ކަނޑުގެ ސަރަހައްދަށް 10 މިސައިލް ފޮނުވައިލާ އުތުރު ކޮރެއާއިން އަނެއްކާ ވެސް ބިރުދައްކައިފި
29 އޮކްޓޯބަރު 2026 | ބުރާސްފަތި 09:09އުތުރު ކޮރެއާގެ ވޮންސާން ސަރަހައްދުން ފޮނުވާލި މި މިސައިލްތައް ޖަޕާނުގެ އިގުތިސާދީ ސަރަހައްދުން ބޭރަށް ވެއްޓިފައިވާއިރު، މި ހާދިސާއާ ގުޅިގެން ދެކުނު ކޮރެއާގެ އަސްކަރިއްޔާއިން ވަނީ ތައްޔާރީ ހާލަތު ވަރުގަދަކޮށްފައެވެ. މި އަހަރުގެ ތެރޭގައި އެ ގައުމުން 10 އަށްވުރެ ގިނަ ފަހަރު މިސައިލް ޓެސްޓުކޮށްފައިވާއިރު، މި ފަހަރުގެ ހަމަލާތަކާ ގުޅޭ މައުލޫމާތު ދެކުނު ކޮރެއާއިން އަންނަނީ އެމެރިކާ އަދި ޖަޕާނާ ހިއްސާކުރަމުންނެވެ.
އުތުރު ކޮރެއާއިން މިސައިލް ޓެސްޓުތަކެއް ހަދާ މަންޒަރު ދެކުނު ކޮރެއާގެ ޓީވީތަކުން ދައްކަނީ | ގެޓީ އިމޭޖަސް
އުތުރު ކޮރެއާގެ އިރުމަތީ އައްސޭރިފަށުގެ ބޭރުން ކަނޑުގެ ސަރަހައްދަށް އަމާޒުކޮށް، ކުރު ރާސްތާގެ 10 ބެލިސްޓިކް މިސައިލް ބުރާސްފަތި ދުވަހު ފޮނުވާލާފައިވާ ކަމަށް ދެކުނު ކޮރެއާގެ އަސްކަރިއްޔާއިން ބުނެފި އެވެ.
މި މިސައިލްތައް ފޮނުވާލާފައި ވަނީ އެ ޤައުމުގެ ގަޑިން މެންދުރު 12:30 ހާއިރު، އުތުރު ކޮރެއާގެ އިރުމަތީ އައްސޭރިފަށުގައި އޮންނަ ވޮންސާން ސަރަހައްދުން ކަމަށް ދެކުނު ކޮރެއާގެ ޖޮއިންޓް ޗީފްސް އޮފް ސްޓާފްއިން (ޖޭސީއެސް) ނެރުނު ބަޔާނެއްގައި ބުންޏެވެ.
އުތުރު ކޮރެއާއިން އިތުރު މިސައިލްތަކެއް ފޮނުވާލައިފާނެ ކަމަށް ބަލައި، އަސްކަރިއްޔާގެ ފާރަވެރިކަން އިތުރުކޮށް ތައްޔާރީ ހާލަތު ވަރުގަދަކުރަމުން އަންނަ ކަމަށް ދެކުނު ކޮރެއާއިން ބުންޏެވެ. މިއާއެކު، އެމެރިކާ އަދި ޖަޕާނާ ގުޅިގެން މި ހާދިސާއާ ގުޅޭ މަޢުލޫމާތު ވަރަށް ގާތުން ހިއްސާކުރަމުން އަންނަ ކަމަށް ވެސް އަސްކަރިއްޔާއިން ފާހަގަކުރި އެވެ.
ދެކުނު ކޮރެއާގެ ޔޮންހަޕް ނޫސް އޭޖެންސީން ރިޕޯޓުކޮށްފައިވާ ގޮތުގައި، އުތުރު ކޮރެއާއިން ފޮނުވާލާފައި ވަނީ ބެލިސްޓިކް މިސައިލެއް ކަމަށް ބެލެވޭ އެއްޗެއް ކަމަށާއި، އެ ތަކެތި ވެއްޓިފައި ވަނީ ޖަޕާނުގެ ޚާއްސަ އިގުތިސާދީ ސަރަހައްދުން (އީއީޒެޑް) ބޭރަށް ކަމަށް ޖަޕާނުގެ ދިފާޢީ ވުޒާރާއިން ވަނީ ހާމަކޮށްފަ އެވެ. މި ހަމަލާތަކުގެ ކުރިން ޖަޕާނުގެ ކޯސްޓްގާޑުން ވެސް ބުނީ، ފޮނުވާލި އުޅަނދަކީ ބެލިސްޓިކް މިސައިލެއް ކަމަށް ބެލެވޭ ކަމަށާއި އެ ތަކެތި މިހާރު ކަނޑަށް ވެއްޓިފައިވާ ކަމަށެވެ.
އުތުރު ކޮރެއާއިން އެންމެ ފަހުން ބެލިސްޓިކް މިސައިލްތަކެއް ފޮނުވާލާފައި ވަނީ އޮކްޓޫބަރު 12 ގަ އެވެ. އެ ފަހަރު މިސައިލް ފޮނުވާލާފައި ވަނީ، ފާއިތުވި މަހު ދެ ކޮރެއާ ވަކިކުރާ ބޯޑަރު ސަރަހައްދުގައި މައިނެއް ގޮވުމުގެ ސަބަބުން ދެކުނު ކޮރެއާގެ ސިފައިންތަކެއް ޒަޚަމުވެ، ދެ ޤައުމުގެ ދެމެދުގައި މަސްރަހު ވަރަށް ބޮޑަށް ހޫނުވެފައި ވަނިކޮށެވެ. މި އަހަރުގެ ތެރޭގައި އެކަނި ވެސް ޕިޔޮންގްޔަންގުން ވަނީ 10 ފަހަރަށް ވުރެ ގިނަ ފަހަރު މަތިން މިސައިލް ޓެސްޓުތައް ކުރިއަށް ގެންގޮސްފަ އެވެ.
މަސްދަރު: ރޮއިޓަރސް
