ނޮވެންބަރު މަހުގެ 12 ވާ ބުރާސްފަތި ދުވަސް، ސަރުކާރު ބަންދު ދުވަހެއްގެ ގޮތުގައި ހަމަޖައްސައިފި

މިހިނގާ ނޮވެންބަރު 12 ވާ ބުރާސްފަތި ދުވަސް، ސަރުކާރު ބަންދު ދުވަހެއްގެ ގޮތުގައި ހަމަޖެއްސެވުމަށް ރައީސް ޑރ. މުހައްމަދު މުއިއްޒު ނިންމަވައިފި އެވެ.

މި އަހަރުގެ ޖުމްހޫރީ ދުވަހާ ގުޅިގެން، ކުރިއަށް އޮތް ނޮވެންބަރު މަހުގެ 12 ވާ ބުރާސްފަތި ދުވަހަކީ ސަރުކާރު ބަންދު ދުވަހެއްގެ ގޮތުގައި ރައީސް މުއިއްޒު ހަމަޖައްސަވާފައިވާކަން ރައީސުލްޖުމްހޫރިއްޔާގެ އޮފީހުން  ވަނީ މިކަން ރަސްމީކޮށް އިއުލާނު ކުރައްވާފަ އެވެ.

Advertisement

ރައީސުލްޖުމްހޫރިއްޔާ މިގޮތަށް ނިންމެވީ، ކޮންމެ އަހަރެއްގެވެސް ނޮވެންބަރު މަހުގެ 11 ވަނަ ދުވަހަކީ ޖުމްހޫރީ ދުވަހުގެ ގޮތުގައި ފާހަގަކުރާ ރަސްމީ ބަންދު ދުވަހަކަށް ވެފައި، އެ ދުވަހާ ގުޅިގެން އަންނަ ނޮވެންބަރު 12 ވާ ބުރާސްފަތި ދުވަހަކީ ރަސްމީ މަސައްކަތު ދުވަހެއްގެ ގޮތުގައި އޮތުމުންނެވެ.

އެހެންކަމުން، ބަންދު ދުވަސްތަކަށް މެދުކެނޑުމެއް ނައިސް ސަރުކާރުގެ މުވައްޒަފުންނަށް ޗުއްޓީ ލިބޭނޭގޮތް ހަމަޖައްސަވައިދެއްވުމަކީ މި ނިންމެވުމުގެ މައިގަނޑު މަގުސަދު ކަމަށް ރައީސް އޮފީހުން މައުލޫމާތުދެ އެވެ.

މި ނިންމެވުމާއެކު، ޖުމްހޫރީ ދުވަހުގެ ބަންދާއި، ހަފުތާ ބަންދުގެ ދުވަސްތައް ހިމެނޭހެން ސަރުކާރުގެ މުވައްޒަފުންނަށް މެދުކެނޑުމެއްނެތި ހަތަރު ދުވަހުގެ ބަންދެއް ލިބިގެންދާނެ އެވެ. އެއީ ނޮވެންބަރު 11 ވާ ބުދަ ދުވަހުން ފެށިގެން ނޮވެންބަރު 14 ވާ ހޮނިހިރު ދުވަހުގެ ނިޔަލަށެވެ.

ސަރުކާރުން އާންމުކޮށް އަމަލުކުރަމުންދާ އުސޫލުގެ ދަށުން، ދެ ބަންދު ދުވަހެއްގެ ދެމެދަށް ވަންނަ ރަސްމީ މަސައްކަތު ދުވަސްތަކަކީ، އާންމު ރައްޔިތުންނާއި މުވައްޒަފުންނަށް ލުއިފަސޭހަ ކޮށްދިނުމުގެ ގޮތުން ބަންދު ދުވަސްތަކެއްގެ ގޮތުގައި މީގެ ކުރިން ވެސް ހަމަޖައްސަމުން ގޮސްފައިވެ އެވެ. 

ރައީސުލްޖުމްހޫރިއްޔާގެ މި ނިންމެވުމާ ގުޅިގެން، ސަރުކާރުގެ އިދާރާތަކުން މިހާރު ދަނީ އެ ދުވަސްތަކުގައި ދޭންޖެހޭ ޒަރޫރީ ޚިދުމަތްތައް މެދުނުކެނޑި ފޯރުކޮށްދިނުމަށް ބޭނުންވާ އިންތިޒާމުތައް ހަމަޖައްސަމުންނެވެ.