ބޭރުގެ މިޝަންތައް ހިންގުމަށް މަހެއްގެ މައްޗަށް 1.5 މިލިއަން ޑޮލަރު!

ދިވެހިރާއްޖޭން ބޭރު ގައުމުތަކުގައި ގާއިމުކޮށްފައިވާ ޑިޕްލޮމެޓިކް މިޝަންތަކާއި އެމްބަސީތަކުގެ ހިންގުމުގެ ޚަރަދަށް މަހެއްގެ މައްޗަށް އެވްރެޖުކޮށް 1.5 މިލިއަން އެމެރިކާ ޑޮލަރު ހޭދަވާކަން ހާމަވެއްޖެ އެވެ.

ދުނިޔޭގެ އެކި ކަންކޮޅުތަކުގައި ހިންގަމުންދާ ރާއްޖޭގެ މިޝަންތަކުގެ ހިންގުމުގެ ޚަރަދުތަކާއި މުވައްޒަފުންގެ މުސާރަ އަދި އެހެނިހެން އިދާރީ ކަންކަމަށް ދައުލަތުގެ ބަޖެޓުން ބޮޑު ހޭދައެއް ކޮންމެ މަހަކުވެސް ކުރަންޖެހެ އެވެ. އެގޮތުން، މި އަހަރުގެ މިހާތަނަށް އެކަނިވެސް ބޭރުގެ މިޝަންތައް ހިންގުމަށް 220 މިލިއަނަށް ވުރެ ގިނަ ދިވެހި ރުފިޔާ ވަނީ ޚަރަދުވެފަ އެވެ.

Advertisement

ދިވެހިރާއްޖެއިން ބޭރުގައި ގާއިމުކޮށްފައިވާ އެމްބަސީތަކާއި ހައިކޮމިޝަންތައް ހިންގުމަށް މަހެއްގެ މައްޗަށް ހިނގާ ޑޮލަރުގެ ޚަރަދު ހޯދުމަށް ރާއްޖެޓީވީން، މިނިސްޓްރީ އޮފް ފޮރިން އެފެއާޒަށް ހުށަހެޅި އާރްޓީއައިގެ ޖަވާބުގައިވާ ގޮތުން،  ޚާރިޖީ ޚިދުމަތްތަކުގެ ބަޖެޓުގެ ތަފާސްހިސާބުތައް ދައްކާގޮތުން، 30 ސެޕްޓެމްބަރު 2026 ވަނަ ދުވަހާ ހަމައަށް، ރާއްޖޭގެ 21 މިޝަނަކަށް ޖުމްލަ 220,333,378.89 (ދުއިސައްތަ ވިހި މިލިއަން ތިން ސަތޭކަ ތިރީސް ތިން ހާސް ތިންސަތޭކަ ހަތްދިހަ އަަށް ރުފިޔާ ނުވަދިހަ ނުވަ ލާރި) ވަނީ ޚަރަދުވެފަ އެވެ. މިއީ އެމެރިކާ ޑޮލަރުން ބަލާނަމަ 14,288,805.38 (ސާދަ މިލިއަން ދުއިސައްތަ އައްޑިހަ އަށްހާސް އަށްސަތޭކަ ފަސް ޑޮލަރު ތިރީސް އަށް ސެންޓު) އެވެ. މި ހިސާބުތަކަށް ބަލާއިރު ބޭރުގެ މިޝަންތައް ހިންގުމަށް އެވްރެޖުކޮށް މަހެއްގެ މައްޗަށް 24.4 މިލިއަން ރުފިޔާ (1.5 މިލިއަން ޑޮލަރު) ހޭދަވެ އެވެ.

ހިސާބުތައް ދައްކާގޮތުން މި މުއްދަތުގެ ތެރޭގައި އެންމެ ބޮޑު ޚަރަދެއް ހިނގާފައިވަނީ މެލޭޝިއާގެ ކުއާލަލަމްޕޫރުގައި ހުންނަ ދިވެހި ހައިކޮމިޝަނަށެވެ. އެގޮތުން ކުއާލަލަމްޕޫރު މިޝަނަށް 22.9 މިލިއަން ރުފިޔާ (1.4 މިލިއަން ޑޮލަރު) ޚަރަދުވެފައިވާއިރު، އެއީ މަހެއްގެ މައްޗަށް ގާތްގަނޑަކަށް 2.5 މިލިއަން ރުފިޔާ އެވެ. ދެވަނައަށް އެންމެ ބޮޑު ހޭދައެއް ކޮށްފައިވަނީ ޔުނައިޓެޑް އަރަބް އެމިރޭޓްސްގެ އަބޫދާބީ މިޝަނަށެވެ. އެ މިޝަނަށް 17.9 މިލިއަން ރުފިޔާ (1.1 މިލިއަން ޑޮލަރު) ހޭދަވެފައިވެ އެވެ. އަދި ތިންވަނައަށް އެންމެ ބޮޑު ޚަރަދެއް ރެކޯޑުކުރެވިފައިވަނީ އަވަށްޓެރި ސްރީލަންކާގެ ކޮލަމްބޯ މިޝަނަށެވެ. އެއީ ޖުމްލަ 17.2 މިލިއަން ރުފިޔާ އެވެ.

