގެން ގޮސްފަ އެވެ. ހަމަމިއާއެކު، ފޮތް ފިހާރައެއްގެ ހަރުތަކުގައި ހުރި ގިނަ އަދަދެއްގެ ފޮތްތައް ވެއްޓި، ތަޅުންގަނޑު މަތީގައި ފުނިޖެހިފައިވާ މަންޒަރު ވެސް ފެނިފައިވެ އެވެ.
ފަހުގެ ލޮޅުންތަކުގެ އިންޒާރާއި ނަންކައި ޓްރަފް
މޫސުމާ ބެހޭ އިދާރާއިން ވަނީ ކުރިއަށް އޮތް ހަފުތާގެ ތެރޭގައި، ޚާއްސަކޮށް ކުރިއަށް އޮތް ދެ ދުވަހާއި ތިން ދުވަހުގެ ތެރޭގައި ބާރުގަދަ ލޮޅުންތަކެއް އައުމުގެ ފުރުސަތު އޮތުމުން މި ކަމަށް ފާރަވެރިވެ ތިބުމަށް އާންމުންނަށް އިލްތިމާސްކޮށްފަ އެވެ. "ބިންގަނޑު ކަނޑައިގެން ދިއުމާއި، ހިލަ ފައިބައިގަތުމުގެ އިތުރުން ވާރޭވެހުމުގެ ސަބަބުން ކުރިމަތިވެދާނެ އަސަރުތަކަށް ރައްޔިތުން ސަމާލުވެ ތިއްބެވުން އެދެން،" ނޫސްވެރިންނާ ވާހަކަފުޅު ދައްކަވަމުން އެ އިދާރާގެ އޮފިޝަލެއް ކަމަށްވާ އަޔަތަކާ އެބިތާ ވިދާޅުވި އެވެ.
އަދި، ޖަޕާނުގެ ސަރަހައްދެއްގެ އަޑީގައި ދެ ޓެކްޓޯނިކް ޕްލޭޓް ބައްދަލުވާ ކަނޑުއަޑީގެ އަނދަވަޅު ކަމަށްވާ 'ނަންކައި ޓްރަފް' އިން މިހާތަނަށް ފާހަގަކުރެވޭ އެއްވެސް ބަދަލެއް ފެނިފައި ނުވާ ކަމަށް ވެސް އޭނާ ވިދާޅުވި އެވެ. މިއީ، ސައިންސްވެރިން ބުނާ ގޮތުގައި މުސްތަގުބަލުގައި އިންތިހާއަށް ބޮޑު ބިންހެލުމެއް އުފެދުމުގެ ފުރުސަތު އޮތް ސަރަހައްދެކެވެ.
ދަތުރުފަތުރަށް އެޅުނު ހުރަސްތައް
މި ބިންހެލުމާ ގުޅިގެން ރައްކާތެރިކަމުގެ ފިޔަވަޅެއްގެ ގޮތުން ރޭލު ދަތުރުތަކުގެ ބައެއް ޚިދުމަތްތައް މެދުކަނޑާލިއިރު، އެ ސަރަހައްދުގައި 'ޝިންކަންސެން' ބުލެޓް ރޭލުތައް ދަތުރުކުރީ ދުވެލި މަޑުކޮށްގެންނެވެ. ރޭލު އޮޕަރޭޓަރު ޖޭއާރު ސެންޓްރަލުން ބުނީ، ސަލާމަތީ ގޮތުން ބަލަންޖެހޭ ކަންކަން ބެލުމަށްފަހު، ވެރިރަށް ޓޯކިޔޯއާއި އޮސާކާއާ ދެމެދު ދަތުރުކުރާ 'ތޯކައިދޯ ޝިންކަންސެން' ލައިނުގެ ރޭލުތައް ޝިޒުއޯކާއާއި ގީފޫ-ހަޝީމާ ސްޓޭޝަނާ ދެމެދު ދަތުރުކުރުމުގައި ލަސްތަކެއް ކުރިމަތިވި ކަމަށެވެ.
މަސްދަރު: އަލް ޖަޒީރާ
