ޔޫކްރެއިންގެ ޑްރޯންތަކުން ރަޝިޔާގެ އެންމެ ބޮޑު ޑޭޓާ ސެންޓަރަށް ހަމަލާދީފި
14 އޮކްޓޯބަރު 2026 | ބުދަ 08:46ރަޝިޔާގެ ޓެކް ކުންފުނިތަކަށް އަމާޒުކޮށް ޔޫކްރެއިނުން ދެމުންދާ ހަމަލާތަކުގެ ތެރެއިން، އެ ގައުމުގެ އެންމެ ބޮޑު ޑޭޓާ ސެންޓަރަށް ޑްރޯން ހަމަލާތަކެއް ދީފި. މި ހަމަލާތަކާ ގުޅިގެން ސްބިޔަރްބާންގެ ޚިދުމަތްތަކަށް ބުރޫނާރާ ކަމަށް އެ ކުންފުނިން ބުނި ނަމަވެސް، ހުޅަނގުގެ ދަތިކުރުމުގެ ފިޔަވަޅުތަކުގެ ސަބަބުން ރަޝިޔާގެ އާޓިފިޝަލް އިންޓެލިޖެންސް ދާއިރާ ކުރިއެރުވުމަށް ވަނީ ގޮންޖެހުންތަކާ ކުރިމަތިވެފައި
ރަޝިޔާގެ އެންމެ ބޮޑު ޑޭޓާ ސެންޓަރު ކަމަށްވާ ސްބިޔަރްބާންއަށް ޔޫކްރެއިނުން ދިން ޑްރޯން ހަމަލާއަކާ ގުޅިގެން ލިބިފައިވާ ގެއްލުންތައް | އެކްސްލީނޯވާ+
ޔޫކްރެއިންގެ ޑްރޯންތަކުން ރަޝިޔާގެ އެންމެ ބޮޑު ޑޭޓާ ސެންޓަރަށް ހަމަލާދީފައިވާ ކަމަށާއި، ނަމަވެސް އެ ކުންފުނީގެ އޮޕަރޭޝަންތަކަށް އެއްވެސް ބުރޫއެއް އަރާފައިނުވާ ކަމަށް، އެ ޑޭޓާ ސެންޓަރުގެ މިލްކުވެރިކަން އޮންނަ، އެ ޤައުމުގެ އެންމެ ބޮޑު ބޭންކު އަދި ޓެކްނޮލޮޖީ ކުންފުނި ކަމަށްވާ ސްބިޔަރްބާންގެ އިސް އޮފިޝަލަކު ބުދަ ދުވަހު ހާމަކޮށްފި އެވެ.
ވުލްގާ ކޯރުގެ އައްސޭރީގައި އޮންނަ ސަރާތަފް ސަރަހައްދަށް ދިން މި ހަމަލާއަކީ، ރަޝިޔާގެ ޓެކް ގްރޫޕް ޔަންޑެކްސްގެ ޑޭޓާ ސެންޓަރުތަކަށް ފާއިތުވި ހަފުތާގެ ތެރޭގައި ދިން ތިން ހަމަލާއާ ގުޅިގެން ދިން ހަމަލާއެކެވެ. އަދި، މިއީ ރަޝިޔާއިން އެ ޤައުމުގެ ޑޭޓާ ސައިޓުތަކަށް ދެމުންދާ ހަމަލާތަކަށް ދޭ ރައްދެއް ކަމަށް ޔޫކްރެއިނުން ބުނެ އެވެ.
"ޑޭޓާ ޕްރޮސެސިންގް ސެންޓަރަށް ހަމަލާދީފައިވާ ކަން އަޅުގަނޑުމެން ކަށަވަރުކޮށްދެން. ހަމަމިއާއެކު، ސްބިޔަރްބާންގެ ހުރިހާ ސިސްޓަމްތަކާއި ޚިދުމަތްތައް ވެސް އެއްވެސް މެދުކެނޑުމެއްނެތި އާންމު ގޮތެއްގައި ދަނީ މަސައްކަތްކުރަމުން،" ނޫސްވެރިންނަށް މައުލޫމާތު ދެއްވަމުން ސްބިޔަރްބާންގެ ފަސްޓް ޑެޕިއުޓީ ސީއީއޯ އަލެކްސާންދްރަ ވިދްޔަޚިން ވިދާޅުވި އެވެ.
