ޓޯކިޔޯއަށް ވިއްސާރަ އަލިނުވާތާ 34 ދުވަސް، މިއީ ރެކޯޑެއް!
29 ސެޕްޓެމްބަރު 2026 | އަންގާރަ 09:02ޖަޕާނުގެ މޫސުމާ ބެހޭ އިދާރާއިން ހާމަކުރި ގޮތުގައި ޓޯކިޔޯއަށް ކުރިމަތިވި މި ތާރީޚީ ވިއްސާރައަކީ އެލް ނީނިއޯއާއި ދުނިޔެ ހޫނުވުމުގެ ސަބަބުން މޫސުމަށް އައި ބަދަލުތަކާ ގުޅިގެން ދިމާވި ކަމެއް. މި ދުވަސްވަރު އެ ސިޓީއަށް އާންމުކޮށް ވެހޭ ވަރަށް ވުރެ ތިން ގުނަ އިތުރަށް ވާރޭވެހި ފެންބޮޑުވުމުގެ ހާދިސާތައް ހިނގާފައިވާއިރު، މިއީ ޕެސިފިކް ސަރަހައްދުގެ ވައިގެ ޕްރެޝަރަށް އައި ބަދަލުތަކާ ގުޅިފައިވާ ކަމެއް ކަމަށްވެސް އެ އިދާރާއިން ފާހަގަކުރޭ
ޓޯކިޔޯއަށް ވާރޭ ވެހެމުންދާއިރު، ކުޑަ ނަގައިގެން ތިބި ހިނގާ މީހުން މަގު ހުރަސްކުރާ ސަރަހައްދަކުން ހިނގާފައި ދަނީ | އަނަދޮލު އޭޖެންސީ
ޖަޕާނުގެ ވެރިރަށް ޓޯކިޔޯއަށް މެދުކެނޑުމެއް ނެތި 34 ދުވަހު ވާރޭވެހި، އެ ސިޓީގެ ތާރީޚުގައި ވެސް އެންމެ ގިނަ ދުވަހު ވާރޭވެހުމުގެ ރެކޯޑު މުގުރިފައިވާ ކަމަށް އެ ގައުމުގެ މޫސުމާ ބެހޭ އިދާރާއިން އަންގާރަ ދުވަހު ހާމަކޮށްފި އެވެ. މިއީ، 1886 ވަނަ އަހަރު މޫސުމީ ރެކޯޑުތައް ބަލަހައްޓަން ފެށި ފަހުން، މިހާ ދިގު މުއްދަތަކަށް މެދުކެނޑުމެއް ނެތި ވާރޭވެހުނު ފުރަތަމަ ފަހަރު ކަމަށް އެ އިދާރާއިން ބުނެފައިވެ އެވެ.
ޖަޕާނުގެ މޫސުމާބެހޭ އިދާރާގެ (ޖޭއެމްއޭ) އޮފިޝަލެއް ކަމަށްވާ މަސަޔުކީ ކިޔޯދާ ވިދާޅުވީ، "މި މަހުގެ މޫސުމީ ޗާޓަށް އައިސްފައިވާ މި ޚާއްސަ ބަދަލަކީ އެއްބައި ގޮތްގޮތުން އެލް ނީނިޔޯގެ ސަބަބުން ވެސް ވީ ކަމެއް." އަދި، މީގެ ސަބަބުން ޕެސިފިކް ކަނޑުގެ ފިނިހޫނުމިން މަތިވަމުންދާ ކަން އޭނާ ފާހަގަކުރެއްވި އެވެ. މީގެ އިތުރުން، ޕެސިފިކް ސަރަހައްދުގައި ވައިގެ މަތީ ޕްރެޝަރު ސިސްޓަމެއް އާދައިގެ ވަރަށް ވުރެ ގިނަ ދުވަހު ދެމިއޮތުމުގެ ސަބަބުން، "ޚަރީފު މޫސުމުގެ ވާރޭ ވިލާތައް އާދައިގެ ވަރަށްވުރެ ގިނަ ދުވަހު ދެމިގެން އެބަދޭ" ކަމަށް ޓޯކިޔޯގެ ވިއްސާރަ މޫސުމަށް އިޝާރާތް ކުރައްވައި ކިޔޯދާ ވިދާޅުވި އެވެ.
މި ވިއްސާރަ މޫސުމީ ބަދަލުތަކާ ސީދާ ގުޅުވައިލެވެން ނެތް ކަން އޭނާ ފާހަގަކުރެއްވި އެވެ. ނަމަވެސް، "ދުނިޔެ ހޫނުވުމުގެ ސަބަބުން، ވާރޭވެހޭ މިންވަރު އިތުރުވުން ވެސް ހިމެނޭހެން، ދިގު މުއްދަތަކަށް ޖަޕާނުގެ މޫސުމަށް ދަނީ އަސަރުކުރަމުން" ކަމަށް ޖޭއެމްއޭއިން މިދިޔަ އަހަރު ނެރުނު ރިޕޯޓެއްގައި ނިންމާފައިވާ ކަން ކިޔޯޑާ ފާހަގަކުރެއްވި އެވެ.
