މާސްގެ ހަނދުން ސާމްޕަލް ހޯދުމުގެ ތާރީޚީ މިޝަން ޖަޕާނުން ކާމިޔާބުކަމާ އެކު ފަށައިފި
20 އޮކްޓޯބަރު 2026 | އަންގާރަ 06:06މާސްގެ ހަނދު 'ފޯބޯސް' އިން ސާމްޕަލް އެއްކުރުމަށް ޖަޕާނުން ފޮނުވި މި އުޅަނދު 2027 ވަނަ އަހަރު އެ ގުރަހައިގެ އޯބިޓަށް ވަންނާނެ. މި މިޝަންގެ ދަށުން އެއްކުރާ ސާމްޕަލްތަކާއެކު 2031 ގައި އުޅަނދު އެނބުރި ދުނިޔެއަށް އައުމަށް ތާވަލުކޮށްފައިވާއިރު، މީގެ މައިގަނޑު ބޭނުމަކީ މާސްގެ ހަނދުތައް އުފެދުނު ގޮތް ދެނެގަތުން
މާސްގެ ހަނދަކުން ސާމްޕަލް ނެގުމަށް ޖަޕާނުން ފޮނުވާލި އުޅަނދާއެކު ރޮކެޓެއް އުދުއްސައިލާ މަންޒަރު | އެކްސް
މާސްގެ ހަނދަކުން ހިލައާއި ވެލީގެ ސާމްޕަލް އެއްކުރުމަށް ދުނިޔޭގައި ކުރިއަށްގެންދާ ފުރަތަމަ މިޝަންގައި، ޖަޕާނުން ޖައްވީ އުޅަނދެއް ކާމިޔާބުކަމާއެކު އަންގާރަ ދުވަހު ޖައްވަށް ފޮނުވާލާފައިވާ ކަމަށް އެ ޤައުމުގެ ޖައްވީ އިދާރާއިން ބުނެފި އެވެ. މާޝަން މޫންސް އެކްސްޕްލޮރޭޝަން (އެމްއެމްއެކްސް) އުޅަނދު އެޗް3 ރޮކެޓުން ކާމިޔާބުކަމާ އެކު ވަކިވެ، ކަނޑައެޅިފައިވާ އޯބިޓަށް ވަދެފައިވާ ކަމަށް ޖަޕާން އެރޯސްޕޭސް އެކްސްޕްލޮރޭޝަން އޭޖެންސީއިން (ޖޭއޭއެކްސްއޭ) ވަނީ ބުނެފަ އެވެ.
މި ރޮކެޓް ޖައްވަށް އުދުއްސާލީ ޖަޕާނުގެ ހުޅަނގުދެކުނުގައި އޮންނަ ތަނެގަޝިމާ ސްޕޭސް ސެންޓަރުން، އެ ޤައުމުގެ ގަޑިން ފަތިހު 4:41 ގަ އެވެ. ޖައްވީ އުޅަނދު އޭގެ އަމާޒަށް ވާސިލުވީ "ފުރިހަމަކަމަކާ އެކު" ކަމަށް ޖޭއޭއެކްސްއޭގެ ޕްރޮޖެކްޓް މެނޭޖަރު މަކޮޓޯ އަރީޓާ ވިދާޅުވި އެވެ.
ބަރުދަނުގައި 4،480 ކިލޯ ހުންނަ މި ޖައްވީ އުޅަނދު ދަތުރުކުރާނީ މާސްގެ ދެ ހަނދުގެ ތެރެއިން ބޮޑު ހަނދު ކަމަށްވާ ފޯބޯސްއަށެވެ. އަދި، މި އުޅަނދު މާސްގެ އޯބިޓަށް ވަނުމަށް ހަމަޖެހިފައި ވަނީ 2027 އޮގަސްޓު މަހު އެވެ. ފޯބޯސްއަށް އެންމެ ފުރަތަމަ ޖައްސާނީ ފަރަންސޭސިވިލާތާއި ޖަރުމަނުވިލާތް ގުޅިގެން އުފައްދާފައިވާ ރޯވަރެއް ނުވަތަ އުޅަނދެކެވެ.
މިއާއެކު، ސާމްޕަލް އެއްކުރުމަށް ޓަކައި ޖަޕާނުގެ ޖައްވީ އުޅަނދު ދެ ފަހަރެއްގެ މަތިން އެ ހަނދަށް ޖެއްސުމަށް ވަނީ ރާވާފަ އެވެ. މާސްގެ ދެވަނަ ހަނދު ކަމަށްވާ ޑެއިމޯސް ބަލައި ދިރާސާކުރުމަށް ފަހު، މި އުޅަނދު 2030 ނޮވެންބަރު މަހު މާސްގެ އޯބިޓުން ނައްޓާލާނެ އެވެ. އަދި، މި އުޅަނދު ސާމްޕަލްތަކާއެކު އެނބުރި ދުނިޔެއަށް އަންނާނެ ކަމަށް ލަފާކުރެވެނީ 2031 ޖުލައި މަހު އެވެ.
މި ތާރީޚީ މިޝަން ކާމިޔާބުވާނެ ކަމަށް އުއްމީދު ކުރައްވާ ކަމަށް ވިދާޅުވެ، މި އުޅަނދު ޖައްވަށް ފޮނުވާލުމުގައި ހަރަކާތްތެރިވި ޓީމަށް ބޮޑުވަޒީރު ސަނައެ ތަކައިޗީ މަރުހަބާ ވިދާޅުވި އެވެ. މި އުޅަނދު ޖައްވަށް ފޮނުވުމަށް އެންމެ ފުރަތަމަ ތާވަލުކުރީ 2024 ގަ އެވެ. ނަމަވެސް، 2023 ގައި އެޗް3 ރޮކެޓްގެ ފުރަތަމަ ދަތުރު ނާކާމިޔާބުވުމާ ގުޅިގެން މި ދަތުރު ވަނީ ފަސްކޮށްފަ އެވެ. ބައިނަލްއަގުވާމީ އެމްއެމްއެކްސް މިޝަންގެ އަމާޒަކީ މާސްގެ ހަނދުތައް އުފެދުނު ގޮތް ދެނެގަތުމާއި، ކުރިމަގުގައި އެހެން ޕްލެނެޓްތައް ހޯދައި ބެލުމަށް ބޭނުންވާ ޓެކްނޮލޮޖީ އިތުރަށް ތަރައްގީކުރުމެވެ.