ރަޝިޔާގައި އާޓިފިޝަލް އިންޓެލިޖެންސް އުފައްދާ އެންމެ އިސް ކުންފުންޏަކީ ސްބިޔަރްބާންއާއި އޭގެ އެންމެ ބޮޑު ވާދަވެރިޔާ ކަމަށްވާ ޔަންޑެކްސް އެވެ. މި ގޮތުން، އެ ޤައުމުގެ އެތެރޭގެ މާކެޓް ބެހިފައި ވަނީ ސްބިޔަރްބާންގެ ޖިގަޗެޓް މޮޑެލްއާއި ޔަންޑެކްސްޖީޕީޓީގެ މެދުގަ އެވެ.
މި ދެ ކުންފުނިން ވެސް އެ ކުންފުނިތަކުގެ މޮޑެލްތައް ތަރައްގީކުރުމަށް ބޮޑެތި އިންވެސްޓްމަންޓްތަކެއް ކޮށްފައިވީ ނަމަވެސް، އެމެރިކާއާއި ޗައިނާ ފަދަ ދުނިޔޭގެ ކުރިއަރާފައިވާ ޤައުމުތަކަށްވުރެ ނުވަ މަސް ދުވަސް ފަހަތުގައި އެ ކުންފުނިތައް އުޅޭކަން ފާހަގަކުރެވެ އެވެ. މީގެ މައިގަނޑު އެއް ސަބަބަކީ، އެންމެ ޒަމާނީ ހާޑްވެއާތައް ހޯދުމަށް ރަޝިޔާއަށް ހުރަސްއެޅޭ ގޮތަށް ހުޅަނގުން އަޅާފައިވާ ދަތިކުރުމުގެ ފިޔަވަޅުތަކެވެ.
ބަލަކޮވާގައި ހުންނަ 55،000 އަކަމީޓަރުގެ ބޮޑު ސަރަހައްދެއް ހިމެނޭ ސްބިޔަރްބާންގެ ސެންޓަރަށް ހަމަލާދީފައިވާއިރު، 2027 ވަނަ އަހަރު ބޭނުންކުރަން ފެށުމަށް ހަމަޖެހިފައިވާ ރަޝިޔާގެ އެންމެ ބޮޑު ސުޕަކޮމްޕިއުޓަރު ބެހެއްޓުމަށް ހަމަޖެހިފައިވަނީ ވެސް އެ ތަނުގައި ކަމަށް، 2024 ވަނަ އަހަރު ރަޝިޔާގެ ދައުލަތުގެ ނޫސް އޭޖެންސީ، އާރްއައިއޭ ނޮވަސްތީން ރިޕޯޓުކޮށްފައިވެ އެވެ.
މި ސައިޓު ގާއިމުކޮށްފައި ވަނީ ބަލަކޮވާ ނިއުކްލިއާ ޕަވާ ޕްލާންޓާއި ސަރާތަފް ހައިޑްރޯއިލެކްޓްރިކް ޕަވާ ޕްލާންޓާ ޖެހިގެންނެވެ. ޔޫކްރެއިނުން ދިން ހަމަލާތަކުގައި ސުޕަކޮމްޕިއުޓަރުތަކަށް ގެއްލުމެއް ލިބިފައިވާ ކަން ޔަންޑެކްސްއިން އަދި ސްބިޔަރްބާންއިން ވެސް ކަށަވަރުކޮށްދީފައެއް ނުވެ އެވެ.
މަސްދަރު: ރޮއިޓަރސް