ކާރުޚާނާތަކާއި އުޅަނދުފަހަރުގެ ދުމުން ބޭރުވާ ވިހަ ގޭހުގެ ސަބަބުން އުފެދޭ މޫސުމީ ބަދަލުތަކުގެ ސަބަބުން، ޖައްވުގައި ތެއްކަން އިތުރުވެ، ބޯކޮށް ވާރޭވެހުމުގެ ފުރުސަތު ބޮޑުވެ އެވެ. އަދި، މި އަހަރު މުޅި ދުނިޔޭގެ މޫސުމަށް ވެސް އެލް ނީނޔޯގެ އަސަރު ފޯރަމުންދާއިރު، މީގެ ސަބަބުން ވައިރޯޅިއާއި، ވައިގެ ޕްރެޝަރަށާއި، ވިލާތަކުގެ ދައުރުވުމަށް ބަދަލު އާދެ އެވެ. މި ބަދަލުތަކުގެ ސަބަބުން ބައެއް ސަރަހައްދުތަކަށް ބޯކޮށް ވާރޭވެހި، އަނެއްބައި ސަރަހައްދުތަކަށް ހަނަފަސްކަން ކުރިމަތިވެ އެވެ.
އާންމު ގޮތެއްގައި ޖަޕާނުގެ ވެރިރަށަށް ވިއްސާރަ މޫސުން ކުރިމަތިވަނީ ޖޫން މަހު ނަމަވެސް، މި ހޫނު މޫސުމުގެ މަސްތަކުގައި މެދުކެނޑުމެއް ނެތި ބޯކޮށް ވާރޭވެހި، ޓޯކިޔޯގެ ބޮޑު ސަރަހައްދެއްގައި ވަނީ ފެންބޮޑުވުމުގެ ހާދިސާތައް ކުރިމަތިވެފަ އެވެ. ޓޯކިޔޯއަށް މީގެ ކުރިން އެންމެ ގިނަ ދުވަހު މެދުކެނޑުމެއް ނެތި ވާރޭވެހުމުގެ ރެކޯޑަކީ 33 ދުވަސް ކަމަށާއި، އެއީ 2019 ވަނަ އަހަރުގެ ޖޫން 27 އިން ސެޕްޓެންބަރު 29 އަށް ކަމަށް ޖޭއެމްއޭގެ އެހެން އޮފިޝަލެއް ކަމަށްވާ ކަޒުހިރޯ ހިރޮނޯ ވިދާޅުވި އެވެ.
ސެޕްޓެންބަރު 1 އިން 28 ވަނަ ދުވަހާ ދެމެދު ޓޯކިޔޯގެ މެދުތެރެއަށް 629 މިލިމީޓަރުގެ ވާރޭ ވެހިފައިވެ އެވެ. މިއީ، އާންމުކޮށް އެ މުއްދަތުގައި ވާރޭވެހޭ މިންވަރަށް ވުރެ ގާތްގަނޑަކަށް ތިން ގުނަ އިތުރު އަދަދެކެވެ. މިއާއެކު، މިއީ 1958 ވަނަ އަހަރުގެ ސެޕްޓެންބަރު މަހު ރެކޯޑުކުރެވުނު 670.9 މިލިމީޓަރުގެ ތާރީޚީ ރެކޯޑާ ގާތްކުރާ އަދަދެއް ކަމަށް ޖަޕާނުގެ ނޫސްތަކުން ރިޕޯޓުކުރި އެވެ.
ޓޯކިޔޯއަށް މި ވިއްސާރަ ކުރިމަތިވެފައި މި ވަނީ، އެ ސަރަހައްދަށް ކުރިމަތިވި މޫސުމީ ގަދަފަދަ ސިސްޓަމެއްގެ ސަބަބުން ތައިލެންޑުގައި ފެންބޮޑުވެ 1.7 މިލިޔަން މީހުންނަށް އަސަރުކޮށް، ސެޕްޓެންބަރު މަހުގެ މެދެއްހާ ހިސާބުން ފެށިގެން މިހާތަނަށް 23 މީހުން މަރުވެފައިވާ ދަނޑިވަޅެއްގަ އެވެ. ވިއްސާރައިގެ އަސަރު އިންޑިޔާގެ އިތުރުން ނޭޕާލަށް ވެސް ކުރަމުންދާއިރު، ފެންބޮޑުވުމާ ގުޅިގެން ހިނގި ހާދިސާތަކުގައި އިންޑިޔާއިން 80 އަށްވުރެ ގިނަ މީހުން ވަނީ މަރުވެފަ އެވެ.
މަސްދަރު: ސީއެންއޭ
