މުއިއްޒާއި މުއިއްޒުގެ ހިސާބު ކިތާބު

އޭރު ސަހަރޯއޭ ހީވި އެވެ. ދެން މި ނިމުނީއޭ ދުވަސްކޮޅެއްގެ ފަހުން އުޅެވޭނީ މުޅިން އެހެން ގައުމެއްގައޭވެސް ހިތަށް އެރި އެވެ. ރައީސް ކަމަށް ވަޑައިގަންނަވަން ޕީއެންސީގެ ކެންޑިޑޭޓް ޑރ މުއިއްޒު ވިދާޅުވި ވިދާޅުވުން އަޑު އަހަ ދިން ވޯޓާއެކު ހޮވުނީތީ އެވެ.

"ހުރިހާ ޕްލޭންތަކެއް ހުރީ ހަދާ ނިމިފަ އެވެ. ފައިސާ ހުރީ ހަމަ ޖެހިފަ އެވެ. އިގްތިސޯދު ކޮންމެ ގޮތަކަށް އޮތަސް ވަރިހަމަ އެވެ. ނަގާ ކޮޅަށް ޖަހައިގެން ކަން ކުރާނަމެވެ" މުއިއްޒު ވަރަށް ޔަގީން ކަމާއެކު ވިދާޅުވި އެވެ.

އެވާހަކަތަކުން ދޭހަވީ ކަންކަން ހުރީ ވަރަށް ބޮޑަށް ޕްލޭން ކުރެވިފައި ކަމަށެވެ. އެކަން ކަމަށް ބޭނުންވާނެ ފައިސާ އާމެދު އެއްވެސް ހާސްކަމެއް ނެތް ކަމެވެ. ހިސާބު ކިތާބުތައް ހުރީ ނިމިފައި ކަމަށެވެ.

ދެއްވި އެއް ޔަޤީން ކަމަކީ ރަސްމާލެ އެވެ. ބޯހިޔާ ވަހިކަމުގެ ބިޔަ މަޝްރޫއެވެ. ވިދާޅުވީ އެތަން ނިންމާނީ ލޯ ލާރިއެއްވެސް ދައުލަތުގެ ބަޖެޓުން ނުނަގައެވެ. ވެރިކަން ދެބައިން ބޮޑުވީއެވެ. ދެބައި ކުޅަ އެއްބައިވެސް ނުނިމުނެވެ. އެއެއްވެސް ނޫނެވެ. ޚަރަދު ނުކުރަނީކީ ލޯލާރިއެއް ނޫނެވެ. އެތަނަށް އެއަޅާލީ މިލިޔަން ޑޮލަރުންނެވެ. ދުނިޔޭގެ އެންމެ ބޮޑު ޑްރެޖަރުތައް ގެނެއީ ދައުލަތުގެ ބަޖެޓުން އެތައް މިލިއަން ޑޮލަރެއް ދީފަ އެވެ. ޖެހި ހިސާބު ކިތާބަށް ވީ ގޮތެއް ނޭނގުނެވެ.

ވެރިކަމުގެ ކުރީކޮޅެވެ. މަޖިލިސް އިންތިޚާބަށް މީހުންގެ ގާތަށް ހިނގި ދުވަސްވަރެވެ. ވިދާޅުވި އެވެ. އަދި އޮތީ ކުރީ ސަރުކާރުން ކަނޑައެޅި ބަޖެޓެކެވެ. އެބަޖެޓްގައި އޮތީ ޖެއްސުން ކޮށްފައެވެ. ކަމެއް ކުރިއަ ނުދީފައެވެ. ތިމަންމެންގެ ބަޖެޓް ހަދާނީ އާ މަޖިލީހުންނެވެ. އެވިދާޅުވި އާ މަޖިލިސް ދިނީމާ އެމަޖިލީހުން އެވިދާޅުވާ ބަޖެޓްތައްވެސް ހަދާފައި ދީފިއެވެ. އަދިއެއް އެބުނާ ބިޔަ ބޮޑު މަޝްރޫއެއްގެ ހިލަމެއް ނުވިއެވެ. ކުރިން ކުރަމުން އައި ކަންކަން ހުއްޓުނު ގޮތަށް ހުރީއެވެ. ދަގަނޑުތައް ދަބަރަށްވެ، ސިމެންތިތައް ގާ ވީ އެވެ. ކޮނެފައި އޮތް ބަނދަރުތައް ތިލަވެ، ހިއްކަން އެޅި ވެލިކޮޅުގެ ގިރާ ލައިގެން ދަނީއެވެ. ބޮޑު ހިލަ ހިފައިގެން ދަތުރުކުރި ބާޖުތައް ވީތަނެއް ނޭނގި ކެންޕޭނަށް އެރުވި ހައިމާކުތައް ބަނޑު ޖެހިގޮތައް އޮތީ އެވެ. ހިސާބު ކިތާބު ހަމަ ބަރާބަރެވެ.

