އާރުޑީސީ އިން 449 މީހުންނަށް ވަޒީފާ ދީފައިވަނީ އިއުލާނުނުކޮށް ފެންނަ މީހަކަށް ވަޒީފާ ދޭ ގޮތަށް: އޮޑިޓް
7 ނޮވެމްބަރު 2026 | ހޮނިހިރު 11:25އާރުޑީސީގެ އިންޓާނަލް އޯޑިޓް ރިޕޯޓުން ހާމަވި ގޮތުގައި، ވަޒީފާއަށް މީހުން ނެގުމުގައި އެންމެ ބޮޑަށް ބޭނުންކޮށްފައިވަނީ ރަސްމީ ސިޔާސަތެއް ނެތް "ހެޑްހަންޓް" އުސޫލް. މި އުސޫލުން ހުރިހާ ފަންތިއެއްގެ މަގާމުތަކަށް މީހުން އައްޔަންކޮށްފައިވާއިރު، މުވައްޒަފުންގެ ރެކޯޑުތައް ފުރިހަމައަށް ބަލަހައްޓާފައިވެސް ނުވޭ
ތ. މަޑިފުށި މަގުތައް ތަރައްޤީ ކުރުމުގެ މަސައްކަތްތުގައި އާރްޑީސީގެ މުވައްޒަފުންތަކެއް ހަރަކާތްތެރިވަނީ | އާރްޑީސީ
ސަރުކާރުގެ ކުންފުނި ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ) އިން 449 މީހަކަށް ވަޒީފާ ދީފައިވަނީ އިއުލާނު ކުރުމެއްނެތި ފެންނަ މީހަކަށް ވަޒީފާ ދޭ ގޮތަށް ކަމަށް އިންޓާނަލް އޮޑިޓް ރިޕޯޓުން ހާމަވެއްޖެ އެވެ.
އެ ކުންފުނީގެ ހިއުމަން ރިސޯސް ޑިޕާޓްމަންޓް (އެޗް.އާރު.ޑީ) އިން އިންޓާނަލް އޮޑިޓަށް ފޯރުކޮށްދީފައިވާ މައުލޫމާތުގައިވާ ގޮތުން އޯޑިޓް ކުރެވުނު އަހަރެއްހާ ދުވަހުގެ މުއްދަތުގެ ތެރޭގައި ވަޒީފާއަށް އަލަށް ނެރުނު 817 މުވައްޒަފުންގެ ތެރެއިން 449 މުވައްޒަފުންނަކީ ހެޑްހަންޓް އުސޫލުން ވަޒީފާ ދީފައިވާ މީހުންނެވެ. މިއީ ވަޒީފާއަށް ނެގި މުވައްޒަފުންގެ ޖުމްލަ އަދަދުގެ 55 އިންސައްތަ އެވެ. ވަޒީފާއަށް މީހުން ނެގުމުގައި އެންމެ ބޮޑަށް ބޭނުންކޮށްފައިވަނީ ހެޑްހަންޓް އުސޫލު ކަމުގައި ވީނަމަވެސް، މިކަމަށް ކަނޑައެޅިފައިވާ ރަސްމީ ސިޔާސަތެއް ނުވަތަ ފުރިހަމަ އިޖުރާއަތްތަކެއް ނެތްކަން އޯޑިޓް ރިޕޯޓުގައި ފާހަގަކޮށްފައިވެ އެވެ. މީގެ އިތުރުން، ހަމައެކަނި ފަންނީ މަގާމުތަކުގެ ބަދަލުގައި، ހުރިހާ ފަންތިއެއްގެ އަދި ހުރިހާ ދާއިރާއެއްގެ ވަޒީފާތަކަށް މީހުން ނެގުމުގައިވެސް މި އުސޫލު ބޭނުންކޮށްފައިވެ އެވެ. އަދި ހެޑްހަންޓް ކުރެވޭ މުވައްޒަފުންގެ ރެކޯޑުތައް ފުރިހަމައަށް ބަލަހައްޓާފައި ނުވާކަންވެސް ވަނީ ފާހަގަކުރެވިފަ އެވެ. އެގޮތުން، ސާމްޕަލްގެ ގޮތުގައި ބެލި މުވައްޒަފުންގެ ތެރެއިން ހެޑްހަންޓް އުސޫލުން ވަޒީފާ ދީފައިވާ 11 މީހެއްގެ ނަން، އެޗް.އާރު.ޑީ އިން ފޯރުކޮށްދިން ހެޑްހަންޓް ލިސްޓުގައި ހިމެނިފައި ނުވާކަން ވަނީ ދެނެގަނެވިފަ އެވެ. އެގޮތަށް ފާހަގަކުރެވުނު މުވައްޒަފުންގެ ތަފްސީލުތައް ވެސް އޮޑިޓް ރިޕޯޓުގައި ވަނީ ފާހަގަކޮށްފަ އެވެ.
