ޑޭޓާ ލީކުވުންތަކާ ގުޅިގެން ސައިބަރ ސެކިއުރިޓީ ވަރުގަދަކުރަން އޭއައި އަދި ޚާއްސަ ޓީމުތަކާއެކު ޖަޕާނުން ކުއްލި ފިޔަވަޅުތަކެއް އަޅައިފި

ރައްޔިތުންގެ ޒާތީ މަޢުލޫމާތުތައް ވަގަށް ނެގުމާއި ލީކުވުމުގެ ސީރިއަސް ހާދިސާތަކެއް ހިނގުމާ ގުޅިގެން، އާޓިފިޝަލް އިންޓެލިޖެންސް (އޭއައި) މެދުވެރިކޮށް ނުރައްކާތައް ދެނެގަތުމާއި ޚާއްސަ ރެސްޕޮންސް ޓީމުތައް އެކުލަވާލުން ހިމެނޭ ގޮތަށް، ސައިބަރ ސެކިއުރިޓީގެ ކުއްލި ފިޔަވަޅުތަކެއް ޖަޕާނު ސަރުކާރުން ހުކުރު ދުވަހު އިޢުލާނުކޮށްފި އެވެ.

ބޮޑުވަޒީރު ސަނާއޭ ތަކާއިޗީ ރިޔާސަތު ބެލެހެއްޓެވި ބައްދަލުވުމެއްގައި ފާސްކުރި މި ފިޔަވަޅުތަކުގެ މައިގަނޑު ބޭނުމަކީ، ހުއްދަނެތި ސިސްޓަމްތަކަށް ވަނުން ހުއްޓުވުމުގެ ދިފާޢީ ނިޒާމު ވަރުގަދަކުރުމާއި ސައިބަރ ހަމަލާތަކަށް ދޭ ރައްދު ހަރުދަނާކުރުމެވެ. މި ފިޔަވަޅުތައް މައިގަނޑު ހަތަރު ދާއިރާއަކަށް އަމާޒުކޮށްފައިވާ އިރު، އޭގެ ތެރޭގައި ހިމެނެނީ އޭއައި ބޭނުންކޮށްގެން ސަލާމަތީ ނިޒާމު ހަރުދަނާކުރުމާއި، ޖާސޫސީ މަޢުލޫމާތު އެއްކުރުން ވަރުގަދަކުރުމާއި، ހަމަލާތަކަށް އިސްތިރާޖީ ގޮތެއްގައި ރައްދުދިނުމުގެ އިތުރުން ހަމަލާތަކުގެ ޝިކާރައަކަށްވާ ފަރާތްތަކަށް ދޭ އެހީތެރިކަން އިތުރުކުރުމެވެ.

Advertisement

މި ނިޒާމުގެ ދަށުން، ހެކަރުންގެ ހަރަކާތްތަކާ ދެކޮޅަށް ފިޔަވަޅު އެޅުމަށް ޓަކައި ސައިބަރ ސެކިއުރިޓީގެ މާހިރުން ހިމެނޭ 'ޓޮޕް ގަން' ޓީމެއް ސަރުކާރުން އުފައްދާނެ އެވެ. ހަމަމިއާއެކު، ކޮމްޕިއުޓަރ ސިސްޓަމްތަކުގައި ހުންނަ ނާޒުކު ބަލިކަށި ދޮރުތައް ދެނެގަތުމަށް އޭއައި ޓެކްނޮލޮޖީ ބޭނުންކުރަން ވަނީ ހަމަޖެހިފަ އެވެ. ސައިބަރ ހަމަލާތައް އަމާޒުވާ ކުންފުނިތަކަށް އެހީތެރިވުމަށް ޓަކައި ދައުލަތާއި އަމިއްލަ ދާއިރާގެ މާހިރުންގެ މައްޗަށް އެކުލެވޭ ވަކި 'ރެސްކިއު ޓީމެއް' ހަރަކާތްތެރިވާނެ އިރު، ނުރައްކާތައް ކުރިމަތިވެދާނެ ކަމަށް ލަފާކުރެވޭ ވިޔަފާރިތަކަށް އިރުޝާދު ދިނުމަށް ޚާއްސަ އެހެން ޔުނިޓެއް ވެސް ގާއިމުކުރާނެ ކަމަށް ޖަޕާނުގެ ނޫސްތަކުން ރިޕޯޓުކުރެ އެވެ.

މީގެ އިތުރުން، އޮކްޓޫބަރު މަހު އަމަލުކުރަން ފެށި ޤާނޫނެއްގެ ދަށުން، ހަމަލާދޭ ފަރާތްތަކުން ބޭނުންކުރާ ސަރވަރުތަކަށް ކަމާބެހޭ އިދާރާތަކުން އިސްވެ ވަދެވޭ ގޮތަށް، ޓޯކިޔޯއިން އެ ޤައުމުގެ 'އެކްޓިވް ސައިބަރ ޑިފެންސް' ގާބިލުކަން އިތުރަށް ފުޅާކުރާނެ އެވެ. މި މަސައްކަތްތަކަށް ބޭނުންވާ ފައިސާ ހަމަޖެއްސުމުގެ ގޮތުން، 2026 ވަނަ މާލީ އަހަރުގެ ރިޒާވް ފަންޑުން 10 ބިލިޔަން ޔެން (ގާތްގަނޑަކަށް 63 މިލިޔަން އެމެރިކާ ޑޮލަރު) ސަރުކާރުން ވަނީ ކަނޑައަޅާފަ އެވެ. މި ފައިސާ ޚަރަދުކުރުމަށް ހަމަޖެހިފައި ވަނީ ފުލުހުންގެ ޖާސޫސީ މަޢުލޫމާތު އެއްކުރުމުގެ ގާބިލުކަން އިތުރުކުރުމާއި ސައިބަރ ސެކިއުރިޓީ ހަރުދަނާކުރުމުގެ ކަންކަމަށެވެ.

މި ފިޔަވަޅުތައް އިޢުލާނުކޮށްފައި މި ވަނީ، ޖީއެމްއޯ އިންޓަނެޓް ގްރޫޕަށް އަމާޒުކޮށްދިން ރެންސަމްވެއާ ހަމަލާ ހިމެނޭ ގޮތަށް، ގިނަ ބައެއްގެ ސަމާލުކަން ލިބުނު ސީރިއަސް ހަމަލާތަކެއް ފަހަކަށް އައިސް ފެންމަތިވެފައިވަނިކޮށެވެ. މިއާއެކު، ކުއްލި ފިޔަވަޅުތަކުގެ ޕެކޭޖެއް އެކުލަވާލުމަށް ބޮޑުވަޒީރު ތަކާއިޗީ ވަނީ މިދިޔަ ހަފުތާގައި އަމުރުކުރައްވާފަ އެވެ. ވިޔަފާރިތަކަށާއި، ޤައުމުގެ މުހިންމު އުމްރާނީ ވަސީލަތްތަކަށާއި، ޤައުމީ ސަލާމަތަށް އަމާޒުކޮށް ދޭ ސައިބަރ ހަމަލާތަކާ މެދު ކަންބޮޑުވުންތައް އިތުރުވަމުން އަންނާތީ، ޖަޕާނުން އަންނަނީ އެ ޤައުމުގެ ސައިބަރ ސެކިއުރިޓީގެ އޮނިގަނޑު ހަރުދަނާކުރުމަށް ފިޔަވަޅުތައް އަޅަމުންނެެވެ.