ބުނިގޮތައް މަޖިލިސް ދިނެވެ. އެމަޖިލިސް ދީފިނަމަ ޑޮލަރުގެ ހަމަ އަގަށް ތިރިކުރާނެ ކަމުގެ ޔަގީންކަން ދިނެވެ. ހިސާބު ކިތާބު ޖަހައިގެންނެވެ.

ވިދާޅުވި އެވެ. ޕްލޭންކޮށްގެން، ޓެކްނިކަލީ ވާކްކޮށްގެން ކުރާ ކަންތައްކެއް ކަމަށް ވިދާޅުވެ އެވެ. 2026 ގެ ފުރަތަމަ ކުއާޓަރު ތެރެއަށް ދާއިރު ރާއްޖެއިން ފުރާ ކޮންމެ ދިވެއްސަކަށް 500 ޑޮލަރުގެ ބަދަލުގައި ދޭނީ 1000 ޑޮލަރެވެ. ހިސާބު ކިތާބު ބެލިގެން ޕްލޭން ކޮށްގެން، ޓެކްނިކަލީ ވާކް ކޮށްގެން ކުރި ކަމެކެވެ. އެކަމަކު އެ އެއްހާސް ޑޮލަރު ގަންނަން ލިބުނު މީހަކު އަދިއަދަށްވެސް ބޭރަކަށް ނުފުރައެވެ.

ވިދާޅުވި އެވެ. ޓީޓީތަކަށް 50 ޕަސެންޓު ޑޮލަރު ސަޕޯޓު ދޭނަމެވެ. ހިސާބު ކިތާބު ޖަހާފައި ޓެކްނިކަލީ ވާކް ކޮށްގެންވެސް އެވިދާޅުވި ވަރަށް ޑޮލަރު ލިބުނު އާއްމު ވިޔަފާރި ވެރިއަކު ނެތެވެ. އަމިއްލަ ޕާޓީގެ މީހަކު ނެތްކަމެއް ނޭނގެ އެވެ.

ވިދާޅުވި އެވެ. ވަރަށް ބޮޑަށް ދިރާސާވެސް ކޮށްފަ އެވެ. ހިސާބު ކިތާބު ބަލައި ޓެކްނިކަލީ ވާކްވެސް ކޮށްފަ އެވެ. އާސަންދައަށް ފޮނުވާނީ ލަންކާ އިންޑިއާއަކަށް ނޫނެވެ. ބެންކޮކަށެވެ. ގެންނާނީ ކައްޕަޅި އިންޑިޔާ ބޭހެއް ނޫނެވެ. އެބުނާ އާސަންދަ ލިބުނު އާދައިގެ މީހެއް ނެތެވެ. މުޅި މާލޭގައި ހިނގައިގެންވެސް ސިޓީއަކަށް ބޭސް ހަމައެއް ނުކުރެވެ އެވެ. އެކަމަކު އެބަދަލަކީ ސީދާ ހިސާބު ކިތާބު ބަލައިގެން ކުރި ކަމެކެވެ.

ވިދާޅުވެއްޖެއެވެ. އާސަންދައިން ފުރާ ކޮންމެ މީހަކަށް 2000 ޑޮލަރު ދޭން ފަށައިފީ މެވެ. ވަރަށް މޮޅެވެ. ހިސާބު ކިތާބު ޖަހައިގެން ކުރި އެދިޔައީ ސީދާ ފަހަތަށެވެ. އެއީ ކުރިންވެސް ލިބޭ އެއްޗެކެވެ. އެކަމަކު އެންމެ 2000 ޑޮލަރެއް ނޫނެވެ. ރާއްޖޭގައި ހުރި ކޮންމެ ބޭންކަކުންނެވެ. ހިސާބު ކިތާބު ޖަހައިގެން އެގެނައި މޮޅު ބަދަލުން މިހާރު ލިބެނީ އެންމެ ކޮންމެވެސް އެއް ބޭންކަކުން ލިބޭ 2000 ޑޮލަރެވެ.

ކޮންމެއަކަސް ދިއުޅި ދިގު ކުރާކަށް އިތުރަކަށް ކިޔާނެ ކަމެއް ނެތެވެ. މުއިއްޒު ވިދާޅުވާ ގޮތުންނަމަ ކަންކުރައްވަނީ ވަރަށް ބޮޑަށް ދިރާސާކޮށް ޓެކްނިކަލީ ވާކް ކޮށްގެންނެވެ. ހިސާބު ކިތާބު ޖެހިގެންނެވެ. ކުރެވޭނެ ކަމުގެ ސީދާ ޔަޤީން ކަމާއެކުގަ އެވެ. އެކަންކަމަށް މީހަކު ހުރަސް އެޅުމުގެ މާނައެއް ނެތެވެ. އެކަމަކު ފެންނަނީ ދިމާ އިދިކޮޅަށެވެ. ސީދާ ނުއަތަށެވެ. މުއިއްޒާ މުއިއްޒުގެ ހިސާބު ކިތާބެވެ. ޓެކްނިކަލީ އެޔެއް ދިމައެއް ނުވެއެވެ.