މި ރިވިއު ކުރިއަށް ގެންގޮސްފައިވަނީ 1 އޮކްޓޫބަރު 2024 އިން 30 ސެޕްޓެމްބަރު 2025 ގެ ނިޔަލަށެވެ. މި މުއްދަތުގެ ތެރޭގައި، ހިއުމަން ރިސޯސްއާ ގުޅޭ މައުލޫމާތުގެ ސައްހަކަމާއި ފުރިހަމަކަން ކަށަވަރުކުރުމަށާއި، އެތެރޭގެ ސިޔާސަތުތަކާއި ކަނޑައެޅިފައިވާ އިޖުރާއަތްތަކުގެ އިތުރުން ގާނޫނީ އަދި ގަވާއިދުން ލާޒިމްކުރާ ކަންކަމަށް އަމަލުކުރާ މިންވަރު ވަޒަންކުރުމަށްޓަކައި، ކުންފުނީގައި އަމަލުކުރަމުންދާ ހިއުމަން ރިސޯސް ސިޔާސަތުތަކާއި، އިޖުރާއަތްތަކާއި، އޮޕަރޭޝަނަލް ނިޒާމުތައް ވަނީ ދިރާސާކޮށް އިވެލުއޭޓް ކޮށްފަ އެވެ.
ސަރުކާރުގެ ހިންގުން ދޯދިޔާވެ، އުސޫލުތަކުގެ ބޭރުން ކުންފުނިތަކަށާއި އޮފީސްތަކަށް މުވައްޒަފުން ހޯދާ ކަމުގެ އަޑުތައް ގަދަވެފައިވާ ދަނޑިވަޅެއްގައި ހާމަވި މި ރިޕޯޓުގައި ހެޑްހަންޓް ކުރެވޭނެ ހާލަތްތަކާއި، ހުއްދަ ހޯދަންޖެހޭ ފަންތިތަކާއި، ބަލަހައްޓަންޖެހޭ ލިޔެކިޔުންތައް ސާފުކޮށް އެނގޭނެ ފަދަ ރަސްމީ ހެޑްހަންޓް ސިޔާސަތެއް އެކުލަވާލައި ތަންފީޒުކުރަން ޖެހޭ ކަމަށް ރިޕޯޓުގައި ވަނީ ބުނެފަ އެވެ. އަދި ހެޑްހަންޓް އުސޫލުން މީހުން ނެގުން ހަމައެކަނި ހާއްސަ ފަންނީ މަގާމުތަކަށް ނުވަތަ މީހުން ހޯދަން ދަތި މަގާމުތަކަށް ހަނިކުރުމަށާއި، އެފަދަ ނިންމުމެއް ނިންމުމުގެ ކުރިން ސީނިއާ މެނޭޖްމަންޓުގެ ހުއްދައާއި އެކަމުގެ ސަބަބު ބަޔާންކުރާ ލިޔުމެއް ހޯދުމަށް ވަނީ ލަފާދީފަ އެވެ. މީގެ އިތުރުން، މޮނިޓަރ ކުރުމުގެ ބޭނުމަށްޓަކައި، ހެޑްހަންޓް ކުރެވޭ މުވައްޒަފުން ހޮވި ސަބަބާއި، ހުއްދަ ދިން ފަރާތުގެ ރެފަރެންސް އަދި ވަޒީފާ ދިނުމުގެ ނަތީޖާ ހިމެނޭ ރަޖިސްޓްރީއެއް ބެލެހެއްޓުމަށްވެސް ވަނީ އިރުޝާދު ދީފަ އެވެ.