ރާއްޖޭން ބޭރުގައި ހުންނަ ޑިޕްލޮމެޓިކް މިޝަންތަކަށް މިއަހަރުގެ ސެޕްޓެމްބަރު މަހުގެ 30 އާ ހަމައަށް ކުރެވިފައިވާ ޚަރަދުގެ ތަފްސީލު | ފޮރިން މިނިސްޓްރީ

މީގެއިތުރުން، ތައިލެންޑުގެ ބެންކޮކް މިޝަނަށް 15.5 މިލިއަން ރުފިޔާ، އެމެރިކާގެ ނިއުޔޯކް މިޝަނަށް 13.7 މިލިއަން ރުފިޔާ، ސިންގަޕޫރު މިޝަނަށް 13.2 މިލިއަން ރުފިޔާ، ޖެނީވާ މިޝަނަށް 12 މިލިއަން ރުފިޔާ، އަދި ޖަޕާނުގެ ޓޯކިޔޯ އަދި ސައޫދީ އަރަބިއްޔާގެ ރިޔާޟް މިޝަނަށް ކޮންމެ މިޝަނަކަށް 11 މިލިއަނަށް ވުރެ ގިނަ ރުފިޔާ ވަނީ ޚަރަދުވެފަ އެވެ.

މި ލިސްޓުގައި ހިމެނޭ މިޝަންތަކުގެ ތެރެއިން އެންމެ ކުޑަ ޚަރަދެއް ހިނގާފައިވަނީ ސައޫދީ އަރަބިއްޔާގެ ޖިއްދާގައި ހުންނަ ކޮންސިއުލޭޓަށެވެ. އެ ތަނަށް ސެޕްޓެމްބަރު މަހުގެ ނިޔަލަށް ޚަރަދުވެފައިވަނީ ޖުމްލަ 2.8 މިލިއަން ރުފިޔާ (184,492 ޑޮލަރު) އެވެ. އެއީ މަހަކަށް ގާތްގަނޑަކަށް ތިން ލައްކަ ސޯޅަ ހާސް ރުފިޔާ އެވެ. އަދި ޕާކިސްތާނުގެ އިސްލާމްއާބާދު މިޝަނަށް 4.6 މިލިއަން ރުފިޔާ ހޭދަވެފައިވާއިރު، ބަންގްލަދޭޝްގެ ޑާކާ މިޝަނަށް 5.3 މިލިއަން ރުފިޔާ ވަނީ ހޭދަވެފަ އެވެ.

ރާއްޖޭން ބޭރުގައި ގާއިމުކޮށްފައިވާ ޑިޕްލޮމެޓިކް މިޝަންތަކަކީ، އެ ގައުމުތަކުގައި ދިރިއުޅޭ އަދި އެކި ބޭނުންތަކަށް ޒިޔާރަތްކުރާ ދިވެހި ރައްޔިތުންނަށް ކޮންސިއުލާ އެހީތެރިކަން ފޯރުކޮށްދިނުމުގެ އިތުރުން، ބައިނަލްއަގުވާމީ މައިދާނުގައި ރާއްޖޭގެ ޚާރިޖީ ސިޔާސަތު ކުރިއެރުވުމުގައި މުހިންމު ދައުރެއް އަދާކުރަންޖެހޭ ތަންތަނެވެ. އެހެންނަމަވެސް، އެ މިޝަންތަކަށް ދައުލަތުގެ ބަޖެޓުން ކުރާ ބޮޑެތި ޚަރަދުތަކާ އެކަށޭނަ މިންވަރަށް ނަތީޖާ ހާސިލުނުކުރެވޭ ކަމުގެ ކަންބޮޑުވުން ގިނަ ރައްޔިތުންގެ މެދުގައި އެބައޮތެވެ. އަދި ހަމައެއާއެކު، އެދެވޭ ގޮތެއްގައި ރާއްޖޭގެ ޚާރިޖީ ސިޔާސަތު ކުރިއަރައިގެންދާ މަންޒަރު ފެންނަމުން ނުދާކަންވެސް ފާހަގަކުރެވެ އެވެ.